26
Павел Агриппа хон хŏща ԓўвеԓ ԓўв ӑратыԓԓы
1 Агриппа Павела йастәс: «Нӑӈена нӑӈ эԓтайэн пŏтәртты рӑхәԓ». Щиӈәԋща Павел, йошәԓ йэԓ ԋиштәман, ԓўвеԓ ӑратыты щира пŏтәртты питәс:
2 «Агриппа хон! Мӑнэм ма ŏй тӑйтыйа айәԓԓэм, тӑм хӑтәԓ нӑӈ йэщаԓтэн кашәӈ вер эԓты мӑнэм ма ӑратыты верәтԓэм, мўй хŏща ма иудейәтән нўрмәԓԓайәм,
3 хŏԓна мет, нӑӈ иудейәт уԓәпса щирәт пӑ ўрайа питты нŏпсәт уйәтԓәԓан. Щишән нӑӈен тўӈа-щира мӑнэм хуԓәтты пойәкԓэм.
4 Мет оԓәӈән ма мирэм кўтән уԓәм верэм, Иерусалимән энәмты пŏх ԓŏватән уԓәм уԓәпсайэм иудейәта иса ԓэр.
5 Ԓыв хўв тэԓән ма эԓтэм уйәтԓәт, туп уйәтты вер аԉты ԓӑӈхамәԓәт ки, ма фарисейа усәм. Щит мўӈ эвәԓты верэв хŏща мет так утәԓтәпса.
6 Ин ма сўт йэщаԓт ԓойԓәм Турәм аԉәм вер пеԓа пŏнәм нŏмәс урәӈән, мўй мўӈ ащиԓува мӑса,
7 щи аԉәм вер тӑԓаӈа йиты вер кӑтхŏщйаӈ сыр рут мўӈ мирэв шийаԓәты нумәсԓәт, атәԓ пӑ хӑтәԓ сӑмәӈа Турма верәт верман. Щи пŏнәм нŏмәс урәӈән, Агриппа хон, ма иудейәтән нўрмәԓԓайәм.
8 Мўйа пӑ нын ӑт рӑхты щира ԓўӈәтԓәԓән щит, мўй Турәм пӑрәм ŏтәт нŏх ԓыԓӈатәԓ?
9 Йӑна, ма ищи нумәссәм, мӑнэм Назарет эԓты уԓты Иисус нэм йэщаԓт йэшащты ар мосәԓ.
10 Щит ма щи Иерусалимән версәм: Турма йир верты ŏх икет эԓты йур ўйман, ма ар Турәм хŏйатәт касна хотәта тухрыԓысәм, пӑ, хун ԓыв пӑратысайәт, ма щийэԓ кашащисәм;
11 Пӑ хŏԓ иудейәт пойәкщәты хотәтән ма ар пўш ԓывиԓаԓ шукатысԓам пӑ Иисус атма айәԓты иԉамтысԓам пӑ, ԓыв пеԓайэԓ шек ԉикащман, хŏԓна пӑ па мўв вошәтән ԋухәтԓысԓам.
12 Тӑм урәӈән, йур пӑ Турма йир верты ŏх икет эԓты партәм вер тӑйман, Дамаска мӑнты питсәм,
13 хӑтәԓ кўтәпән йушән, йэшәк хон, ма турәм хӑр эԓты щимәщ нŏви шийаԓәсәм, хӑтәԓ эԓты артан нŏвийа пŏӈхәртәс. Ԓўв мӑнэм пӑ ма пиԓэмән йўвәм мŏхет нŏх хутԓәптәсԓы.
14 Мўӈ хŏԓ мўва иԓ рӑкәтсув, пӑ ма тўр сый хуԓмәсәм, мӑнэма еврейәт йасәӈән пŏтәртәм тўр сый: 'Савл, Савл! Мўйа нӑӈ Мӑнэм ԋўхәԓԓэн? Нӑӈен карты йўщәӈ йўх пеԓа мӑнты ԓавәрт'.
15 Ма йастәсәм: 'Хŏй Нӑӈ, Турәм Куща?' Ԓўв йастәс: 'Ма - Иисус, Хŏйтэн нӑӈ ԋўхәԓԓән.
16 Щӑԓта нӑӈ кўрԓана нŏх ԓойа; Ма щи урәӈән нӑӈ хŏщайэна этсәм, нӑӈен Ма верԓам верты хŏйата пӑ щит вантәм ŏта пŏнты, мўй нӑӈ ватсән пӑ мўй Ма нӑӈена ватәԓтәԓәм.
17 Ма нӑӈен иудей мирэн эԓты хŏԓт пайәтԓэм пӑ па рут мир эԓты, хŏйтат хŏща Ма нӑӈен ин китԓэм,
18 ԓывиԓаԓа сэмԓаԓ пел пўшты, ԓыв пӑтлам эԓты нŏви пеԓа ат ӑӈкәрмәсәт пӑ хиԋ йур эԓты Турәм пеԓа, пӑ Мӑнэма эвәԓты верән кӑрэк йŏрэмәты щир пӑ йэмәӈа пайтәм мŏхет кўтән уԓты щир ат мŏщатсәт'.
19 Щишән, Агриппа хон, ма турәм хӑр вантәпса эԓты йŏвра ӑт керԓәсәм,
20 туп оԓәӈән Дамаск пӑ Иерусалимән уԓты мŏхета, йухәт Иудея ԓŏватән уԓты мŏхета пӑ па рут мира пŏтәртсәм, ԓыв кӑрэк эԓты шӑшән ат керԓәсәт пӑ Турәм пеԓа ат керԓәсәт, кӑрэк эԓты шӑшән керԓәты арат ԓӑт тӑйты верәт верман.
21 Щи урәӈән иудейәт мӑнэм Турәм Хотән ԋӑрэмәсэԓ пӑ лакки мӑншиты ўтщисэԓ.
22 Туп, Турәмән ԋотәпән миймем кемән, ма тӑм хӑтәԓ унты ԓойԓәм, айәта пӑ унәта вантәм ŏта уԓман, нэмәԓты ӑт пŏтәртман, щи тўмпийән мўй эԓты Турәм айкеԓ туты хŏйатәт пӑ Моисей пŏтәртысәт, мӑтты щит питәԓ,
23 тŏрԓы ки, мӑтты Христоса шук туты мосәс пӑ, мет оԓӈа парәм эԓты нŏх ԓыԓәӈԓәмаԓ йўпийән, мўӈ мирэва пӑ па рут мира нŏви такан айәԓтты мосәс».
24 Хун ԓўв щиты ԓўвеԓ ӑратысԓы, Фест сыйәӈ тўрән йастәс: «Павел, нӑӈ ŏхен атма йис! Ун утәԓтәпса нӑӈен ŏх атма йиты унты йŏхтәптәсԓы».
25 «Ӑнтом, йэшәк ԓӑтәӈ Фест», - ԓўв йастәс, - «Ма ŏхем атәм ӑнтом, туп тŏрԓы пӑ ошәӈ йасӈәт пŏтәрԓәм.
26 Хон щи верәт эԓты уйәтԓәԓы, хŏй йэщаԓт ма тŏрԓы пŏтәртԓәм. Ма йэша нэш ӑт эвәԓԓәм, ԓўв эԓтэԓ мŏԓты иса тӑм эԓты сайԓәман ат уса, тӑм ӑнта щуӈән ус.
27 Агриппа хон, Турәм айкеԓ туты хŏйатәта эвәԓԓән амўй? Уйәтԓэм, эвәԓԓән».
28 Агриппа Павела йастәс: «Нӑӈ мӑнэм йэша нэш ӑт эвԓәптәԓэн, Христиана йиты урәӈән».
29 Павел йастәс: «Ма Турәм пойәксэм ԓўԓән, шимәԓ мўй, ар мўй, ӑнтом туп нӑӈ, пӑ хŏԓ тӑм хӑтәԓ мӑнэм хуԓәтты ŏтәт, тӑмиты ат йисәт мўй хŏрпи ма, туп йӑрәм карты кеԓ такԓы».
30 Хун ԓўв щит йастәс, хон пӑ куща ики, Вереника пӑ ԓыв пиԓԓаԓән опсәм ŏтәт нŏх ԓойсәт;
31 пӑ пўӈԓа йирԓәман, ԓыв кўтэԓән пŏтәртсәт: «Тӑм хŏйат сŏрәм кеша пӑ касна хот кеша нэмәԓты атәм ӑт верәԓ».
32 Пӑ Агриппа Фест пеԓа йастәс: «Тӑм хŏйат эсәԓты кўш рӑхәс, кесарь эԓты сўт ӑт вохәс ки». Щишән куща ԓўвеԓ кесарь хŏща китты нŏмәс верәс.