27
1 Jiobu nọdu epfukwarọ
iphe, oopfu eje. Ọ sụ:
2 Eshinu Chileke nọ ndzụ g'ọ
nọ iya-a;
mbụ onye ono,
te ekwedu haarụ mu enge;
bya abụru yẹbe
Ọkalibe-kangokọtaru-nụ ono,
meru g'obu mu gbua ire l'iphe,
atsọ ilu.
3 Eshinu ọphu ndzụ nọkwadu
mu l'ime ililekpọo.
Unme, Chileke kuru nụ mu
nọdu eshijekwadu mu
l'imi akpụshi;
4 bẹ mu ta abyakwa egude
ogbogboromọnu mu
pfua ẹjo-opfu;
ọphu ire mu ọwa-a abyadụ
epfu iphe, bụ ẹregede opfu.
5 Tụswekwa! Mu ta abyakwa
ekwe l'iphe,
unu epfu bụ ọkpobe-opfu;
ọphu mu abyakwa l'ekweta
l'iswi ta adụdu mu mma
jasụ mu anwụhu.
6 Apfụbekoto mu ono be mu
e-gudeshiẹpho gẹ mu gudeshi
iya; ọphu mu abyadụ aha iya
ahaha ophu;
ọphu ẹkpa-egomunggo mu
abyadụ abarụ mu mba
jasụ gẹ mu a-nọ-beru.
7 Sụ-a; gẹ ndu ọhogu mu
dụkwa gẹ ndu ẹjo-iphe dụ.
Gẹ ndu mu dụ ashị dụkwa gẹ
ndu apfụbeduru ẹka ọto.
8 Lẹ-a; ?bụ gụnu bẹ onye
amadụ Chileke elekwadu
ẹnya iya mẹ ọ chịhuwaa;
mbụ mẹ Chileke wofuwaa
ndzụ iya?
9 Ẹgube onye ono bẹ Chileke
ta angajekwaaru nchị l'olu mẹ
oke iphe-ẹhuka byapfuta iya;
10 ọphu
Ọkalibe-kangokọtaru-nụ
adụjeekwa iya ree;
ọphu ọ bụekwa tekenteke
bẹ ọora-kuje Chileke.
11 Gebe gẹ mu bya egoshi
unu g'ike dụ-be Chileke;
mbụ l'ụzo kẹ
Ọkalibe-kangokọtaru-nụ
ono bẹ mu te
edomikpọdaanu edomi.
12 Eshinu unu hụmakotawaru
iphe ono l'onwunu;
?dẹnuhunu g'o gude unu nọdu
epfuhunu opfu, enwedu ishi
ọwa-a?
13 Nokwa ẹgube obunggo,
Chileke ebuje ndu ẹjo-iphe;
tẹme ọ bụru okiphe,
ndu iwashị eketajẹ l'ẹka
Ọkalibe-kangokọtaru-nụ
bụ onoya.
14 Ọ tọ dụkpodaa g'ụnwu
iya a-habe l'ọtu;
iphe, nọ swiru phẹ nụ
bụ l'aa-phụ phẹ tẹterii.
Awa iya ta abyakpọdaa
ahụmaje nri, sụru phẹ
eriri.
15 Ọ bụru ẹjo iphe-ememe bẹ
e-gbushi awa iya ndu ọphu
wafụru nụ; ọphu ụnwanyi,
ẹphe harụ l'ụlo-maa aradu
ẹkwa phẹ.
16 A makwarụ-a l'ọ kparụ
okpoga kụbe l'ikpo
l'ikpo g'onye kụberu ẹja;
bya anmaa uwe kụbe g'onye
kụberu ẹja-ụlo;
17 obenu l'uwe ono, ọ kụberu
ono bụ ndu pfụberekoto
e-mechaa yee ya.
Ọ bụru ndu iswi dụ mma
e-mechaa kee okpoga
phẹ ono.
18 Ụlo, ọ kpụru dobe dụle-a
phuge phuge g'ẹka
udude kweru;
mbụ l'ọ dụ gẹ nwobu,
onye-nche kpụru nọdu.
19 Ọ zẹ azẹe onye nweru iphe;
ọle ọ tọo zẹbaekwanu iya.
Ọ -bya asa ẹnya ta adụedu
iphe ono ọphu
ọohumakwadu.
20 Ndzụ-agụgu asọpyabeje
iya g'onye mini sọpyaberu.
Oke phẹrephere nọdu abyajẹ
ezikọta iya l'ẹnyashi.
21 Phẹrephere, shi l'ụzo
ẹnyanwu-awawa apatajẹ
iya pamihu;
a taa hụmabaedu iya;
mbụ l'oozikọtaje iya
pafụkpoe ya phọ l'ibe
iya apafu ophu.
22 Ọotuje iya gbaagbaa;
imemini iya ta adụdu l'ẹka
ọogbalaru ike iya.
23 L'oochi iya ẹka gbaagbaa;
l'ọophuru iya
swooswooswoo gude
zikọta iya zifu l'ibe iya.