21
No Kapamahes dan Gibeonita Saw
1 Do kapagāryaw ni Dabid, myan kapaychapteng do irahem no tatdo a katawen a nagsasarono. Dawa, nanahes si Dabid di ĀPO. Binata ni ĀPO a kāna, “Si Saulo kan pamilya naw nangmancha so raya a iyaw naynamotan nyaya, ta diniman na saw Gibeonita saw.”
2 Inpatawag no āryaw Gibeonita saw, kan nachisarīta dyira. (Siraw Gibeonita saw, ki kapotōtan daba do Israel, an dya natokotokos dana sa dyirad Amoreo saw. Nagsapata saw Israelita saw a dyi da sa dimanen, ki pinādas sa ni Saulo a otanen do kaisakit na dyirad tawotawo no Israel kan Joda.)
3 Inyahes ni Dabid dyirad Gibeonita saw a kāna, “Āngo maparin ko para dyinyo? Maypāngo iyaw kakosto ko dyinyo tan mirwa kamonchi a makabindisyon siras tawotawo ni ĀPO?”
4 Tinbay da no Gibeonita saw a kon da, “Mabayādan aba so pirak mana balitok pinarin da dyamen da Saulo kan pamilya na. As abaw karbengan namen a mangdiman so aran āngo a Israelita.”
“Na, āngo chakey nyo a parinen ko para dyinyo?” inyahes ni Dabid.
5 Initbay da do āryaw a kon da, “Si Saulo iyaw nangipangta a mangdiman dyamen tan abo danaw matokos a omyan do aran dino do tana no Israel.
6 Dawa, mangiparawat kamo dyamen so papito a mahahakay a kapotōtan na, ta dimanen kan lōdyiten namen do masngenaw do pagdaydāyawan di ĀPO do Gibea a īdi ni Saulo a iyaw pinidi naw ni ĀPO.”
Binata no āryaw a kāna, “Na, iparawat ko sanchi dyinyo.”
7 Ki chināsi no āryaw si Mepiboset a pōtot ni Jonatan a pōtot ni Saulo maynamot do nakapagsapata da Dabid kan Jonatan do salapen ni ĀPO.
8 No inhap ni Dabid, ki sa Armoni kan Mepiboset a siraw dadwaw a anak na mahahakay ni Rispah a minabakes ni Saulo. As si Rispah, ki pōtot a mabakes ni Aya. Inhap na pa ni Dabid dadimaw a anak a mahakay ni Merab a pōtot a mabakes ni Saulo. Si Merab, ki baket ni Adriel a pōtot a mahakay ni Barsillay a Meholatita.
9 Inparawat sa ni Dabid dyirad Gibeonita saw. Pinaychadimadiman da sa kan linōdyit da saw bangkay da saw do tokonaw a masngen do pagdaydāyawan di ĀPO. Nayrārayay sa nadiman papitwaw. Diniman da sa do kayan pa no nanōma saw a araw no kapagrarānyi, do kasiknan pa no kapagāpit so sebāda.
10 Do dāwri, nanghap si Rispah a pōtot a mabakes ni Aya so makersang a laylay, kan binolay na paypoktadan na do rakohaw a bato. Nāw na daw a nagbantay a makayapo do kasiknan no kapagrānyi manda do nakapangrogi danaw no ammyan. Inpalōbos naba a sinitsitan sa no manomanok bangkay saw an māraw, kan kanen dan bolaw saw a animal an mahep.
11 Do nakadāmagaw ni Dabid so pinarin naw no minabakes naw ni Saulo a si Rispah,
12 nangay na inhap tohatohang na saw ni Saulo kan iyaw pōtot naw a si Jonatan a yapo dyirad tawotawo saw do Jabes-gilead. (Siraw taga Jabes-gilead saw, ki tinakaw daw bangkay da saw yapo do plasa no Bet-san a panglōdyitan da sira no Pilisteo saw do arawaw a nakadiman da sa Saulo do Gilboa.)
13 Inhap ni Dabid iyaw tohatohang da saw da Saulo kan Jonatan a yapo do Jabes-gilead, kan inakpeh na saw tohatohang daw no papito saw a diniman kan linōdyit dan Gibeonita.
14 Intābon daw tohatohang daw da Saulo kan pōtot naw a si Jonatan do aschipaw a tanem ni āmang ni Saulo a si Kis do Sela do tana no Benhamin. Do nakatayoka daw a namarin so tabo inbilinaw no āryaw, inatbay no Dyos dasal daw a para do tana da.
No Kapachigobat Da Dyirad Pilisteo Saw
(1 Kron. 20:4-8)
15 Minirwa dana a myan gobat dan Pilisteo kan Israel. Minosok si Dabid kan bōyot na saw a machigobat dyirad Pilisteo saw. Do dāwri, taywara nahopag si Dabid.
16 Si Isbi-benob a asa siganti a kapotōtan no Rapa, ki rinanta na dimanen si Dabid. Tombāga iyaw no tobwanaw no chibot na, kan apat a kakīlo iyaw no karahmet na. Myan paw sinohot na bayo a ispāda na.
17 Ki si Abisay a anak ni Seroyas, ki nawara a nangisalākan di Dabid. Kinelbat naw Pilisteowaw kan diniman na. Do dāwri, insapata dan mahahakayaw a rārayay ni Dabid, kan binata da dya a kon da, “Machirayay ka pabanchi a polos dyamen do paggogobatan. Imo, ki akmay soho no Israel, kan chakey namen aba a mawsep.”
18 Do nakatayokan nyaya, myan danaw gobat dyirad Pilisteo do Gob. As do dāwri, si Sibbekay a taga Hosah, ki nangdiman so asa siganti a mayngaran so Sap a kapotōtan no Rapa.
19 Do asa pa a gobat dyirad Pilisteo do Gob, si Elhanan a pōtot ni Jair a taga Betlehem, ki diniman naw kaktehaw ni Golayat a taga Gat. Iyaw paningalanaw no chibot na, ki akmay aho.
20 Do matarek a gobat do Gat, myan daw taywaras karakoh a mahakay. Tayenem kakamay no kāda tanoro kan kokod na, dadwa poho kan apat a tabo. Iya paw asa dyirad kapotōtan no Rapa.
21 Ki do kairoromen naw so Israel, si Jonatan a pōtot ni Simey a kakteh ni Dabid, ki diniman naw rakohaw a mahakay.
22 Siraw nyaya apat, ki kapotōtan sa no Rapa do Gat, kan diniman sa da Dabid kan bōyot na saw.