33
1 Noo g'o gude mu sụ-a: Jiobu;
jiko ngabẹkpoekwapho
nchị rengurengu
l'iphemiphe-a, mu epfu-a!
2 Mu abyakwa asa ọnu wata
epfu opfu;
mbụ l'iphe, mu abya epfupfu
degekwaru mu edegeru l'ọnu.
3 Opfu, mu epfu bẹ mu gudekwa
obu, gụru ìphóró epfu.
Ogbogboromọnu mu bụru
iphe, ọ maru bẹ oopfu.
4 Ọ kwa Unme Chileke meru
mu dobe.
Ọ bụru Unme
Ọkalibe-kangokọtaru-nụ
bẹ mu gude nọdu ndzụ.
5 Zanaa mu iphe-a,
mu abya epfupfu-a
m'i -je l'adụ ike.
Dozia onwongu gẹ mu lẹ ngu
pfuta iya.
6 Ọo g'ị dụ bụ gẹ mu dụ l'iphu
Chileke.
Ọo g'e gude ẹja mee ngu bụ
g'e gude ẹja mee mbẹdua.
7 Gẹ ndzụ mu te ejekwa ngu
agụgu;
ọzo bụ l'ẹka mu bya ngu
ebyibyi-a ta anyịbedu ngu
rọ ẹrwa kẹ nno.
8 I gudekpọo ọnu ngu pfua ya;
mu nụma;
mbụ lẹ mu nụmakpooru
iphe, i pfuru gẹdegede
teke i pfuru iya.
9 “L'ị dụebe ree;
ọphu iphe-ẹji adụdu ngu l'ẹhu.
L'ị dụ iche; ọphu ọ dụdu ụta,
dụ ngu l'ẹhu;
10 tẹme Chileke nọdu
etsokwa ngu phọ opfu.
O woru ngu gụa l'onye
opfu iya;
11 bya akpọru ngu ọkpa ye
lẹ mkpọro;
tẹme ọ nọdu anọduje enyocha
iphemiphe, iimekpọo
ememe ophu.”
12 Ọle iphe, mu emekwanụ
g'ị maru l'ẹka ono Jiobu
bụ l'iswi ta adụdu ngu mma;
kẹle Chileke kakwa nemadzụ shii.
13 ?Dẹnu g'o gude ị nọdu ayọru
iya ọshi asụje l'o too yejedu ọnu
l'opfu ẹhu ụnwu-eliphe?
14 Kẹle Chileke epfuje opfu;
o -pfua ya l'ụzo iya ọwa-a;
l'o pfua ya l'ụzo iya ọzo.
O too dokwaphọ nemadzụ
ẹnya.
15 Oopfu iya lẹ nrwọ;
mẹ l'ọphulenya ẹnyashi;
teke oke mgbẹnya
tụshigbawaru nemadzụ;
ẹphe nọdu eku mgbẹnya
l'eli iphe-azẹe phẹ.
16 Noo teke oopfuje opfu ye phẹ
lẹ nchị;
mee; ndzụ agụhu phẹ l'ọkwa,
ọonmaru phẹ;
17 g'eeshi gẹ nemadzụ haa
emeswe iphe;
mekwaphọ g'o to kuhẹ
onwiya;
18 g'eeshi g'a dzọta iya g'ọ tọ
dalahụ l'iduma;
dzọtakwapho ndzụ iya g'e te
gude ogu-echi sụpyashia ya.
19 Ọ dụru ọphu Chileke egudeje
iphe-ememe hụa nemadzụ
ahụ̀hù ọbu;
gburu iya tọgbo l'iphe-azẹe
ya anyapyashị iya ọkpu;
20 k'ọphu bụ l'onye ọbu
bẹ nri adụje ashị.
Nri, kachakpọo ụtso abụru iphe,
anọdu atsọ iya ilu.
21 L'ọ jọo ẹhu bụru ọkpu.
Ọkpu iya ono, e te shidu
ahụmaje l'ẹnya ono awụshiru
kẹ jashịi.
22 L'ọokpo gẹegee akpọ
ala l'ilu.
Ndzụ iya eje alapfu
ụnwu-ozi alị-maa.
23 Obenu lẹ-a; ọ -bụru l'o nweru
ojozi-imigwe, nọ iya
l'agụga bụru onye nọ l'echilabọ;
onye lanụ l'ime ụnu ụnwu
ojozi labọ l'ụnu iri;
g'o pfuaru nemadzụ iphe,
gbaru iya l'ememe;
24 g'o meeru iya eze-iphe-ọma
sụ:
“Jiko g'a dzọo ya rọ g'ọ tọ
daba l'iduma;
lẹ ya hụmawaru onye a-nọduru
iya l'itumo.”
25 Noo teke akpọ ẹhu iya a-bya
enwee dụ gẹ kẹ nwata nshịi.
L'ọ bya alaphu azụ je
adụkpooro g'ọ dụ teke
ọ bụ nwokoro.
26 O -pfuru nụ Chileke;
l'o meeru iya iphe, o pfuru;
l'ọ hụma iphu Chileke
tee ọkpobe ẹswa,
Chileke abyakwa emee ya
l'ọ bụru onye pfụberekoto
ọzo.
27 Noo teke ọo-pfụru
l'edzudzu-ọha pfua ya
hoo haa sụ:
“Mu meakwaru iphe-ẹji;
tẹme mu mebyiwaa iphe,
pfụru nhamụnha;
ọphu a gwataduru mu
ụgwo iphe, mu meru.
28 Ọ gbafụtaru ndzụ mu;
ọphu mu adabaduru l'iduma.
Nta-a bẹ mu a-dzụru ndzụ;
hụma ẹka ìphóró dụ.”
29 Lewarọ; Chileke emejekwaru
nemadzụ iphemiphe ono
ugbo labọ;
mee ya ugbo ẹto;
30 g'eeshi g'ọ nafụta ndzụ iya
g'ọ tọ dalahụ l'iduma;
k'ọphu ìphóró kẹ ndzụ-a
l'a-nọdu echikwaduru iya.
31 Sụ-a; nọdukpoekwapho doo
Jiobu; ngabẹru mu nchị.
Nọdukpoekwapho doo gẹ
mu pfu iphe, mu epfu.
32 Teke i nweru ọnu, ii-ye;
yeeru mu iya.
Pfua iphe, dụ ngu k'epfupfu;
kẹle ọ dụ mu g'a sụ l'e
kpefuru ngu.
33 Teke ọ tọ dụdu;
ngabẹkpoeru mu phọ nchị.
Nọdukpoepho doo gẹ mu zia
ngu mmamiphe!