23
1 Jiobu bya eyee ọnu sụ:
2 Ntanụ ọwa-a bẹ aphụ,
mu agụ erwukwa mu lẹ
meji.
Ẹka Chileke anyịlekwaa
tụ́dúú l'ẹhu mu l'ẹka mu
atsụkpokwaa ude-a,
mu atsụ-a.
3 Ọme mu makpọoru ẹka mu
a-chọ-vu Chileke.
Ọ dụ mu g'a sụ lẹ mu a-dụ
ike jerwua ẹka o bu;
4 mẹ mu apfụru iya l'iphu
pfua g'ooghu mu;
mẹ mu l'iya atụe ya phọ
jasụ mu epfugbua g'o
jiru mu ọnu.
5 Noo teke mu gege
amawarụro iphe,
o gogo yeru mu ọnu;
mẹ iphe,
oopfu edokwanaa mu
ẹnya.
6 ?Oo-gude ike-ọkpu gẹ mu
l'iya kpegba ikpe tọo?
Waawakwa; o togọ dụkwa iphe,
o g'agụru nụ mu l'onoo iphe,
mu meru.
7 Ọo l'iphu ẹka ono bẹ onye
pfụberekoto gege apfụru
kọoru iya iphe,
atsụ iya l'ẹhu;
mẹ ọ dzọo mu l'ẹka
onye-ikpe mu;
mu enweru onwomu jasụ
l'ojejoje.
8 Obenu lẹ g'ọ dụ nta;
mu -chọo ya shia ụzo
ẹnyanwu-awawa;
mu ta ahụmadu iya;
teke mu chọru iya shia ụzo
ẹnyanwu-arịba;
mu ta ahụmakwa iya phọ.
9 Ọ -nọdu lẹ ndẹgu eje ozi iya;
mu ta ahụmadu iya.
Teke ọ shiru ụzo ndọhali;
mu ta ahụmakpodaa ya
rọ ahụma ophu.
10 Ọle mbẹdua ta adụkpodaa
ụzo, mu shiru, ọ madụ.
Ọ bụru iya bụ ọ -hụchaa mu
ama;
mu amaaha mma gẹ
mkpọla-ododo.
11 Ọkpa mu etsoẹkwapho ẹka ọ
zọru ọkpa pụrupuru.
Ọ bụekwapho ụzo,
ọ tọru bẹ mu tsoru;
ọphu mu ahajẹkwaru iya
shiahaa ụzo ọzo.
12 Iphe, ọ sụru g'e meje bẹ mu
teke ahaswekwaa ememe.
Opfu, shi iya l'ọnu bẹ mu
kakwa agụbe iphe
eme lẹ nri, mu erije
mbọku-mbọku.
13 Obenu l'ọ pfụru akatakpa
ẹka iya;
tẹme ?bụkwanu onye sụru
iya akwachị ụzo?
Ọo iphe, dụ iya ree ememe
bẹ oomeje.
14 Ọ chịru idzu mee iphe,
dụ iya ree l'ẹhu mu.
Ọ chịbakwaaro ẹgube idzu
ono igwerigwe
woru kwachiaru onwiya.
15 Ọo iphe ono meru g'o gude
ọ nọdu abụjeru;
mu -nọdu l'ẹka ọ nọ;
ndzụ agụshi mu ike.
Teke mu rịtaru iya;
ndzụ agụahaa mu.
16 Chileke mewaru mu;
meji nọdu emewaa mu
phẹripheri;
mbụ lẹ
Ọkalibe-kangokọtaru-nụ
yewaru mu ebvu.
17 Ọ tọ bụdu ọchii, l'agba nụ
meru gẹ mu dobe ọnu doo;
mbụ ọchii ono,
tụkoru mu iphu
rachia ono.