37
1 Nta bẹ meji etekwa mu
ophe;
mbụ lẹ meji akụfukwa mu
akụfu.
2 Unu ngabẹkpodapho!
Unu ngabẹ nchi
nụmakpodapho olu Chileke!
Unu nụmakpodapho ekiri,
o gude ọnu iya asụ!
3 Oomeje; ebemu-igwe alọ
waawaa l'igwe;
l'o rwuchaa ẹka igwe beru
alị beru.
4 Teke e mechaẹrupho;
ọ raahaa ọ́rà;
l'o gude oke olu iya atụ
egbigwe.
Ọphu ọ dụdu ọphu oodophuje
azụ mẹ ọ́rà iya gbụfuwa.
5 G'olu Chileke egudeje edebe
ririri bẹ dụ oke ebvu.
Ọ nọdu emeje iphe, parụ ẹka;
meghata g'oodobe
nemadzụ ẹnya.
6 Ọo ya asụje aka-mini-sunoo
g'ọ daa l'eliphe.
L'ọ bya asụkwapho igwe: Ngwa;
dzee mini dzeshia ya ike!
7 Oomeje gẹ nemadzụ
jebuhu ozi;
shi nno goshi onyemonye g'ozi,
ya eje habe shii.
8 Ụnwu anụ anọduje ekpu
ekpukpu ndzụ.
Ẹphe ejeje edomichaa onwophẹ
l'ime ọgba phẹ.
9 Oke phẹrephere eshije l'ọgba
iya;
tẹme oyi-atsụtsu nọdu
eshije lẹ taphutaphu phẹrephere.
10 Mkpukorophu akamini bụ unme,
Chileke tụru atụtu bẹ ooshije.
Ọ -tụa ya; phosa phosa mini,
dọru nyịmunyimu akpụkoo
ophu.
11 Urwukpu bẹ oogudeje
tsutsutsu mini wụ-jia awụ-ji.
Ọ bụru urwukpu ono
anọduje atụ egbigwe
gbaagbaa.
12 Ọ nọdu abụjeru; o -zia phẹ;
ẹphe alọjashia onwophẹ
waawaa l'eliphe l'ophu;
wata eje ozi, o ziru phẹ.
13 Erwurwu bẹ o gude bya
g'o gude iya hụa
ụnwu-eliphe ahụ̀hù;
ọzoo gude iya gbaa mini
l'eliphe gude goshi
n-yemobu iya.
14 Ngabẹkpodapho nchị l'iphe-a
Jiobu!
Hakpọepho iphe, iime;
gbukpọdapho igo l'ọdu-biribiri
Chileke!
15 ?Ị makpọoru gẹ Chileke
egudeje esede urwukpu
l'akpaminigwe?
?Ị maru g'oogudeje alọ ebemu
phaaphaa?
16 ?Ị maru g'urwukpu adọjeru
l'eli iya awụnga l'akpaminigwe?
Ono bụkwa ẹguru ozi, o jeru;
mbụ onye tụkoru
iphemiphe makọtaru onoya;
17 mbụ gụbe onye uwe ngu
ekpo okpomọku l'ẹka
mgboko deru yẹkete.
Ọ bụru iphe, kparụ iya nụ bụ
phẹrephere, shi l'ụzo ndọhali.
18 ?Ịi-dụ-a ike mee iphe, o meru;
mbụ mee; akpaminigwe phụshi;
g'o meru nkiya phụshi
lẹ mgboko-a;
ọ kpọo gbengu g'onyo,
a wụru awụwu?
19 “Kanụru anyi iphe,
anyi e-pfuru iya.
Anyi ta adụkwa ike rịkobe iphe,
anyi e-pfu.
Ọ bụru iphe, kparụ iya nụ
bụ l'ụzo anyi gbanụkaru
ọchii.
20 ?Ee-je epfuaru iya lẹ mu
achọ epfu opfu tọo?
?O nweru onye a nọnyaa
rwọahaa arwọrwo g'e
lwee ya tọo?”
21 “A bya lẹ nta-a; nemadzụ
te elejekwa ẹnya l'ẹnyanwu,
echi echichi;
mbụ mẹ igwe bọo gbarara.
22 Chileke abyaakwaa. Ọ
dụkwa ebvu l'ẹnya bya adụ
akpabiri. O shikwa l'isheli abya;
kwaa onwiya akwa lẹ
mkpọla-ododo.
23 Ọ kwa iya bụ
Ọkalibe-kangokọtaru-nụ;
bụru onye ẹka anyi ta
abyadụ erwu erwurwu ophu.
Ọ parụ ẹka l'ike-ọkpu;
mẹ l'ekpe ikpe, pfụru ọto.
Apfụbekoto nkiya parụ ẹka;
ọphu oomedu
nemadzụ ewere.
24 Noo g'o gude ndiphe
nọdu atsụ iya ebvu.
Ndu arị l'ẹphe maru iphe
bẹ tọ gụbeduru iphe.”