12
Ọnu, Jiobu eyeru Zofa
1 Tọbudu iya bụ; Jiobu bya
eyeeru iya ọnu sụ:
2 A taa tụdu iya atụtu;
ọo unu bụ o-pfuchaa-ọ-bvụ.
Ọ bụru unu lẹ mmamiphe
a-swị laa.
3 Ọle egomunggo dụkwa mu-a
g'ọ dụ unubẹdua.
Ọ tọ dụkwa ẹka ẹnya lwawaru
mu l'ẹka unu nọ.
?Bụ onye ta makọtadu
iphemiphe ono g'ọ ha?
4 Nta-a bẹ mu bụwaa iphe,
ezi ndu mu l'ẹphe eshi
ọ̀nyà ọnu-ọchi;
l'ẹka mu shikwa ekuje
Chileke oku;
l'ọ nụma olu mu.
Mu bya abụwaru nụ onye
aachị pfụripfuri
lẹ mụbe onye pfụberekoto
bya abụru onye iswi
dụ mma.
5 Ndu ẹhu dụ guu emeje ndu
iphe-ẹhuka byapfutaru
sukusuku; sụ l'ọo ẹpho
onye ẹpurukutu chikọtaru
abya atụ l'alị bẹ ọobya-pfutajẹ.
6 Ọle ndu abalidebvu bukwa
ntụsarehu;
ọphu ọ dụkwa onye asụje
ndu ono sụu,
bụ ndu anọduje akpatsu
Chileke iwe;
mbụ ndu Chileke phẹ bụ
l'ọbochi-ẹka phẹ bẹ ọ nọ.
7 Obenu lẹ-a; unu je ajịa anụ;
ẹphe a-kọru-a unu iphe,
mu abya epfupfu-a.
Ọdumeka unu ajịa ya ẹnu,
ephe l'eli; ẹphe a-kọru
iya unu.
8 Teke ọ dụdu unu abọoru ụja
yeru alị g'o zia unu iphe.
Ọzoo unu angabẹ nchị g'ẹma,
nọ lẹ mini zia unu iphe.
9 ?Bụ onye ole lẹ ndu ono,
mu gụshiru ono ta amadụ
l'ọo Chipfu gude ẹka iya mee
iphe-a, meru nụ-a?
10 Ọo Chileke bẹ ndzụ
iphemiphe,
e meru dobe nọkota l'ẹka.
Ọ bụru l'ẹka iya bẹ unme,
onyemonye atụ nọ.
11 Nchị ?te egejedu iphe,
ọ nụmaru egege tọo;
mbụ ẹgube ono,
ire edejeada l'iphe, ọnu
e-ri ono?
12 ?Mmamiphe ta abụdu l'ẹka
aahụmaje iya
bụ l'ẹhu ndu kahụwaru nụ?
?Tọbudu onye karụ nka
ogologo bẹ iphe edoje
ẹnya ree?
13 Ọo Chileke nwe mmamiphe;
bya enweru ike.
Ìdzù yẹe nkwamẹnya
bụkwarupho nkiya.
14 Iphe, ọ lashịru alashị bẹ ọ tọ
dụkwa onye sụru iya
ekpukwa; ọphu ọ dụkwa onye
sụru atụfu onye ọ tụru mkpọro.
15 Ọo ya bụ; ọ -sephu mini azụ;
alị akpọo jegengu.
Teke ọ gbaharu mini ẹka
l'ọ tụko ẹkameka sọaha
gborogboro l'alị.
16 Ọo ya bẹ ọkpehu yẹe
ọkpobe mmamiphe
dụ l'ẹka.
Onye a ghọru ụgho;
yẹe onye ghọru iya ya nụ
tụko dụ yẹbedua,
bụ Chipfu l'ẹka.
17 Ndu akpọ-zijeru ndu ọzo ụzo
bẹ ọogbabeje ọkpa ọto
duta phẹ dufu;
tẹme ọ nọdu emeje
ndu-ikpe g'ẹphe bụru ndu
egomunggo swehuru.
18 Ndu eze bẹ ọonafuje ọkwa
eze phẹ;
mee phẹ; ẹphe abụru ohu.
19 Ndu bụ uke bẹ ọogbabeje
ọkpa ọto duta phẹ dufu;
tẹme ọ nọdu akwatsuje
onye shihawaa ụzenya bụru
onye nọshiru ike.
20 Ndu e gude ire phẹ ẹka bẹ
oomeje g'ẹphe ta mahẹ
iphe, ẹphe e-pfu.
Tẹme ọ nọdu anafụje ndu bụ
ọgerenya iphe,
gege edo phẹ ẹnya ree.
21 Ndu a maru ẹpha phẹ bẹ
ọonmaje phulaphula.
Tẹme ọ nọdu anashịje ndu
ọkpehu dụ ike,
ẹphe nweru.
22 Ọo ya egoshije iphe,
dụ omilomi, nọ l'ọchii.
Tẹme ọ nọdu ewofutaje iphe,
gbaru tsụkiribaa tọgbo
l'ìphóró.
23 Ọo ya emeje ọha g'ọ ha shii;
tẹme ọ bụkwaru iya phọ
emebyishije phẹ.
Ọo ya emeje ọha g'ẹphe zụa
azụzu ha ọsa;
tẹme ọ nọdu ehujekwa phẹ
phọ adagba nchị l'alị.
24 Ọo ya emeje gẹ ndu bụ
ndu-ishi ụnwu-eliphe
mehu phukunaa.
Ọ nọdu enwujeru phẹ ye
g'ẹphe je etsoru
okorobo-ẹgu ghaphee
l'ẹka gbororo adụdu.
25 Ẹphe -gbẹshi;
ẹphe eje etsoru aghaphe
l'ọchii l'ẹka ìphóró
adụkpodaa adụdu ophu.
L'o mee phẹ; ẹphe akpọ
kulakula g'onye mẹe atsụ.