24
Umere ndu ẹjo-iphe
1 ?Bụ gụnu kparụ iphe,
Ọkalibe-kangokọtaru-nụ
te edobejedu mbọku,
oo-kpe ikpe?
Dẹnu g'o gude ndu maru
Chileke nọdu anọduje
ele ẹnya
ẹgube eswe mbọku ono;
ọ tọ dụdu ọphu ẹphe
ahụma?
2 Mkpuma a kpọberu gude
kpaa oke alị bẹ amadụ
aphọribejeru.
Ẹphe nọdu echechaa eche
atụru, ẹphe rwutaru l'iphuru.
3 Ẹphe nọdu achịfuje
nkapfụ-ịgara nwogbee;
bya anatajẹ nwanyị,
ji iya anọedu oke-eswi
iya l'itumo.
4 Ndu ụkpa bẹ ẹphe
achịribejeru l'ụzo;
tẹme ẹphe nọdu akpatajẹ
gẹ ndu akpa nri domishia
onwophẹ.
5 Ọo gẹ nkapfụ-ịgara-ọswa
etsojeru echiẹgu aghaphe-a
bụ gẹ ndu ụkpa etsojeru
aghaphe achọ ẹka ẹphe
a-kpata nri.
Ọ bụru l'okorobo-ẹgu bẹ
ẹphe akpatajẹru ụnwu
phẹ nri.
6 Iphe, bụ mkpakọ nri,
ẹphe erije bụ iphe,
ẹphe tsoru ọma ẹgu kpata
l'akpa.
Tẹme ẹphe nọdu ejejechaa
akpa ọbu eje iya l'ẹgu
ndu ẹjo-iphe.
7 Eshinu ẹphe enwedu uwe
bẹ ẹphe agbajẹru ọto zẹe
fụta ụtsu.
Oyi -tsụa g'ọ tsụhabe;
ẹphe te nweduru iphe,
ẹphe e-gude kpuchia
onwophẹ.
8 Igwe -wata edze eze mini;
mini, shi l'úbvú ono
anmaa phẹ; ẹphe adụ shẹgele.
Ọ bụru l'agbara mkpuma bẹ ẹphe
ejeje anmakoru;
kẹle ọ tọ dụedu ẹka ọzo,
ẹphe a-gbaba je ekpuru.
9 Nwa, enwedu nna bẹ a natarụ
ne iya teke ọongukwadu ẹra.
Ndu akpa nri bẹ a narụ ụnwu
phẹ opfu l'ẹphe ji ụgwo.
10 Eshinu ẹphe enwedu uwe
bẹ ẹphe agbajẹru ọto tsoru
aghaphe.
Ẹgu anọduje eme phẹ;
ẹphe evukwaru iphe,
e meberu l'opfu evulata.
11 Ẹphe anọduje lẹ mgbabu
olivu mee manụ olivu.
Ẹphe abya akụa mẹe-vayịnu
kụta; l'ọogu phẹ;
ẹphe te ededu iya ire.
12 Ude, ndu anwụhu anwụhu
atsụ bẹ adashị ike lẹ mkpụkpu;
tẹme maa ndu e mekarụ
iphe nọdu echi mkpu
achọ onye e-yeru phẹ ẹka;
ọphu ọ dụdu onye Chileke
angajẹru nchị l'iphe, oopfu.
13 O nweru ndu ọphu kpọru
ìphóró ono ashị.
Ẹphe ta amadụ ụzo iya amama
ophu;
ọphu ẹphe eshidu gbororo
iya ililekpọo.
14 Ọobujeru;
ẹkameka -gbahụepho ọchii;
mgbugbụmadzu agbalihu
je egbua onye ụkpa yẹe
onye adụdu g'ọ dụ iya.
Ọ bụru l'ẹnyashi bẹ
ọonoduje apya g'onye-oshi.
15 Ọzo bụ l'onye eri ogori
bụ iphe, ọonoduje ele ẹnya
iya bụ nchi-ejihu.
Ọriri iya abụru:
“Nta-a bẹ mu maru l'ọ tọ
dụdu onye hụmaru mu nụ!”
L'o woru iphu mee g'a ta hụbe
iya ama.
16 Ọo l'ọchii bẹ ndiphe ejeje
etsufua ụlo nwibe phẹ bahụ.
Teke o beru l'eswe;
ẹphe agụ-chia onwophẹ
ụzo nọdu;
noo kẹle ìphóró adụje
phẹ ashị.
17 L'ẹhu nkephẹ g'ẹphe hakọta
bụ ọchii,
agbashị ike bụ nchi-abọhu
nkephẹ.
Ọ bụru n-yemebvu,
nọ l'ọchii bẹ ẹphe l'ẹphe
eshi ọ̀nyà.
18 “Obenu l'ẹphe bụ ụphu-mini,
tukoru l'eli mini.
Oke-alị phẹ bẹ a tụru ọnu;
k'ọphu ọ tọ dụdu onye
agba ọkpa l'ẹka ẹphe
kọru opfu.
19 Ọo ẹgube ono, okpomọku
yẹe anwụ erwubashịje
aka-mini-sunoo-a;
bụ g'ilu anọduje alwụko
ndu emeje iphe-ẹji.
20 Ẹpho ne phẹ eworu phẹ
zọhaa.
Ẹ̀kà akpaa phẹ nri l'ẹhu.
Ndu ẹjo-ememe ta adụkwa
onye anyatajẹ phẹ nụ.
Ọ kwa g'aagbakwoshije oshi-a
bụ gẹ aagbakwotajẹ phẹ.
21 Ụnwanyi, ta atsụdu ime yẹe
ndu ọphu enwedu nwa
bẹ ẹphe egudeje azụ
onwophẹ;
ọphu ẹphe aphụjeduru
ụnwanyi, ji phẹ anọedu
obu-imemini.
22 Obenu lẹ Chileke egudeje
ike iya lọo ndu nweru
ike phèlèphèlè.
A makwarụ-a l'ẹphe angụjeru
angụru l'eliphe-a;
obenu l'ẹphe ta amajẹdu
?ẹphe a-nọdu ndzụ tọo
ẹphe ta adzụdu.
23 Ọopajekpokwaaru phẹ rọ
haa g'ẹphe tụta unme;
ẹphe nọdu tụzowaruro ẹhu;
ọle ẹnya iya dụepho l'iphe,
ẹphe eme.
24 E -mee g'e kuliru phẹ eli;
a -nọepho nwanshịi;
ẹphe ephukahụ.
L'a bya ekuzetakpọo phẹ alị;
ọnwu eworu phẹ gbua
g'oogbuje ndu ọzo.
L'e gbua phẹ g'onye egbu
ishi akpe.
25 Teke ọ bụ l'ọ tọ dụdu gẹ
mu pfuru ono;
g'onye a-gba mu iya nụ
gbawa mu iya rọ.
G'onye ono byawarọ apfụru
sụ l'iphe-a,
mu epfu-a ta adụdu iphe,
ọ bụ!”