10
No Kaābak ni Dabid Siras Ammonita Saw
(1 Kron. 19:1-19)
1 Do nakapaypahabas no chimpo, nadiman āri naw no Ammonita saw, as iyaw pōtot naw a si Hanon iyaw mintādi sya a āri.
2 Binata ni Dabid a kāna, “Machita ko a ipaboyaw kapodno di Hanon a pōtot ni Nahas a akmas nakaipaboyaw ni Nahas a āmang na so kapodno na dyaken.” Dawa, nanoboy si Dabid siras pinakainawan na a mangay a mangahwahok di Hanon a maynamot do nakadimanaw ni āmang na.
Do nakapakarapit daw no tinoboy saw ni Dabid do tana dan Ammonita saw,
3 binata dan pangpangōlo saw no Ammonita di Hanon a āpo da a kon da, “Aysa, iktokto mori a idāyaw ni Dabid si āmang mo do nakatoboy na siras taga-ahwahok dyimo? Engga! Tinoboy sabawri ni Dabid dyimo tan mangay sa a magwanawan do syodadaya kan magispya, as kan sakōpen na? Ay, oyod ngata!”
4 Dawa, inpatiliw sa ni Hanon siraw tinoboy saw ni Dabid. Inpachischis naw godwan minyin no kāda asa dyira, inpakteb naw laylay daw mandad katinghan tan maboyaw no dachan da, as nakapayam na sira.
5 Do nakadāmagaw sya ni Dabid so naparinaw, nanoboy so mangbayat sira, ta oltimo nakasnesnek da. Inbahey no āryaw a kāna, “Omyan kamo do Jeriko mandan tomobo saw minyin nyo saya, as kapaybidi nyo.”
6 Do nakapatak daw no Ammonita saw a taywara a nakasoli si Dabid dyira, nanawag kan nangbāyad sa so 20,000 a Arameo a manakenakey a soldādo a yapo do tana a Bet-rehob kan Sobah. Nanawag sa pa kan nangbāyad sa do āryaw no Maakah kontodo 1,000 a mahahakay, kan 12,000 a mahahakay a yapo do Tob.
7 Do nakadāmagaw sya ni Dabid so maynamot do dyaya, tinoboy na si Joab kontodo tābo a bōyot na a mangay a manggobat dyira.
8 Minohtot saw Ammonita saw kan nagpwisto sa do asdepanaw no rowangan no syodad da. As siraw Arameo saw no Sobah kan Rehob, kan siraw mahahakayaw no Tob kan Maakah, ki nagpwisto sa do marahawa a yanan a machibawa so dēkey do syodadaw.
9 Do nakaboyaw ni Joab a machita a machigobat sa dyira do salapen na kan do dichodan na, pinidi naw kadwan saw no kagaganayan a soldādo no Israel a machirayay dya, kan inpwisto na sa a manggobat siras Arameo saw.
10 Inpaimandar na di Abisay a kakteh na siraw nabidin saw a soldādo, kan inpwisto na sa a manggobat siras Ammonita saw.
11 Binata ni Joab di kakteh na a kāna, “An maboya mo a mayīyit saw Arameo kan yamen, mangay kamo a somidong dyamen. Ki an mayīyit saw Ammonita kan inyo aket, mangay kami met a somidong dyinyo.
12 Payiten kan patoreden mo kapangtokto mo. Mangyit ta a machigobat a sitotored a para dyirad tawotawo ta kan dyirad syodad saw no Dyos. Si ĀPO pakono, mamarin an āngo maganay do kapanyideb na.”
13 Do nakapaypasngen daw da Joab kan bōyot naw a machigobat, naychapayyapayyayo saw Arameo saw do salapen na.
14 Do nakaboya daw no Ammonita saw a naychapayyapayyayo saw Arameowaw, naychapayyapayyayo sa met do salapen ni Abisay, kan nagatras sa a naybidi do syodadaw. Sinpangan na, naybidi si Joab a yapo do pachigobatanaw, kan nangay do Jerosalem.
15 Do nakaboya daw no Arameo saw a inābak sa no Israel, pinirwa daw naychihchipeh.
16 Sinpangan na, pinatawag ni Hadadeser kadwan saw a soldādo no Arameo a yapo do dayāen no Oksong a Oprates. Nawara sa do Helam a indaōlwan ni Sobak a komander no bōyot ni Hadadeser.
17 Do nakaibaheyaw daw sya di Dabid so nya, chinpeh na tabo bōyot no Israel. Namtang sa do Oksong a Jordan, kan nangay sa do Helam. Nagpwisto saw Arameo saw a nangbayat di Dabid, as nachigobat sa dya.
18 Ki minirwa darana sa pinayyayowan no Arameo saw siraw Israelitaw. Diniman da Dabid 700 dyirad Arameo saw a magmaniho do logan a pachigobat kan 40,000 a manakenakey a soldādo. Nabigaran si Sobak a komander no bōyot da, as kan nadiman daw.
19 Do nakaboya daw no tabo a ar-āri a intorayan ni Hadadeser a inābak dana sa no Israel, nachikapya sa dyirad Israelita saw kan nagpaitoray dana sa dyira. Dawa, namo saw Arameo saw a minirwa a somidong siras Ammonita.