29
1 Jiobu nọdu epfukwaphọ
iphe, oopfu eje. Ọ sụ:
2 Ọ dụ mu g'a sụ l'ọnwa l'ọnwa
ono, chiwarụ nyịhu ono
a-lwaphutagbaa azụ;
mbụ mbọku lẹ mbọku ono,
bụ teke Chileke shi anọduje
eche mu nche ono;
3 teke orọku iya shi asụjeru
mu l'ụzo ishi eke paapaapa.
Mu shi egudeje ìphóró iya
ghaa ẹka ọchii agba.
4 Sụ-a; teke ono,
iphe shi ejehuru mu;
noo teke eshi ọ̀nyà mu lẹ
Chileke shi abụjeru iphe,
jiru ụlo mu bushihu.
5 Teke ono bẹ
Ọkalibe-kangokọtaru-nụ
shikwadu swiru mu eswiru.
Ụnwu mu nọ-phee mu
mgburugburu.
6 Teke ono bẹ ụzo, mu eshi shi
akwọje tẹretere g'a wụru
iya mini ẹra-eswi.
Agbara-mkpuma nọdu
anwụru mu shọkoshoko
anwụshi manụ olivu.
7 Teke mu jeru l'ọnu-abata
mkpụkpu;
bya eje gẹ mu nọdu l'ẹka
ibe mu nọ l'ọma edupfu;
8 bẹ ụnwokorobya
hụmaru mu bya etochiru
mu.
Ndu bụ ọgerenya wụ-lihu
pfụru apfụru.
9 Ndu-ishi daa ikpigbi;
bya eworu ẹka dẹe l'ọnu.
10 Ọnu kpọru ndu a maru ẹpha
phẹ opfu.
Ire nyakụru phẹ l'akpo.
11 Iphe, bụkpoo onye nụmaru
ẹka mu epfu opfu gọru mu
ọnu-ọma; tẹme ndu hụmaru
mu nụ jaa mu ajaja.
12 Iphe, kparụ iya nụ bụru lẹ
ndu ụkpa, rarụ g'a gbaaru
phẹ mkpu bẹ mu shi
agbajẹru mkpu.
Nokwaphọ gẹ mu shi adzọje
ụnwu-ogbee, enwedu nna;
ọphu ẹphe enwedu
onye gbaaru phẹ mkpu.
13 Onye ala l'iswi shi agọjeru
ọnu-ọma nụ mu;
tẹme mu shi emeje g'obu
nwanyị, ji iya anọedu
gụa ebvu ẹhu-ụtso.
14 Apfụbekoto nkemu bẹ mu shi
yee g'onye yeru uwe.
Ikpe, pfụru ọto bụru mu
awụrukpata uwe mgbalanụ;
yẹe okpu, mu kpu l'ishi.
15 Mu shi bụru ẹnya,
ndu atsụ ishi gude aphụ ụzo;
bya abụru ọkpa,
ndu ẹniyeni gude eje ije.
16 Ndu nọ lẹ mkpa bẹ mu shi
bụru nna phẹ.
Mu shi agbajẹru onye mu
amadụ ọdzori.
17 Ndu ẹjo-iphe bẹ mu shi
anyakwashịje agba;
nata phẹ ndu ẹphe
tabẹwaru ẹru eme
g'ẹphe tagbua.
18 Mu shi dobesukpọepho lẹ mu
a-zẹkpoepho l'ụlo mu nwụhu.
L'apha, mu a-nọ l'eliphe-a
a-dụ igwerigwe g'ẹja,
nọ l'alị.
19 Mu shi dobesụ l'ọgbarabvu
mu a-jakpọepho bahụ
l'ime mini.
L'iji a-nọdu akwa putuputu
l'eli ẹkali,
mu jakashịru
mkpụrumkpuru;
20 L'akpabiri mu a-dụepho
ọ̀phúú ọ̀phúú l'ime mu.
Apfụ mu adụkwapho
ọ̀phúú ọ̀phúú nọdu mu l'ẹka
jasụ l'ojejoje.
21 Ndiphe shi anọduje anga
mu nchị l'olu g'ẹphe
nwụta iphe.
Ẹphe shi adajẹ gbẹe ngabẹ
nchị l'ìdzù, mu achịru phẹ.
22 O shi abụjeru; mu -yewaa
ọnu; ọ tọ dụdu iphe,
ẹphe epfubaa ọzo.
Opfu mu ejeẹpho gụrumaa
gụrumaa abahụ phẹ
lẹ nchị.
23 Ẹphe shi anọduje kwabẹru
mu g'onye kwabẹru
yẹgeyege mini;
tẹme ẹphe shi angụje opfu
mu g'onye angụ mini
ishi-apha.
24 Mu -nwụjaaru phẹ ọnu-ọchi
obu ejizeta phẹ.
Ẹphe lee mu ẹnya l'iphu;
ẹphe ajakerehu.
25 Ọo mu shi anọduje egoshi
phẹ ụzo;
tẹme mu shi bụru eze phẹ.
Mu shi asụgajeru g'ẹka eze
sụgaru l'echilabọ ndu
ojọgu iya phẹ.
Mbụ lẹ ndu aphụ tsọru bụ
mbẹdua shi adụje phẹ obu.