28
1 Sụ-a; ẹka eebvutajẹ
mkpọla-ọchaa dụ.
Ụ́zú, aakpụje mkpọla-ododo
dụkwapho.
2 Ígwè bụkwa l'alị bẹ eebvutajẹ
iya.
Ọ bụru akpaga bẹ eegudeje
meta onyirubvu.
3 Mbụ lẹ nemadzụ bvuwaru
ọchii omilomi omilomi;
bvurwukpọepho ẹka alị
kachaa omilomi;
ẹka ẹphe achọ iphemiphe
ono l'ime alị.
4 E shi l'ẹka nemadzụ bu ebubu
l'eli alị
bvua ọgba omilomi
omilomi;
bvurwua ẹka ọkpa teke
azọbeswee ililekpọo;
nọdu l'omilomi ẹka ono,
adụdu onye nọ iya nụ ono
akụ eregede akụ akụkunvu.
5 Ọ bụru alị ono, bụ iya bẹ
eemefutajẹ nri ono bẹ
e jerwuru je ekwongaa
ya;
ọ nọdu enwu phuruphuru
g'ọku.
6 Ọ bụru agbara-mkpuma,
nọ l'ime ẹka ono bẹ mkpuma,
bụ sáfàyà shi.
Nshị mkpọla-ododo dụ
l'urwuku shi iya etsushihu.
7 Ọ tọ dụdu ẹnu, eri anụ,
pheswetajẹwaru ụzo
ibiya ono;
ọphu ivu amadụ iya ụzo.
8 Anụ-ẹgbudu -kua onwiya
g'ookuhabẹ;
ọkpa iya ta atụdu l'ẹka ono;
ọphu oduma ejedu iya
akpa nri.
9 Ọ bụru nemadzụ gude ẹka
iya egbukpọshi ịgbangu
ịgbangu mkpuma ono;
ebvulitajẹro úbvú ebvulita
gha ịgharaphu.
10 Ọokukposhi mkpuma
atọ owere eje;
shi nno gude ẹnya
tụkokpoo ẹku ẹku,
dụkota iya nụ hụmachaa.
11 Oogudeje ẹja nwuchia ẹnya
mini ẹka nggele eshije
asọ asọso; l'o jee je
ewofuta iphe,
e shi domia edomi bya
atọgbo l'ebederebadara.
12 Obenu lẹ-a; ?bụ awe bẹ
aa-hụmakwanu
mmamiphe?
?Bụ awe bẹ nkwamẹnya
bukpọo?
13 Nemadzụ ta adụjedu
ike makọtaru gẹ
mmamiphe erebe ire;
mbụ l'ọ tọ dụdu onye
maru iya nụ l'eliphe-a,
e bu ebubu-a l'ophu l'ophu.
14 A jịru ogbu-mini; ọ sụ l'ọ
tọ dụkwa l'ime iya.
Oke-ẹnyimu sụ: Ọphu ọ
dụkwa ọphu dụ l'ime
nkemu.
15 Mkpọla-ododo, kakọta ama
mma bẹ e tee gudekọtakwa
azụ iya; ọphu aatụkwanu
aswa iya eyeru
mkpọla-ọchaa.
16 A taa zụ-butadu iya lẹ
mkpọla-ododo Ofi;
ọphu e gudedu mkpuma
ónìkùsù ọzoo sáfàyà
azụ-buta iya;
17 ọphu a tụdu iya eyeru
mkpọla-ododo ọzoo
mkpuma, aphụ ngerengere;
ọphu e gudedu iya
agbanweta
ụnwu-ẹrengete-iphe,
e gude ọkpobe
mkpọla-ododo meshia;
18 ọphu e jedurọ epfu kẹ
l'eewota mmamiphe
atụ eyeru mkpuma koralu;
yẹe mkpuma jiásùpà;
mbụ l'aswa mmamiphe
kakwa aswa mkpuma
rubi shii;
19 ọphu e wokwarụpho
mmamiphe atụberu
mkpuma tópàzù,
shi l'alị Kushi;
ọphu e gudedu mkpọla-ododo,
dụebe ree azụ iya.
20 ?Bụkwanu awe bẹ
mmamiphe shi?
Nkwamẹnya ?bụ aweya bẹ
o bukpọo ebubu?
21 Ono bẹ e domiru g'ọ tọ
dụ iphe, dzụ ndzụ
a-hụma iya nụ;
mbụ l'e kpuchiru iya
ekpuchi g'ẹnya ta
ahụma iya je akpachaa l'ẹnu,
ephe l'eli.
22 Ọla-l'iswi yẹe ọnwu
l'onwiya tụkoru sụ-a
l'ẹphebedua bụkwa
tafutafu iya rwuru
phẹ nchị.
23 Ọo Chileke maru ụzo iya.
Ọ bụru iya kpoloko maru ẹka
o bu ebubu;
24 kẹle ọo ya bẹ ẹnya erwuje
l'ẹka eliphe jeberu;
tẹme ọ nọdu atụkoje
iphemiphe,
nọ igwe lẹ mkpula
hụmakota.
25 Teke o meru ike nụ
phẹrephere;
bya atụ̀a mini atụ̀tù dobe;
26 teke ọ tụru ekemu dobe
l'ọwa-a g'igwe e-gudeje
edze mini;
bya atọo gbororo tọgboru
ire egbigwe;
27 noo teke o leru mmamiphe
ẹnya tụa ọnu iya.
Ọ bya apfụbeshia ya ike bya
ahụa ya ama;
28 bya asụ ụnwu-eliphe-a:
Atsụ Nnajịuphu ebvu bụkwa
iya bụ mmamiphe.
Ajịka eme ẹjo-iphe,
bụru nkwamẹnya.