27
Павел Рим воша мӑнәԓ
1 Хун мўӈева Италия мўва хопән мӑнты нŏмәс верса, Павел пӑ тухәԓ па опсәм ŏтәт Август когорта эԓты Юлий нэмпи сот ԉаԉ йох кущайа мӑсайәт.
2 Мўӈ, Асия вошәт сӑхат мӑнты, Адрамит вош паршәӈ ун хопа ԓэԓтсув пӑ мӑтсув. Мўӈ пиԓэвән Аристарх, Македония ху, Фессалоника вош эԓты ус.
3 Кимет хӑтәԓ Сидон хŏща хойсув. Юлий, Павел пиԓән йӑм щира ус, ԓухәсԓаԓ хŏща ԓўвеԓ йӑхты эсәԓсәԓы пӑ ԓыв ԓўв верԓаԓ эԓты ат нумәссәт.
4 Щиԓта этман, йэщаԓт вот эԓты хŏнтаман, мўӈ Кипр пухәр вот сай пелкеԓ сӑхат мӑтсэв,
5 пӑ, Киликия пӑ Памфилия шŏма щарәс шŏппи ўшмев йўпийән, Ликия мўвән Миры воша йŏхәтсув.
6 Щита сот ԉаԉ йŏх куща Александрия вош эԓты уԓты, Италия мўва мӑнты, паршәӈ ун хоп уйтәс пӑ мўӈев щи ԓэԓтсәԓы.
7 Ар хӑтәԓ сыс мўӈ айәԓта йэԓԓы мӑтсув пӑ мет йухәт, ўрайән Книд вош шŏма йŏхәтсув. Пӑ вот мўӈев мосты тӑха пеԓа мӑнты кумән ӑт мийԓысԓы, мўӈ Крит пухәр сайа Салмона нэмпи ԋŏԓ пеләк сӑхат ванамәсув.
8 Ԓўв мŏхтэԓ ўрайән ўратмев йўпийән, и тӑхайа йŏхәтсув, Йӑм Каԓтнаӈәта айәԓтԓа, щи ԉэпән Ласея вош ус.
9 Мўӈ щи арат ар сыс уштәмев урәӈән пӑ мӑнты вер пӑԉщәма йиты питәс, иудейәт сўс вўщԓәты пŏра ўш хӑщәс, Павел ԓывиԓаԓа йастәс:
10 «Ма ваттэмән, мўӈ мӑнәпсайэв шек ԓавәрт питәԓ пӑ ун атәм тӑйты питәԓ ӑнта туп пŏрмасәта пӑ хопа, мўӈ уԓәпсайэва па».
11 Туп сот ԉаԉ йох куща Павел йасәӈ эԓты сэвәс тӑйты хŏйата пӑ хопәӈ кущайа аршәк эвԓәс.
12 Щи лух тӑԓ уԓты щирән атәм ус, пӑ ар хŏйат щиԓта йэԓ мӑнты нŏмәс мийԓысәт, верәтты кемән Финик вош унты мӑнты пӑ щита тӑԓ хӑщәптәты мосәԓ. Финик - щит Крит лух, нўм кев оԓәӈ пӑ ным кев оԓәӈ вот йэщаԓт ус.
Щарәсән так вот
13 Нўм вот пŏԓты питәс, пӑ ԓыв нумәссәт мосты щир мŏщатсәт, хопән рупитты мŏхет йакарэԓ нŏх аԓәпсәт пӑ Крит ԉэп эԓты мӑтсәт.
14 Туп йэшавуԓ пухәр эԓты ŏвәс пеԓа уԓты хӑԓэвәт пеләк так вотшики пŏԓты питәс, эвроклидона айәԓтты вот.
15 Паршәӈ ун хоп щиты аԓэмәса пӑ ԓўв вот йэщаԓт мӑнты ӑт веритәс, пӑ мўӈ, хумпәта мийәсман, тыйэԓ-тŏхэԓ тутԓысайув.
16 Мўӈ айшәк Клавда нэмпи пухәр вот сай пелкәԓа питсув. Щита мўӈ ўрайән ай хопев катәԓты верәтсэв.
17 Ай хопев нŏх аԓԓәммев йўпийән, паршәӈ хопән рупитты хŏйатәт щевма кеԓәт паршәӈ хоп иԓта таԓсәԓаԓ пӑ ԓўвеԓ лӑп йӑрсәԓәсэԓ. Сэй хишәӈ пана ӑт опсатты урәӈән, парәш иԓ эсәԓсэԓ пӑ щиты щи вотән тутԓысайув.
18 Кимет хӑтәԓән, вотән паршәӈ хоп щиты йовәԓты питса пӑ ԓэԓтәм пормасәт ԓыв йиӈка иԓ йовәԓты питсәԓаԓ.
19 Хуԓмет хӑтәԓән пӑ мўӈ йоша-кўра хоп кеԓәт-ԋўрәт иԓ йовәԓты питсув.
20 Ар хӑтәԓ ӑнта най, ӑнта хусәт ӑт нысайәт пӑ так вот щиты пŏԓәс, мет йухәт хŏԓна мўӈ нŏх питты щира уԓты нŏпсэв лўттәсэв.
21 Хŏйатәт хув нэмәԓтты ӑт ԓэсәт. Павел, ԓыв кўтэԓа ԓоймаԓ кемән, йастәс: «Йох! Мӑнэм хуԓәтты мосәс пӑ Крит эԓты пўӈԓа мӑнты ӑт мосәс, тӑмәщ шук пӑ накԓат нын ԓуԓән ӑт ватсәты.
22 Ин пӑ нынан такан йастәԓәм, нŏх тўӈмәԓтыйаты, нын эԓтан нэмәԓты хŏйат ӑт посаԓәԓ, туп паршәӈ хопев шўкаԓәԓ.
23 Хӑщәм атән мӑнэма Турәм ангел этәс, Хŏй пеԓа ма уԓԓәм пӑ Хŏйа ма пойәкщәԓәм
24 пӑ йастәс: 'Павел, аԓ пӑԓа! Нӑӈена кесарь йэщаԓт ԓойты мосәԓ, пӑ Турәм Ԓўв Йӑмәԓән нӑӈен щи ԓŏват йӑм верәс, хŏԓ нӑӈ пиԓэнән уԓәм ŏтәта уԓәпса мойԓәс'.
25 Щишән йох, нŏх тўӈмәԓтыйаты, ма Турма эвәԓԓәм, щиты питәԓ, хŏты мӑнэма йастаман ус:
26 Мўӈ мӑтты пўхра ўты йўвәтты верэв уԓ».
Паршәӈ ун хоп хумпәтән шўкатты вер
27 Ԋӑԓхŏщйаӈмет атән, хŏты мўӈ Адриа щарәс хўват тутԓысайув, ат кўтәп кемән хопән рупитты йох мўв ший мŏштәты питсәт, иԓампа мӑтты мўва ванамәты питсув,
28 пӑ, ԓыв йик мӑԓат артаԓәсэԓ, пӑ хус ԓӑԓ ус, щӑԓта йэша ус мӑԓатәԓ па артаԓәсэԓ, пӑ ветхŏщйаӈ ԓӑԓ арат ус.
29 Кевәӈ тӑхайа питты эԓты пӑԓман, ԋӑԓ йакар сэвәс эԓты иԓ вŏщкәсәт пӑ хӑтԓа йиты ԓавәԓсәт.
30 Хун пӑ хопәӈ мŏхет хопеԓ эԓты хŏнтаты ўтщисәт пӑ щарса ай хоп иԓ эсәԓсәт, щимәщ хŏрас верман, мӑтты хоп ԋŏԓ эԓты йакарәт иԓ эсәԓԓәт,
31 Павел сот ԉаԉ йох кущайа пӑ ԉаԉ йохәта йастәс: «Ԓыв паршәӈ хопән ӑт хӑщԓәт ки, нын ԓыԓԓән этәԓтәты ӑт верәтԓәты».
32 Щиӈәԋща ԉаԉ йохәт ай хоп кеԓәт шŏппи сэвәртсәԓаԓ, пӑ хоп иԓ рӑкнәс.
33 Хӑтԓа йиты йэԓпийән Павел мŏхет хŏԓ ԓэты пойәксәԓы, йастәман: «Тӑм хӑтәԓ ԋӑԓхŏщйаӈмет хатәԓ, хŏты нын, ԓавԓәсман, нэмәԓты ӑт ԓэвман, ԓэтŏтԓы уԓԓәты.
34 Щишән нынан ԓэтыйа пойәкԓыԓам: щиты нын уԓәпсайԓын шавиты туԓт; нэмәԓты ŏтԓән хŏща и ŏхсŏх нын ŏхԓән эԓты иԓ ӑт рӑкәнәԓ».
35 Щит йастәмаԓ кемән пӑ ԋаԋ ўймаԓ йўпийән, ԓўв, хŏйатәт ватман, Турма пўмащипа йастәс пӑ, кӑтна мŏртмаԓ кемән, ԓэты питәс.
36 Щиӈәԋща хŏԓыйэ каркама йисәт пӑ хŏԓыйэ ԓэты питсәт.
37 Паршәӈ хопән мўӈ аратэвән кӑтсот ԓапәтйаӈ хут хŏйат усув.
38 Хун хŏйатәт тӑрәмтыйа ԓэсәт, ԋаԋ ԓат сэми хирәт щарса йŏвәԓман, хоп кенапты питсэԓ.
39 Хун хӑтԓа йис, ԓыв этәм мўв ӑт мŏштәсэԓ, туп мŏԓтты пан тӑйты йик лух шийаԓәсәт, щи хойты нŏмәс версәт, хойты верәтԓа ки.
40 Щӑԓта, йакарәт нŏх ўйәм йўпийән, щарәс хўват мӑтсәт пӑ, сэвәс ԓупԓаԓ хŏԓт эхмеԓ кемән пӑ ай паршэԓ вот хўват нŏх аԓәммеԓ йўпийән, мўв питар пеԓа ԋŏхтәсэԓ.
41 Пан ŏха хойсәт, пӑ хопеԓ сорәм тӑхайа опсәс. Ԋŏԓәԓ иԓ ԓŏӈәс пӑ ӑт ԋŏхԓыйәԓ, сэвсәԓ пӑ хўмпәтән пелки сэкԓа.
42 Ԉаԉ йохәт касна хота омәсты ŏтәт веԓты кашащсәт, мӑтты ŏт ўты ущман ӑт ат хŏнтас.
43 Туп сот ԉаԉ йох куща, Павел ӑратыман, ԓывиԓаԓ щи верэԓ эԓты иԓ вŏԓәтсәԓы пӑ ущты хошты ŏтәта оԓӈа иԓ навәрмәты пӑ мўва ўты ущты партсәԓы,
44 па ŏтәта пӑ хŏйа сохәԓ сурән, хŏйа пӑ мŏԓтты паршәӈ хоп пелкәт сурән ўты йŏхтәптәты партсәԓы; щиты хŏԓыйэ йӑма питара ўшсәт.