11
Zofa ebo iya Jiobu
1 Tọbudu iya bụ; Zofa,
bụ onye Nama bya eyee ọnu sụ:
2 Ikpoto opfu ọwa-a a-lakọta
kẹ mmanụ
g'e te eye iya ọnu tọo?
?Aa-harụ onye ọwa-a,
epfu opfu igwerigwe-a
enge tọo?
3 Tụkpo-tụkpo-tụkpo ono,
iipfu ono;
?ọo-kpọ nemadzụ opfu
tọo?
?Tọo ọ bụ i -mecha ndiphe
sukusuku ono,
iime phẹ onoya;
ọ tọ dụdu onye agbọru ngu
ụja tọo?
4 Kẹle ị sụru l'iphe, iipfu geru
asa;
bya asụkwapho l'ị dụebe
ree l'ẹnya Chileke.
5 Ọle ọ bụ; ọ dụ mu g'a sụ
lẹ Chileke e-ye ọnu
l'onwiya;
mbụ saa ọnu pfuru opfu
nụ ngu;
6 mbụ kpuhaa iphe,
pharu lẹ mmamiphe woru
gheberu ngu ọnu;
kẹle ọkpobe mmamiphe
adụje mkpopfu mkpopfu.
Ọphu ịi-makpọadaru;
Jiobu; bụ l'iphe, Chileke eme
ngu ta ahakpọkwanu
g'ẹjo-iphe, i megbabẹru.
7 ?Ịi-dụ ike chọkpoepho
chọfuta iphe, dụ omilomi,
nọ l'ime Chileke?
?Ịi-dụ ike vọkpoepho
vọfuta ẹka
Ọkalibe-kangokọtaru-nụ
jeberu?
8 Ọ kakwa akpaminigwe
ephekerephe.
?Ịi-mekwanụ iya ime-agha
nta-a?
Ọ dụkwapho omilomi ka
alị-maa omilomi;
?bụ gụnu bẹ ịi-dụ ike maru?
9 Ogologo bẹ ọ ka mgboko-a
l'ophu ogologo.
Tẹme ọsa iya ka eze-ẹnyimu
phosa phosa.
10 Ọ -bya nta-a;
bya akpụta ngu tụ-chia;
bya ekua ngu ikpe;
?bụ onye sụru iya akpọshi?
11 Ọphu e-do ngu ẹnya ree
bụ l'ọ makọtaru ndu
ẹregede.
Tọo teke o hụmaru ẹjo-iphe;
?ọ dụ ngu g'ọ tọo tụbejedu
iya nvọ?
12 Tọ bụchidaa iphe,
ọ bụ bụ lẹ tẹme onye-eswe
enweru egomunggo
bụ mẹ nkapfụ-ịgara-ọswa
nwụa nwata-okoro.
13 “Ọle ọ bụ; i -wowaru ọkpoma
ngu doziaru Chileke
bya amachịaru iya ẹka labọ;
14 bya atụko iphe-ẹji, dụ ngu
l'ẹka hakọta ememe;
ọphu i kwedu g'ọ dụru
ẹjo-iphe, a-dụ l'ibe ngu;
15 noo teke ịi-pali iphu
ephekerephe;
iphere ta adụedu ngu.
L'ị pfụru kẹ kwaragadagangu;
ndzụ ta agụedu ngu.
16 Noo teke ịi-tụko iphe-ẹhuka
ngu zọha-gbua.
L'ọ dụ ngu g'ẹgube-a, utso
agbajẹchaa l'o kpofua.
17 Ndzụ ngu abya egbuchafụ
bya aka echi eswe agụ
ìphóró.
Ọchii abya agụsahuru ngu
dụepho g'ẹka nchi abọhu
abọhu.
18 L'ị kpọo g'abara; kẹle ọ
dụru iphe, iile ẹnya iya.
L'i leaha ẹnya mgburugburu;
atụtakporo nwunme, ịituta;
ọ tọ dụdu iphe,
byaru eme ngu nụ.
19 L'ị zẹe azẹe; ọ tọ dụdu onye
byaru eye ngu ebvu.
L'a dụ igwerigwe byaahaa
g'i yeru phẹ ẹka.
20 Obenu l'ẹnya e-mechakwaa
pyashịhu ndu ẹjo-iphe.
Ẹphe a-chọ ụzo agbala;
ọ tọo dụduru phẹ.
Iphe, ẹphe a-nọdu ele ẹnya
iya abụru atụ-buhu unme.”