36
1 Ọphu Elihu ahakwaru
iphe, oopfu.
2 Tabakpọekwapho nshi
nwanshịi;
gẹ mu goshi ngu l'o
nwebakwaru-a iphe, ee-pfu
l'opfu ẹhu kẹ Chileke.
3 Ẹka mmamiphe mu shi
dụkwa ẹnya.
Mu jekwa egoshi l'ikpe
kalẹru onye ono,
meru mu nụ ono.
4 G'o dokwaa ngu ẹnya ree
l'opfu, mu epfu ta
adụkwa ọphu bụ ụka.
L'onye iphe doru ẹnya doẹbe
bẹ unu l'iya tụkokwaru
nọdu l'ẹka-a.
5 Chileke pakwarụ ẹka;
ọle o to lephuduru
nemadzụ ẹnya.
Ọ parụ ẹka bya ekeru
jịmujimu l'iphe edo ẹnya.
6 Ndu ẹjo-iphe bẹ o too
dobejedu ndzụ.
Ọ nọdu anụjekwanu ndu
aakpa ẹhu iphe,
rwuberu phẹ nụ.
7 Ẹnya ta alụfujedu iya
alụfu l'ẹka ndu pfụberekoto
nọ.
Oomeje; ẹphe lẹ ndu eze
atụko bụru eze;
tẹme ọ nọdu ekutseje phẹ
ephekerephe jasụ l'ojejoje.
8 Obenu teke ọ bụ l'a tụru
nemadzụ mkpọro;
l'ụdo iphe-ẹhuka tụru
iya swịswia;
9 bụ iphe, Chileke eme bụ
l'oogoshi phẹ iphe, ẹphe meru;
l'ẹphe meru iphe-ẹji l'ẹka
ẹphe eku onwophẹ.
10 Iphe, oome bụ g'ẹphe ngabẹ
nchị l'ụzo, aakpọ-ziru phẹ;
bya asụkwa phẹ phọ
g'izimanụ ẹjo-ememe,
ẹphe eme lwa phẹ azụ.
11 Ẹphe -mee iphe, o pfuru
bya ejeahaaru iya ozi;
nweswe ndzụ phẹ ọphu
phọduru nụ abụru phẹ
eswe ẹhu-ọdu-guu.
Nwapha olemole ono,
phọduru lẹ ndzụ phẹ ono abụru
apha, a-bụru phẹ k'ọma k'ọma.
12 Obenu teke ẹphe jịkaru
l'ẹphe te eyeduru iya ọnu;
ọoburu ogu-echi bẹ
ee-gude saa phẹ ọsampfu.
Ẹphe anwụhu l'ẹbe ẹphe
enwe egomunggo.
13 Obenu lẹ ndu Chileke adụdu
l'obu phẹ ewojeru
ẹhu-eghu gude suchia
obu phẹ ọbu;
mbụ o -kekpọo phẹ ẹgbu
g'ookehabẹ;
ẹphe ta aradu g'e yeru
phẹ ẹka.
14 Ẹphe agbakwohuje nwụhu
teke ẹphe bụkwadu okorọbya;
tsoru unwoke, a gọru lẹ nshi,
agba ụkpara laa l'ite lanụ.
15 Obenu lẹ ndu eje iphe-ẹhuka
bẹ ọonafutaje l'iphe-ẹhuka ono.
Ọ nọdu epfuje opfu gude dụa
phẹ obu m'ẹphe nọdu
eje iphe-ẹhuka ọbu.
16 Ọ kwa mkpu bẹ ọogbaru
ngu.
Oome g'ọ phafụta ngu l'asha
iphe-ẹhuka dobe ngu lẹ
phorokotoko ẹka
adụkpoedu iphe,
akpakụbe ngu nụ;
tẹme nri, e doberu ngu g'i
ria bụru nri, kachaa ree.
17 Obenu lẹ nta-a bẹ ikpe,
e kperu ngu bụ ikpe,
gbaru onye ẹjo-iphe.
Ikpe, pfụru ọto yẹe
iswi-ọdumma tụwaru
ngu swịswia.
18 Tọkwa ẹhu g'ọ tọ dụ onye
e-gude ẹku deru ngu ye.
B'ekwekwa g'oke ụphalazu
chechi ngu iphu.
19 Ẹku ono; ?oo-me g'ị tị
nọduhe l'iphe-ẹhuka-a?
Tọo ?ii-gude ọkpehu ngu l'ophu
gude nahụ iya?
20 Be lekwa ẹnya ụdu ẹnyashi
ono,
emeje gẹ ndiphe shi
l'ibe phẹ chịhu ono.
21 Tọnupho ẹhu g'i ti je aghaaru
ẹjo-ememe iphu,
bụ iphe, mu ele ẹnya
l'ị ka ahata eme l'eje iphe-ẹhuka.
22 Chileke bẹ e kutseru kẹle
ike dụ iya shii.
?Bụ onye bụ O-zì-iphe,
aatụ eyeru iya?
23 ?Bụ onye sụru asụ Chileke:
Waa iphe, ii-me baa.
Tọo ?bụ onye sụru iya asụ l'iphe,
o meru bẹ o mekwarụ ẹji?
24 Nyatajẹkwa kwolita
ozi Chileke,
bụ iphe, ndiphe agụ ebvu
gude etu iya ẹpha.
25 Nemadzụ l'ophu
hụma-dzuwaru iya.
A nọdu agbẹje ụzenya ele
iya phọriphori.
26 Chileke pakwarụ ẹka
mebyi apapa;
daghata gẹ mmamiphe anyi ha.
Ọ tọ dụkwa onye adụ ike agụta
apha ole ọ nọwaru ndzụ.
27 Ọomeje mini; l'ọoda paapaa.
Ọ bụru mini ono l'edzeje
wọowoowoo awụ ala
l'ọma nggele l'ọma nggele.
28 Igwe avụje tsutsutsu;
l'o dzekwaphọ mini,
parụ ẹka wụshiru ụnwu-eliphe.
29 G'oogudeje erwu erwurwu
ta adụkwa onye o doru ẹnya;
ọphu ọ dụkwa onye maru
g'oomeje shi l'ọkpoku iya
atụ egbigwe tarara tarara.
30 Hụmanu g'o woru
ebemu-igwe iya doo
onwiya mgburugburu;
bya egude iya ekpuhajẹ
ẹka kachaa omilomi
l'eze-ẹnyimu.
31 Ọo ẹgube ono bụ g'o gude
elekọta eliphe l'ophu.
Ọ nọdu emefụta nri eme
k'etsutsu iya.
32 Iphe, jiru iya mkpoji-ẹka
bụ egbigwe.
Ọ bụru ẹka dụ iya ree bẹ
ọotuje iya.
33 Ọo ririri bẹ oodeje l'a
maru l'ọobyawaa
edze oke mini;
mbụ je akpaa l'eswi,
eeche echeche
egoshijechakwaa l'igwe
emewaa ome mini.