13
Mose kêsakiŋ keleŋwaga 12 sêja Kanaan
1 Ma Apômtau kêsôm gêdêŋ Mose gebe
2 “Osakiŋ lau gebe sêkêŋ keleŋ gamêŋ Kanaan, taŋ gabe jakêŋ êndêŋ lau Israel naŋ. Ôsakiŋ nêŋ laumata tageŋ-tageŋ êtôm tameŋinêŋ gôlôacmôkêgeŋ.”
3 Amboac tonaŋ Mose kêdaguc Apômtaunê jatu ma kêsakiŋ lau, taŋ têtu lau Israel nêŋ laumata naŋ, dêdi aŋga gamêŋ sawa Paran sêja.
13:4-24 Keleŋwaga, taŋ sêja Kanaan naŋ, nêŋ ŋaê kêsêp ŋamadiŋ tonec. Ma Mose kêjatu kôm gêdêŋ êsêac.
Keleŋwaga sêmu sêmêŋ
25 Êsêac sêkêŋ keleŋ gamêŋ tau kêtôm bêc 40 su, go sêmu sêja kêtiam.
26 Êsêac sêsêlêŋ e sêô lasê dêdêŋ Mose agêc Aron ma lau Israel nêŋ gôlôac samob aŋga Kades, taŋ gêc gamêŋ sawa Taran naŋ. Êsêac sêjac miŋ nêŋ biŋ gêdêŋ êsêac to gôlôac samob ma têtôc gamêŋ tau ŋakaŋanô gêdêŋ êsêac.
27 Ma êsêac sêjac miŋ gêdêŋ Mose ma sêsôm gebe “Aêac jaaô lasê gamêŋ tau kêtôm aôm kôsakiŋ aêac. Gamêŋ tau gamêŋ, taŋ su to lêp keseleŋ naŋ. Ma gamêŋ tau ŋakaŋanô tonec.
28 Mago lau, taŋ sêŋgôŋ gamêŋ tau naŋ, lau ŋajaŋa ma tuŋbôm kêgi nêŋ malac kapôêŋ auc. Ma teŋ, aêac alic Anaknê wakuc.
29 Lau Amalek sêŋgôŋ gamêŋ Negeb, lau Het to Jebus ma Amor sêŋgôŋ lôc ma lau Kanaan sêŋgôŋ gwêclêndaŋ to bu Jordan ŋatali.”
30 Mago Kaleb gêjam malô launêŋ ŋalêlôm kêkô Mose laŋônêmŋa ma kêsôm gebe “Aêac tapi gamêŋ tau sebeŋ tana ma tajaŋgo gamêŋ su, gebe aêac tatôm gebe taku gamêŋ tau tulu.”
31 Go lau, taŋ sêpi gamêŋ tau sêwiŋ eŋ sêja naŋ, sêsôm gebe “Aêac tatôm gebe tapi dandêŋ lau tônê tana atom, gebe êsêac lau ŋajaŋa sec sêlêlêc aêac su.”
32 Êsêac sêgôliŋ biŋ kêpi gamêŋ, taŋ jasekeleŋ naŋ, ma sêsôm gêdêŋ lau Israel gebe “Gamêŋ, taŋ aêac ajac laoc to akeleŋ naŋ, gamêŋ kaiŋ teŋ, taŋ geseŋ lau gamêŋ tauŋa su. Ma lau samob, taŋ alic aŋga gamêŋ naŋ, lau waso-waso sec.
33 Ma aêac alic lau ŋadambê kapôêŋ sec aŋga tônê. Lau tau Anaknê lau. Ma aêac asaê tauŋ gebe sauŋanô atôm wagô, ma êsêac sêlic aêac sauŋanô atôm wagô amboac tonaŋgeŋ.”