☰ Salmo 119
119
No Chirin no Dios do viay ta
1 Mapalak sa o abo so kaparoparoan a viay, sira o omonot do panyokoyokoran sa no Dios. 2 Mapalak sa o mapasivog sia pawyoren a onotan o chirin aya no Dios, 3 ta sira o matalineng so viay a omonot do kahohoan nira no Dios. 4 Tinoroh mo diamen, O Dios, o nanawo mo as kayokoyokod mo niamen a omonot dia so kapiahen. 5 As oyod a rakoh o kakey ko a omonot dia a fermi! 6 Ta an kapiahen ko sa ya onotan atavo am arava anti o kaparoan kano pakasnekan ko. 7 Do kapaypangay no kaintindian ko so mahosto a panyokoyokoran mo am dadayen koymo no manamonamo a tawol ko. 8 Tayto rakoh o kakey ko a omonot do nanawo mo sa dawa kanonolay moava yaken do pakagatosan.
No kapanganohed do nanawo sa no Dios
9 Maypango o kavidin na a manamonamo no viay no asa ka kanakan a mahakay. No mavoyvoh a ichaparin na am no kawnot na dia o chirin mo. 10 Parinyen ko o panda no maparin ko a komitachita dimo dawa sidongen mo pa yaken a di mapasada so panyokoyokoran mo sa. 11 Payvividien ko a aktoktohen o chirin mo tapian di ako a makagatos a machisada do piahen mo. 12 Dadayen koymo a Dios. Nanawhen mo yaken do ichahoho mo a kaparin no viay ko. 13 Ipapanmo ko na o atavo a chirin mo. 14 Rakorakoh o kasoyosoyotan ko a omonot do chirin mo kano kayan no rakoh a kaynakman ko. 15 Pachinanawan ko sa o panyokoyokoran mo as kapakapia ko a komtokto sia o pananawan mo. 16 Rakoh o kasoyosoyot ko a yamot do nanawo mo saya dawa kawayakan ko sava anti ya.
No kasoyosoyotan do kawnot do nanawo sa no Dios
17 Bendisionan mo yaken a asa ka pachirawatan mo tapian maviay ako a manganohed do nanawo mo sa. 18 Iwangan mo o pangtoktoan ko tapian maintindi ko o makakniknin sa a nanawo do nakatolas aya a Chirin mo. 19 Tod ako a manahan do tana aya as dawa ipapanmo mo sa diaken o nanawo mo saya tapian niaya o ompawnot diaken do pangwanan koaya. 20 Rakoh o kawaw no tawol ko a makapanmo so ichahoho mo sa do atavo a tiempo. 21 Sobnahen mo sa o maato so iyangay as mavay sa o mapasada so panyokoyokoran mo. 22 Librien mo yaken dira do omtek kano ominsolto diaken takwan onotan ko sa o panyokoyokoran mo. 23 As aran kontrahen da yaken no manyokoyokod sa am ichabdibdis ava no kavidin ko a komtokto nia o nanawo mo saya. 24 Takwan no nanawo mo saya o kasoyosoyotan ko kano tomoroh so konseho diaken.
No kapasivog so kapanganohed do panyokoyokoran no Dios
25 Yavayohen mo o ayet kano angdet ko a akma so nipromisa mo, ta madispresio ako. 26 Nivahey ko dimo o ichalijalijat ko sa as nidngey mo yaken. Sichangoriaw am nanawhen mo yaken do ichahoho mo a kaparin no viay ko. 27 Sidongen mo yaken a makaintindi so chirin mo tapian pachinanawan ko o makakniknin saya a nanawo mo. 28 Maychakahakaha ako a makayamot do rakoh a kangsah ko dawa pagsagsalen mo yaken a akma so nipromisa mo. 29 Pavawahen mo yaken do kapaydaday. Ichasi mo yaken as kapawnot mo diaken no nanawo mo takwan imo o somnivog a pakayapoan no mapia. 30 Chinita ko o nanawo mo takwan pinasivog ko na do aktokto ko o kapanganohed ko dimo. 31 As makayamot ta onotan ko o nanawo mo sa am pavawahen mo yaken do pakasnekan. 32 Pawyoren ko sa a onotan o panyokoyokoran mo takwan nilibri mo yaken do kavahoran ko.
No kapangdaw so mapia a kapanmoan so mayanong
33 Nanawhen mo yaken, O Dios, a makaintindi so nanawo mo sa tapian kawnotan ko sa do atavo a tiempo. 34 Pasehdangen mo sa o nanawo mo sa diaken ta pawyoren ko sa anti ya onotan. 35 Parinyen mo yaken a fermi a manganohed dimo ta niaya o yanan no kasoyosoyotan ko. 36 Sidongen mo yaken a komita so kapanganohed ko do vatahen mo as kapavawa mo diaken do kapayagom. 37 Pavawahen mo yaken do kasanga ko no abo sa so sinmo as akma so mian do promisa mo am payavayohen mo o ayet ko a omonot dimo. 38 Patongtongen mo sa o promisa mo diaken a pachirawatan mo ta mian o promisa mo dira do manganohed dimo. 39 Pavawahen mo yaken do pakasnekan ko. So pakakniknin no mahosto a nanawo mo. 40 Oyod ko sa a ichahoho a onotan o panyokoyokoran mo. Yavayohen mo o viay ko takwan mahosto ka.
No kasaray no Chirin no Dios
41 Ipavoya mo diaken, O Dios, o di aya a machipanda a addaw mo niaken as kalibri mo diaken takwan promisa mo ya, 42 tapian maparin ko sa anti a atbayen o omtek saya niaken takwan ichasaray ko o chirin mo. 43 Sidongen mo yaken a mapavata so kakawyoran do atavo a tiempo takwan no mahosto a nanawo mo o yanan no panapanayahen ko. 44 Mabdibdis ava anti o kapanganohed ko do panyokoyokoran mo sa. 45 Maviay ako a abo so omvahod diaken a gatos takwan chitahen ko a onotan o nanawo mo sa. 46 Parapiten ko anti dira do patopatol o nanawo mo sa a dia machisnek nia, 47 takwan nawri o kasoyosoyotan ko o kapanganohed ko do nanawo mo sa ta oyod ko saya ichakey. 48 Sincharan kano aniven ko sa o panyokoyokoran mo. Niaya pa sa o payvividien ko do aktokto ko a fermi.
Kasoyosoyotan do promisa sa no Dios
49 Kanakmen mo sa o promisa mo diaken a pachirawatan mo, ta niaya o yanan no panapanayahen ko. 50 No promisa mo saya o tomoroh diaken so kasoyosoyotan kano angdet an mian o pakasisian kano pandidiwan ko. 51 Itek da yaken no maato aya so iyangay a tawo amna tadichokoran koava o nanawo mo sa, 52 ta an naknakmen ko sa o mahosto a pinarin mo kaychowa mo Apo kano vinata mo sa am omyavayo o soyot kano angdet ko. 53 An mavoya ko o pasadahen da sa a panyokoyokoran mo am rakoh o kaket ko nia. 54 As do aran dino a angayan ko am nawri sa o pakantahen ko o nanawo mo sa. 55 An mahep am imo, O Dios, o mian do aktokto ko as kano nanawo mo, 56 takwan no kasoyosoyotan ko am no kapanganohed ko do panyokoyokoran mo sa.
No addaw do nanawo saya no Dios
57 Apo ko a Dios, imo o atavo a mian do viay ko dawa promisa ko o kapanganohed ko do chirin mo. 58 Tayto ako a machipangdaw dimo do kasi mo niaken a akma so promisa mo! 59 Niktokto ko na so kapiahen an ango o kaparin no viay ko as dawa disidido ako na a omonot do panyokoyokoran mo sa. 60 Paronoronen koava ta nyeng ko na sa a onotan o nanawo mo. 61 Aran ahapen da yaken a atetekan no makagatogatosen am alit no kadi ko sia kawayakan o nanawo mo. 62 Do avak no ahep am mayokay ako a omdaday kano mamahemahes dimo a makayamot do mahosto a panyokoyokoran mo. 63 Kayvan da yaken no atavo a mayserbi dimo a sira o omonot do panyokoyokoran mo. 64 Mapno mo Apo o tana aya no kavoyan sia o kadi na mabdibdisan no addaw mo. Dawa nanawhen mo pa yaken do atavo a panyokoyokoran mo.
No rakoh a inmonmoan no nanawo no Dios
65 Pinatongtong mo o promisa mo diaken mo Apo. Ay so kapia mo diaken a asa ka pachirawatan mo. 66 Torohan mo pa yaken so kasolivan kano mapia a kapanmoan so atavo takwan no nanawo mo o anohdan ko. 67 Manam so nakadisiplina mo diaken mo Apo am fermi ako a somada amna sichangoriaw am fermi ako na manganohed do chirin mo. 68 Ay so kapia mo kano mapia o atavo a parinyen mo! As dawa nanawhen mo pa yaken do ichahoho mo a kaparin no viay ko. 69 Parahten da yaken no maato so iyangay no aro a daday da a komapet diaken amna ichabdibdis ava ya no kapanganohed ko do yokoyokoran mo niaken. 70 No akma saya sia tawo am arava o kapanmoan da so mapia amna an do diaken dana am nawri o yanan no soyot ko o nanawo mo. 71 No tinoroh mo a disiplina diaken am oyod ko chinapia, ta nawri o minnanawo nia diaken o ichahoho moaya a onotan ko. 72 Maparin koava paswaden o chirin moaya do aran no atavo a kartos do mondo aya.
No kahosto no nanawo saya no Dios
73 Imo o minamaog kano machonong diaken. Dawa torohan mo yaken so kasolivan tapian maintindi ko sa o nanawo mo. 74 Masoyot sa anti o makasinchad dimo an mavoya da yaken takwan ichasaray ko sa o promisa mo sa. 75 Sincharan ko o kahosto no parinyen mo sa, O Dios, ta nidisiplina mo yaken do addaw mo. 76 Dawa akdawen ko o kapagsagsal mo diaken no di aya mabdibdis a addaw mo a nia so promisa mo diaken a asa ka pachirawatan mo. 77 Ichasi mo yaken tapian maviay ako takwan no nanawo mo sa o kasoyosoyotan ko. 78 Parinyen mo sa a mapasnek o maato saya so iyangay a maparaherahet diaken, amna an do diaken dana am no nanawo mo sa o fermi ko a pangayen do aktokto ko. 79 Parinyen mo o kangay da diaken no sominchad as omanib dimo, sira o makapanmo so nanawo mo. 80 Parinyen mo o kawnot ko so hosto do nanawo mo tapian abo o pakasnekan kano kahomisan ko.
No dasal a mangahes so kalibrian
81 Madispresio ako do kapanapanaya ko so kalibri mo diaken amna tayto ko ichasaray o chirin mo. 82 Nayendes ako na mananaya so promisa moaya. Dawa iyahes ko dimo an mango dana o kapagsal mo diaken no sidong moaya. 83 Akmay ara pava o karisibian diaken pero kawayakan ko sava o nanawo mo. 84 Ara paro pa a mayendes o kapananaya ko? An mango dana o kapamahes mo niaken dira do omatetek aya diaken. 85 Ta sira o maato so iyangay a komontra diaken am akma darana say naykadi so pagagtosan da diaken. 86 Tayto da yaken a parahten, dawa sidongen mo pa yaken, ta kakawyoran sa o nanawo mo. 87 Kolang darana yaken a dimanen amna kayan pa no kawnot ko do nanawo mo sa. 88 Dawa makayamot do di aya machipanda a addaw mo am librien mo pa o viay ko tapian mavidin ko sa onotan o nanawo mo.
No kasaray no chirin no Dios
89 No chirin mo, O Dios am mabdibdis ava a manda anchowa as arava o pamandan na. 90 Maynyoha ava o chirin mo ta patongtongen mo sa o promisa mo dira do atavo a henerasion. Imo o minpangay so tana do yanan na as nabdis pava. 91 Makayamot do mando mo am tayto pa sa mayonong do yanan da o inamaog mo sa. Imo o maynolay dira atavo. 92 An abo o chirin moaya a tomoroh diaken so soyot kano angdet am tarek ako a nadiman dana do pandidiwan ko sa. 93 Dawa pasadahen ko sava anti o nanawo mo saya ta nia o minpayavayo so viay ko as kano ayet ko. 94 Dira mo na yaken as dawa librien mo yaken, ta tayto ko parinyen o ichakey mo diaken. 95 Aran mian sa o komontra diaken a tomayayan diaken a dimanen amna mamo akoava ta mavidin ko a naknakmen o chirin mo. 96 Chinaproyban ko na o kabo no tawo a mahosto do atavo amna no chirin moaya am entero am maynyoha ava.
No addaw nia no chirin no Dios
97 Oyod ko a ichaddaw o chirin mo as niaya o fermi ko a pangayen do aktokto ko. 98 No nanawo mo sa am akma ko say kayvan a fermi a machirayay diaken. Nia o omparin diaken a masolisolib kanira no komontra diaken. 99 Rakorakoh o kasolivan ko kanira no omnanawo diaken takwan fermi ko sa pangayen do aktokto ko o nanawo mo. 100 Rakorakoh pa o kasolivan ko kanira no kamangalkeman a makayamot do kawnot ko do nanawo mo sa. 101 Pachivawan ko o atavo a pakagatosan a makayamot do kakey ko a omonot do chirin mo. 102 Minhes akoava omonot do nanawo mo takwan imo mismo o minnanawo diaken. 103 Oyod a mawnawnas o nanawo mo saya diaken. Mapipia pa o taham na kano asokar. 104 No chirin mo o tomoroh diaken so maypangay a kasolivan, dawa ipsok ko o atavo a marahet.
No sehdang a yapo do chirin no Dios
105 No chirin mo am relaken do panahanan ko as sehdang a ompawnot diaken. 106 Dawa patongtongen ko o nipromisa ko dimo a kapanganohed ko do mahosto a chirin mo. 107 Oyod a rakoh o pandidiwan ko sa. Payavayohen mo o ayet ko akma so promisa mo. 108 Rawaten mo o kapamahemahes ko dimo as kananawo mo diaken do atavo a ichakey mo. 109 Aran fermi do kadelikadoan o viay ko am chinawayakan ko pava o chirin mo. 110 As aran chitahen da yaken a rarayawen no marahet so chintokto a tawo am mavidin ako a manganohed dimo. 111 No chirin moaya a diabdibdis o kaynakman ko kano kasoyosoyotan ko, 112 dawa pinasivog ko na do aktokto ko o kawnot ko do atavo a nanawo mo a manda do kadiman ko.
No kasigoradoan a itoroh no chirin aya no Dios
113 Ichakohat ko sa o maychadadwa so pangtoktoan do komwan do kawnot dimo asna an do diaken dana am masigorado ko o kapanganohed ko dimo, ta oyod ko a ichaddaw o nanawo mo sa. 114 Imo o omonong kano omdefende diaken as ichasaray ko sa o promisa mo. 115 Machivawa kamo diaken a makagatogatosen, ta mapabhes nioava yaken a manganohed do nanawo sa no Dios. 116 Torohan mo yaken so ayet akma so nipromisa mo tapian mavidin ako pa a maviay. Dispresiohen moava yaken do panapanayahen ko saya. 117 Panghomisen mo yaken do atavo a omhawahaway diaken tapian mavidin ko sa onotan o vatahen mo. 118 Sobnahen mo sa, O Dios, o di sa manganohed do panyokoyokoran mo. Arava o inakyan da no plano da sa marahet. 119 Baloran mo sava o makagatogatosen a tawo dawa ichaddaw ko o nanawo mo. 120 Ichamo ko o kasoli mo as kapayvavakel ko a makayamot do maistrikto a panyokoyokoran mo.
No kapanganohed do nanawo no Dios
121 Paynolayen moava yaken dira do komontra diaken ta tayto ko parinyen o mayanong kano mapia. 122 Pasigoradohen mo pa diaken o kasidong kano kabendision mo diaken. Piahen mo sava a ompakasiasi diaken o maato so iyangay. 123 Nayendes ako na a mananaya so sidong mo as kano kalibri mo diaken a akma so nipromisa mo. 124 Parinyen mo diaken o piahen mo a rakoh so kasisien as kavidin mo diaken a nanawhen. 125 Pachirawatan mo yaken as dawa torohan mo yaken so kasolivan a makaintindi sia o ichahoho mo diaken. 126 Tiempo dana no kapangastigo mo takwan manghavas dana o kapasada da so panyokoyokoran mo sa. 127 Ichaddaw ko sa o nanawo mo so manghavas pa kano kaddaw ko no vohawan. 128 Dawa onotan ko sa atavo o panyokoyokoran mo, ta ipsok ko o marahet.
No soyot a manganohed do nanawo no Dios
129 Machitatarek a mapia o nanawo mo dawa pawyoren ko saya onotan. 130 Do kapapanmo mo no chirin moaya am tomoroh so sehdang as kano kasolivan dira do dekey so pinachinanawan. 131 Makayamot do kainteresado ko no nanawo mo sa am mavidin ako a akmay mawaw. 132 Isanga mo yaken as kasi mo niaken akma so parinyen mo dira do maddaw nimo. 133 Pavawahen mo yaken do kadodogan ko a akma so nipromisa mo as katoroh mo pa sia diaken o kapanghomis ko do marahet. 134 Librien mo yaken do atavo saya a ompakasiasi diaken tapian maparin koymo a anohdan. 135 Ipavoya mo pa diaken o addaw kano kasisien mo as kananawo mo pa sia diaken o ichahoho mo. 136 Omoyog o hoo ko a makayamot dira do maskeh a omonot do nanawo mo.
No kahosto no nanawo saya no Dios
137 Apo a Dios, mahosto ka as dawa mahosto pa o nanawo mo saya. 138 No panyokoyokoran mo sa am maytavo sa a mahosto kan oyod a mapia a panadngan. 139 Oyod ako a maket takwan sira o komontra aya diaken am pasadahen da o panyokoyokoran mo. 140 Chinaproyban ko na sa o promisa mo as dawa oyod ko sa ichaddaw. 141 Aran maparo ako as kahbo no kasincharan diaken am mavidin ako a omonot do chirin mo, 142 takwan no kahosto mo am mabdibdis ava as no nanawo mo sa am kakawyoran atavo. 143 No promisa mo saya o tomoroh diaken so kasoyosoyotan an aro o problema ko kano an madispresio ako. 144 Dawa sidongen mo yaken a makapanmo so nanawo mo saya tapian katahaman ko do viay ko o somnivog a pakamian a itoroh mo.
No kapangdaw so kalibrian do komontra sa diaten
145 Tayto ko pawyoren o katawatawag ko dimo do kasidong mo diaken. Adngeyen mo yaken tapian anohdan ko sa o nanawo mo saya. 146 Tomawatawag ako dimo do kalibri mo diaken tapian onotan ko o vatahen mo sa. 147 Mayehep ako a tomawatawag dimo do kasidong mo diaken, ta no nipromisa mo o panapanayahen ko. 148 Mayramway ako a omnakenakem so nanawo mo sa. 149 Makayamot do di aya mabdibdis a addaw kano kasisien mo am adngedngeyen mo yaken, O Dios. Makayamot do promisa mo am payavayohen mo o viay ko. 150 Ta maypasngen sa o malolotod saya a ompakasiasi diaken, sira o dia manganohed dimo. 151 Mamo akoava takwan masngen ka diaken as kapanmo ko sia o kadi da maynyohan no promisa mo. 152 Arava o kabdibdisan no nanawo mo sa. Napanmo ko sa ya do nayendes dana a tiempo.
No kapachisiasi a mangahes so sidong
153 Sikasohen mo yaken do pandidiwan ko as kalibri mo diaken ta kanonolay koava o nanawo mo sa. 154 Ipachidiman mo yaken as kalibri mo diaken. Makayamot do promisa mo am payavayohen mo o viay ko. 155 Makalibri sava anti o makagatogatosen takwan tadichokoran da o panyokoyokoran mo. 156 Pero oyod a rakoh o kasisien mo dawa yavayohen mo o viay ko a akma so nipromisa mo. 157 Oyod sa aro o komontra as kan ompakasiasi diaken amna ibhes ko sava onotan o nanawo mo. 158 An titiban ko sa o traydor sa a di manganohed dimo am oyod ko sa ipsok. 159 Tiban mo o kaoyod ko a maddaw no nanawo mo sa mo Apo. Payavayohen mo o ayet ko no abo aya so pandan a addaw mo. 160 Atavo a vatahen mo sa am kakawyoran as no nanawo mo sa am mahosto as arava o pandan na.
No rakoh a kasinchad do nanawo saya no Dios
161 Sira o maato a tawo am pakasisien da yaken aran abo o gatos ko amna voyvoh o chirin mo o sincharan ko. 162 Oyod ako a masoyot a makayamot do promisa mo sa as no kasoyot ko am akma so kasoyot no asa ka tawo a nakavoya so vohawan anmana kaynakman. 163 Atavo a daday am oyod ko ipsok asna no nanawo mo am oyod ko a ichaddaw. 164 Do asa karaw am maypapito o kapamahemahes ko dimo do kapia kano kahosto no nanawo mo saya. 165 Sira o manganohed dimo kano omonot do nanawo mo am mian o kaydamnayan no aktokto da as arava o kadodogan da. 166 Panapanayahen ko o kalibri mo diaken do ompakasiasi diaken as kavidin ko sia a parinyen o panyokoyokoran mo. 167 Onotan ko sa o nanawo mo as oyod ko saya ichaddaw. 168 Kapiahen ko sa onotan o nanawo kano panyokoyokoran mo as ari mo mapanmo o atavo a parinyen ko.
Dasal a mangahes so sidong
169 Adngeyen mo o itanyitanyis ko dimo as katoroh mo pa diaken so kasolivan akma so nipromisa mo. 170 Adngeyen mo o dasal ko as kasidong mo diaken a akma so promisa mo. 171 Fermi ko anti mo a dadayen a makayamot do katayto mo omnanawo diaken so inolay mo. 172 Kantahen ko anti o pakaknikninan no panyokoyokoran mo takwan mapia kano mahosto sa. 173 Fermi ka handa a somidong diaken takwan anohdan koymo. 174 Panapanayahen ko o kalibri mo diaken mo Apo, ta no promisa mo sa o tomoroh diaken so kasoyosoyotan. 175 Torohan mo yaken so viay tapian dadayen koymo. No nanawo mo o akdawen ko dimo a somidong diaken. 176 Nayparayi ako dimo akmay asa ka karnero a nabo dawa pirwahen mo yaken a paypasngenen dimo a asa ka pachirawatan mo, ta ara koava a tinadichokoran o nanawo mo saya.
☰