22
No Kanta ni Dabid a Pagdaydāyaw
(Salmo 18)
1 Nagkanta si Dabid di ĀPO so nya kanta do arawaw a insalākan na iya ni ĀPO dyirad kakamay dan tabo kabōsor na saw kan di Saulo.
2 Nyaw inkanta na:
“Si ĀPO, lāyit ko, kōta ko, kan mangisalākan ko.
3 Dyos ko, ki lāyit ko a pachikāmangan ko,
sarāpa ko, kan olong no kaisalākan ko.
Iyaw kōta ko, kamītan ko, kan mangisalākan ko.
Insalākan mo yaken dyirad maranggas a tawo.
4 Tawagan ko si ĀPO a maikari a maidāyaw,
kan isalākan na yaken dyirad kabōsor ko.
5 “Siraw kelsang no kadiman, pinolipolan da yaken.
Siraw āyos no karārayawan, innamonyitan da yaken.
6 Siraw totolo no tanem, ki binedbed da yaken.
Siraw asdok no kadiman, nakapalka dana sa do salapen ko.
7 “Do pakariribokan ko, nangdakdaw ako di ĀPO.
On, do Dyos ko, intanyis ko.
Yapo do masantwan a timplo na, nadngey naw tīmek ko.
Katanyis ko, romnapit do tadyinya na.
8 “Nadohodohod kan nagin-gined tanaya.
Siraw pondasyon no kahanyihanyitan, ki nagon-gon sa,
kan namirpir sa, ta nakasoli si Āpo Dyos.
9 Ahob, ki minohtot do momodan na.
Mayrārayaw a apoy, pinālob no dangoy na,
kan somdesdeb a inmaya, iyaw pinahtot na.
10 Pininyay naw kahanyihanyitan kan naypabodis.
Masari a demdem do ohbo no tokaran na.
11 Somnakay do parswa a naypanyid kan somnayap.
Insiwet a nachirayay do panyid saw no salawsaw.
12 Pinayparin naw sari a tatalob na a nangdibon sya.
Nachipongos do matokpoh saw a makonem a demdem.
13 Yapo do kasēdanganaw do yanan naw,
naitopak gomilgilap a kimat.
14 Si ĀPO, pinayedey na yapo do hanyit.
Iyaw Dyos a Katotohosan, pinaylilyak naw tīmek naw.
15 Pinaykachimoyan na saw dāwa no bai na a napaychawpit siras kabōsor.
Pinagkimat na, kan binogay na sa.
16 Sinpangan na, napaboya siras ayaman do kensad no tāw.
Siraw pondasyon no tanaya, ki nagparang sa
do nakapaydabdab ni ĀPO,
do kayit no nakapālob na so anges no momodan na.
17 “Yapo do tohos, inalnet na kan inhap na yaken.
Inawon na yaken a yapo do kayitan no tāw.
18 Insalākan na yaken do mabīleg a kabōsor ko
kan siraw mangipsok dyaken,
ta mabilbīleg sa kan yaken.
19 Somnalap sa dyaken do arawaw no didigra ko,
ki si ĀPO, sanggir ko.
20 Inalnet na yaken do marahawa a yanan.
Insalākan na yaken, ta chinasoyot na yaken.
21 “Si ĀPO, nanggon-gona dyaken sigon do kinalinteg ko.
Sigon do kadalos no kakamay ko, binindisyonan na yaken.
22 Ta naybibyay ako do chakeyaw ni ĀPO.
Namarin akwaba so marahet a tomnadyichokod do Dyos ko.
23 Ta tabo sa a linteg na, ki nāw ko a onotan.
Siraw pangeddeng na, dichanan ko saba.
24 Abaw pakapilāwan ko do salapen na,
as inhawa ko tan dyi ako a makagatos.
25 Si ĀPO, nanggon-gona dyaken sigon do kinalinteg ko,
sigon do kadalos ko do kapakaboya na.
26 “Do tawo a mapodno, ipaboya mo kapodno mo.
Do tawo a abos pakapilāwan, ipaboya mo a komwan ka.
27 Do tawo a masantwan, ipaboya mo kasanto mo,
ki do tawo a madyīdo, ipaboya mo kasiglat mo.
28 Mangisalākan ka siras mapakombaba a tawotawo,
ki mangasday ka siras mapangas so kapanyideb.
29 Imo soho ko mo ĀPO.
Si ĀPO, mangranyag so sari a omdibon dyaken.
30 Do sidong mo, maparin ko a daropen asa bōyot no kabōsor,
kan do sidong no Dyos ko, makakayat ako so ahad no syodad.
31 “Iyaw nya Dyos, aba polos so pakapilāwan do kaparin na,
as no chirin ni ĀPO, ki mapaneknekan a oyod.
Iya, ki sarāpa dan tabo a machikāmang dya.
32 Ta sino paro si Āpo Dyos, an dya si ĀPO?
Sino paro iyaw Lāyit, an dya iyaw Dyos namen?
33 Si Āpo Dyos, ki iyaw mahnyi a pachikamītan ko,
kan pinakaro na saw balat do ayaman ko.
34 Pinayparin naw kokod ko a makalsit a akmay kokod no ogsa,
kan pinaytēnek na yaken do matohos saw a yanan a dya maan-ano.
35 Sanayen na saw tanoro ko a para do gobat,
tan makaipalka saw tachay ko so bronsi a dāwa no bai.
36 O ĀPO, maitoroh mo dyaken sarāpa no kapangisalākan mo.
Iyaw sidong mo, mapatohos dyaken.
37 Pinarahawa mo ayaman ko,
tan dya matalyad kokod ko.
38 “Linakatan ko saw kabōsor ko, kan diniman ko sa.
Somnabat akwaba mandad nakarārayaw da.
39 Hinomis ko sa tan dyi dana sa makapaybangon.
Nalba sa do tokapan ko.
40 Ta imo nangarmas dyaken so kayit a para do gobat.
Pinagrōkob mo saw nagsōkir dyaken do lasagan ko.
41 Pinayyayo mo saw kabōsor ko a komaro dyaken,
kan siraw nangipsok dyaken, rinārayaw ko sa.
42 Tomnanyis sa a nangdaw so sidong, ki abaw mangisalākan sira.
Tinanyisan da si ĀPO, ki inatbay na saba.
43 Linebbek ko sa akmay ahbek no tanaya.
Hinomek kan tinokatokapan ko sa akmay hota do kalkalsāda.
44 “Insalākan mo yaken dyirad ribīldi a tawotawo.
Kinapya mo yaken a pangōlo dan nasnasyon
dyirad tawotawo a dyi ko a chapatak a magsīrbi dyaken.
45 Mangay a magrōkob saw gan-ganaet dyaken a sibabakel.
Apāman a madngey daw maynamot dyaken, tongpalen da yaken.
46 On, siraw gan-ganaet, nabo tored da,
kan mohtot sa a maychamirpirpir a yapo do pagkamītan da saw a gwardyado.
47 “Mabyay si ĀPO! Maidāyaw pakono lāyit ko!
Mapatohos pakono si Āpo Dyos a iyaw lāyit a mangisalākan ko.
48 Iyaw Dyos a mamahes para dyaken,
kan abāken na saw nasnasyon a magrōkob do lasagan ko.
49 Imo mangisalākan dyaken dyirad kabōsor ko.
On, pinatohos mo yaken dyirad nagribīldi dyaken.
Insalākan mo yaken do tawotawo a mararanggas.
50 Dawa, magdāyaw ako dyimo dyirad nasnasyon mo ĀPO,
kan kantaen ko saw kanta a pagdāyaw so ngaran mo.
51 “Manoroh si Āpo Dyos so mabibīleg a ballīgi do āri na,
kan ipaboya naw dya mabdibdis a kadaw do pinidi na.
On, di Dabid kan siraw kapotōtan na a abos pandan.”