9
Si Dabid kan Mepiboset
1 Do asa karaw, inyahes ni Dabid a kāna, “Ari pawriw natokos do pamilya naya ni Saulo a maparin ko a pangipaboyan so kapangipateg ko di Jonatan?”
2 Do dāwri, myan asa a pachirawatan do pamilya ni Saulo a mayngaran so Siba, as inpatawag da a mapaboya di Dabid. Binata no āryaw dya a kāna, “Imori si Siba?”
“On mo āri, yaken a pachirawatan mo,” initbay na.
3 Inyahes dya no āryaw a kāna, “Ari pawriw natokos do pamilya naya ni Saulo a maparin ko a pangipaboyan so kapangipateg no Dyos?”
Inatbay ni Siba iyaw āryaw a kāna, “Na, ari paw pōtot ni Jonatan. Iyaw napidayan naw so dadwa a kokod.”
4 “Dino yanan na?” inyahes no āryaw.
Inatbay ni Siba a kāna, “Myanaw dwa bahay ni Makir a pōtot ni Ammyel do Lo-debar.”
5 Dawa, nanoboy si Dabid, kan yangay da inhap do bahay ni Makir a pōtot ni Ammyel.
6 Do nakawaraw ni Mepiboset a pōtot ni Jonatan a apoko ni Saulo do yanan ni Dabid, nagrōkob do tana a pangipaboya so kadāyaw na sya.
“Anak Mepiboset!” kāna ni Dabid.
“On mo āri, yaken a pachirawatan mo,” inatbay na.
7 Binata ni Dabid dya a kāna, “Mamo kaba, ta syirto a ipaboya konchi dyimo kapangipateg ko a maynamot di āmang mo a si Jonatan. Pabidihen konchi dyimo tabo tana a dyira ni āpong mo a si Saulo, kan pirmi kanchi a machihanghang dyaken do lamisaan ko.”
8 Nagrōkob dana si Mepiboset kan binata na a kāna, “Sino ako a pachirawatan mo a pangipaboyan mos kapangipateg mo do abo danayas sīrbi a akmay nadiman a chito?”
9 Sinpangan na, inpatawag no āryaw si Siba a pachirawatan ni Saulo, kan binata na dya a kāna, “No tābo a dyira ni Saulo kan pamilya na, ki intoroh ko nad apoko naw no āmo mwaw.
10 Imo kan siraw no pōtot mo saw kan siraw no adīpen mo saw iyaw manghakaw so tana a para dya kan apīten nyo saw asi da tan myan mākan no apoko nayan āmo nyo. Ki si Mepiboset, iyaw apoko nayan āmo mo, ki pirmi a machihanghang dyaken do lamisaan ko.” (Myan asa poho kan dadima pōtot a mahahakay ni Siba kan dadwa a poho a adīpen na.)
11 Do dāwri, initbay ni Siba do āryaw a kāna, “Parinen ko a pachirawatan mo an āngo imandar mom āpo a āri ko.” Dawa, nachihanghang si Mepiboset di Dabid do lamisaan naw a akma dyirad pōtot saw no āri.
12 Si Mepiboset, ki myan pōtot na a barīto a mayngaran so Mika. As tabo minyanaw do bahay ni Siba, ki nayparin sa a pachirawatan ni Mepiboset.
13 Minyan si Mepiboset do Jerosalem, ta pirmi a nachihanghang do lamisaanaw no āri. Iya, ki napidayan so dadwa kokod.