32
Opfu Elihu
1 Tọbudu iya bụ; ụmadzu ẹto ono haa eye ọnu yeru Jiobu; kẹle ọ pfụberekoto l'ẹnya nkiya.
2 Noo ya; Elihu tangịrihu. Opfu ẹhu Jiobu mee; ẹhu ghuhaa ya eghu; kẹle Jiobu harụ eme Chileke onye pfụberekoto bya emechia onwiya onye pfụberekoto. Elihu bụkwanu nwa Barakẹlu, bụ onye Buzu; oshilọkpa Ramu.
3 Ọ̀nyà iya phọ ẹphe n'ẹto mekwaphọ; ẹhu nọdu eghu iya eghu; kẹle ẹphe ta adụdu ike pfukpee Jiobu; ọle ẹphe nmakwaru iya nụ ikpe.
4 Iphe, kparụ iphe, Elihu nọkpoepho doo gẹ ndu ọphuu pfugbukpọada g'ọ dụ phẹ tẹme o yejeru Jiobu ọnu bụ l'ẹphe bụchaa ya ọgerenya.
5 O be g'ọ nọnyaaru; ọ hụma l'ụmadzu ẹto ono ta maẹdu iphe, ẹphe e-pfu; o ghuahaa ya eghu.
6 Tọbudu iya bụ; Elihu, bụ nwa Barakẹlu, bụ onye Buzu bya eyee ọnu sụ:
Mbẹdua bụkwa nwata;
unubẹdua bụwaru ndu
bụ ọgerenya.
Ọ bụru iphe ono meru g'o
gude mu shi asọ unu ẹnya;
ọphu mu ejeduru atụ ama
k'epfuru unu gẹ mu
mataberu.
7 Mu shi rịa sụ: G'ọgerenya
pfunaa opfu.
G'onye nọwaru apha olemole
zinaa mmamiphe.
8 Obenu l'ọo maa, nọ nemadzụ
l'ime;
mbụ unme
Ọkalibe-kangokọtaru-nụ bẹ
emeje gẹ nemadzụ maru iphe.
9 Ọ tọ bụekwapho ọgerenya
amajẹru iphe;
ọphu ọ bụekwapho onye
akahụwanu bẹ iphe edoje
ẹnya ree.
10 Noo g'o gude mu sụ: Unu
gebekpọdapho.
Mbẹdua e-pfufukwarụpho
unu iphe, mu maru.
11 Mu shikpọekwapho daa gbẹe;
unu nọdu epfu k'unu.
Mu shi ngabẹkpoepho nchị ẹka
unu tsoru achọkashi iphe,
unu e-pfu.
12 Mu ngabẹkpooru unu nchị
rengurengu;
ọle ọ tọ dụdu g'o ka mma
l'ọo onye lanụ l'ime unu,
dụru ike goshi Jiobu
l'o meru ẹji.
Ọphu ọ dụdu g'unu ha onye
dụru ike zaa ya ajị,
ọ jịru unu.
13 Unu ta asụkwa l'unu
ahụmawaa mmamiphe.
Gẹ Chileke mawarụro ọnu,
oo-yeru Jiobu;
l'ọ tọ bụdu nemadzụ maru
ọnu, oo-yeru iya.
14 Sụ-a; eshinu Jiobu abụdu
mu bẹ oopfuru bẹ mu te
epfukwaru iya;
ọphu mu eyekwaru iya
ọnu ẹgube unu yeru iya.
15 Ee! Ọ tụwaru phẹ ẹberebete;
ọphu ẹphe amaẹdu iphe,
ẹphe e-pfu.
16 ?Bụ gẹ mu ngabẹhunuru
gụnu nta-a,
g'ẹphe nọwaa
nggujingguji-a;
g'ẹphe nmamoru l'ẹka phọ;
ọphu ẹphe amaẹdu iphe,
ẹphe e-pfua?
17 Mbẹdua kwaphọ nwekwarụpho
ọnu, mu e-ye.
Mbẹdua l'e-pfukwaphọ gẹ
mu maberu.
18 Noo kẹle opfu jiru mu ọnu
ebushihu ebushihu;
tẹme ọphu obu mu ekwedu
gẹ mu dobe ọnu doo.
19 L'ime onwomu bẹ mu
dụepho gẹ mẹe,
a gbaru ye l'ime ekpemu
kpuchia.
Mu dụepho g'ite ọ̀phúú,
e yeru mẹe;
ọ nọdu abya agbawahụ.
20 Mu e-pfu opfu g'ẹhu agụa mu
phoo.
Mu a-sa ọnu yee ọnu.
21 Ọ tọ dụkpodaa onye mu agba
eyeru;
ọphu ọ dụkwa onye mu aja
ajaja mkpẹ;
22 kẹle ọme ọ kwọru mu ẹhu;
mbụ aja nemadzụ ajaja mkpẹ;
mẹ onye ono,
meru mu dobe ono ewofu
ndzụ mu ẹgwegwa.