63
No kachitachita so Dios
Salmo ni David.
1 O Dios, imo o Dios ko. Imo o fermi ko a chitahen. Mawaw ako nimo a akma so kaparin no nakolay a tana do kabo no timoy, ta imo o chitahen ko no atavo a mian diaken.
2 Chitahen koymo do vahay mo a dawri so kavoyan ko so makakniknin a ipakapamarin mo.
3 No di aya mabdibdis a addaw mo o mapipia pa kano viay, dawa dadayen koymo.
4 Mintras maviay ako am imo o pamahmahsan ko. Pamatohen ko o tanoro ko a tomawatawag dimo.
5 Parinyen mo anti yaken a makamia a akmay namista dawa makakanta ako so makasoyosoyot a kanta do ngaran mo.
6 An mian ako na do pakaychehan ko am manakem koymo as do mayramway am imo o mian do aktokto ko,
7 takwan imo o fermi a somidong diaken. Makakanta ako no soyot ko, ta akma koy fermi a mian do sirong no panid mo.
8 Imo o panaptan ko as fermi mo yaken a pondanan.
9 Sira o makey a omdiman diaken am sira o magagtos do yanan da no nadiman.
10 Madiman sa anti ya do arap as no karakohan da am kanen da no volaw a chito.
11 Makayamot do kapanghomis sia no Dios o patol am oyod sia anti a masoyot, ta sira o mapatongtong so promisa da do Dios am dadayen da sia amna sira o omrarayaw so promisa da am pabhesen sa anti a mayliliak.