31
1 Mu l'ẹnya mu pfuru iya
gbaa ya ndzụ lẹ mu ta abyadụ
ele nwamgbọko ẹnya k'ejepfu;
2 kẹle-a; ?bụ gụnu bẹ
nemadzụ e-keta l'ẹka Chileke,
bu l'igwe?
?Bụ gụnu bụ iphe,
Ọkalibe-kangokọtaru-nụ,
nọ l'ephekerephe nweru,
a-dasweru nemadzụ?
3 ?Tọbudu ndu ẹjo-iphe bẹ
ọla-l'iswi dụru.
Eze iphe-ẹhuka dụru ndu te
emedu ree?
4 ?Tọ hụmaduru ụzo, mu eshi?
Tọo ?tọo gụdu ntụ ọkpa mu
ọgu?
5 Ọ -bụru lẹ mu tsoru iphe,
abụdu iphe;
ọzoo lẹ mu gude ọkpa
mu-a chịpyabe iphe,
abụdu ire-lanụ;
6 mbụ-a; gẹ Chileke tụ̀wa
mu rọo l'iphe,
ọotùje ndu ire-lanụ;
g'ọ hụma l'ụta ta adụdu
mu l'ẹhu.
7 Sụ-a; ọ -bụru lẹ mu
shiswejeru ụzo;
ọzoo ẹnya mu duphujeru
ọkpoma mu ụzo;
ọzoo lẹ mu yejeru ẹka l'iphe,
dụ ẹji;
8 ọo ya bụ gẹ ndu ọzo
rikwa iphe,
mu kọberu l'alị;
tẹme g'iphe, mu kụru
akụku bụkwaru iphe,
ee-pheshi epheshi.
9 Mbụ-a; teke ọ bụ l'o nweru
onye nwanyị,
mebyijeru mu ọkpoma;
ọzoo lẹ mu jejeru ngge
l'ibe obutobu mu;
10 ọo ya bụ gẹ nyee mu
bụkwaru onye e-mechaa
ejeru onye ọzo ozi;
tẹme gẹ yẹe nwoke ọzo
watakwa akwakwa;
11 kẹle ọo ẹgube iphe ono
gege abụru iphe-ẹji,
iphere iya gege adụ.
Ọ bụru iya bụ iphe,
gbaru g'e kpee mu ikpe iya.
12 Ono bụkwa ọku, etsujewarọ
tsurwua alị-maa.
Ọ bụru iya gege ekegbushi
iphe, mu gege akpata l'ẹgu.
13 Sụ-a; ọ -bụru l'ohu mu lanụ
byaru echia mu lẹ mu meru
phẹ iphe, eghu phẹ eghu;
ọphu mu eyeduru phẹ ọnu;
14 ?mu e-mebaa gụnu mẹ
Chileke tsoahaa mu opfu?
?Bụ gụnu bẹ mu e-pfuje mẹ a
sụ gẹ mu bya epfua g'ọ
nwụru mu l'iya?
15 ?Tọbudu Chileke meru mu
ye l'ẹpho ne mu;
meru yẹbedua?
?Tọbudu onye lanụ ono
tụkoru mu l'iya mee
g'anyi a-dụ l'ẹpho ne anyi?
16 Sụ-a; ọ -bụru l'onye ụkpa
rwọjeru mu iphe;
mu jịka iya ya anụnu;
ọzoo lẹ mu hajẹru nwanyị,
ji iya anọedu; ọ kwata ishi;
17 ọ -bụru lẹ mu wojeru
nri mu dobe k'eri nwẹkinyi
mu; ọphu mu ekeduru iya
ụnwu ogbee, enwedu nna;
18 obenu l'eshinu mu bụ
nwata bẹ mu shiẹpho
heta iya g'onye nna iya ehe;
tẹme mu shiẹpho eshi ọphu
a nwụru mu eleta nwanyị,
ji phẹ anọedu ẹnya.
19 Mbụ-a; mu -hụmajekwa onye
emebyihu emebyihu opfu
l'o to nwedu iphe,
anma l'upfu;
ọzoo onye adụdu g'ọ dụ iya,
enwedu uwe eye l'ẹhu;
20 ọphu ọ gọduru ọnu-ọma nụ
mu;
opfu lẹ mu gude ẹji atụru
ibe mu meta ukpo gude
gbobuta iya oyi.
21 Ọ -bụru l'o nweru iphe,
mu halijeru ẹka mee
ndu enwedu nna;
opfu lẹ mu bụ onye ọnu
erwu l'opfu l'ụlo-ikpe;
22 G'ẹka kwahụkwa mu l'ukuvu;
g'o shikwaa inwo rifu erifu.
23 Sụ-a; eshinu mu atsụ Chileke
ebvu l'ọo-nụ mu aphụ;
tẹme mu nọdu atsụ
akpabiri iya ebvu bẹ mu te
emejekwaru ẹgube iphe ono.
24 Ọme mu chịru ụpfu ye
l'okpoga mkpọla-ododo;
ọzoo lẹ mu sụru ọkpobe
mkpọla-ododo l'ọ kwa
iya gude ndzụ mu;
25 ọme mu tejeru ẹswa
kpua iphe, mu nweru;
mbụ ẹku, mu gude ẹka
mu kpata;
26 ọme mu wojeru ẹnya
dabẹ l'ẹnyanwu,
egbu nwịinwii;
ọzoo lẹ mu wojeru ẹnya
dabẹ l'ọnwa,
echi phuuphuu;
27 k'ọphu bụ l'iphe ono byaru
bya esweta mu ọkpoma;
mu gude ẹka mu ọwa-a
baaharụ phẹ ẹja lẹ mpya;
28 noo iphe, gege abụru iphe-ẹji,
gbaru g'e kpee mu
ikpe iya bụ onoya;
kẹle mu -nọdu eme nno
bụ iphe ọbu bụ lẹ mu ta
akpọduru obu yeru Chileke,
bu l'igwe.
29 Ọme ẹhu tsọjeru mu
ụtso l'onye ọhogu mu
larụ l'iyi;
ọzoo lẹ mu tejeru ẹswa kpua
iphe-ẹhuka, byapfutaru iya nụ;
30 mbụ-a; mu teke
egudeswekwaa ọnu mu-a
mee iphe-ẹji;
k'atụ ndzụ onye ọhogu
mu ọnu.
31 Ọ tọ dụkwa onye nọ l'ibe
mu sụjeru lẹ ya te erijidụru
ẹpho l'ibe Jiobu.
32 Mbụ l'o toko duswee onye
shi eshishi, kwajẹru lẹ gbororo;
kẹle mu shi eghebejeẹpho
ibe mu ọnu;
gẹ ndu eje iphe bata
bya akwaa.
33 Mu teke emeswe iphe-ẹji,
woru domia ẹgube
ndiphe emeje domia-a;
mbụ woru ikpe,
nmarụ mu nụ domia
l'ime ọkpoma mu;
34 kẹle mu atsụ ikpoto
ọha ebvu;
gude ndzụ-agụgu k'iphe,
ee-pfuru mu kwaa l'ụlo;
ọphu mu afụtajedu afụta.
35 Gege ọ dụkpooru onye
e-ye ọnu l'iphe-a,
mu epfu-a!
Mu doakwaru edo mu
ye ẹka l'ẹkwo.
Gẹ
Ọkalibe-kangokọtaru-nụ
gbawa mu iya rọ!
Gege iphe-a, ndu epfuru mu
nụ sụru lẹ mu meru-a bẹ
ẹphe deru l'ẹkwo dobe;
36 mẹ mu ewojeẹru iya
phọ jikoru l'ukuvu;
mbụ lẹ mu gege ewoẹru
iya phọ kpuru g'onye
kpu okpu-eze;
37 mẹ mu eshikwanụ
ishi lanụ dooru iya edo
ẹhu mu nanụ nanụ;
mẹ mu abyakpọepho
bya apfụru iya l'iphu
g'onye pfụru l'iphu
ndu-ishi.
38 “Ọ -bụru l'alị mu e-chi mkpu
kpua mu;
mbụ lẹ mgbawara,
nọ iya nụ bụ ẹnya-mini anwụ
iya shọkoshoko;
39 ọ -bụru lẹ mu riru iphe,
mu kọru iya lẹ mu ba pfụ
ụgwo ozi iya;
ọzoo lẹ mu mebyiru ndzụ
ndu eje iya ozi;
40 g'ọ bụkwaru ẹwu-óbvú
e-fushi iya.
Gẹ witi, mu kọru iya te
emekwa ememe;
ẹswa mmanụ efushia
ya l'ọzo balị, a kụru iya.”
Nta-a bẹ Jiobu
yeghewaru ọnu.