6
Malagizo ga Mnazili
1 Mndewa Imulungu kamulongela Musa,
2 “Walongele Waizilaeli vino, ‘Kamba mbigalo hebu mtwanzi yahaiduwila yawe Mnazili, kamba heyo kailava kwa Mndewa Imulungu,
3 avo sikuyang'we divai hebu ugimbi, na sikuyang'we mazi ga zabibu hebu kuja zabibu zipile hebu zinyalile.
4 Kipindi acho chose sikuyaje kinhu chochose kulawa mumzabibu, dikokwa hebu ing'hwembe ya kunze.
5 “ ‘Kipindi acho chose sikuyabee mvili zake, mbaka chahesha acho ikipindi cha kuilava kwa Mndewa Imulungu, yakale yang'alile yazileke mvili zake ziwe nhali.
6 Siku zose viyokala kuno kailava kwa Mndewa Imulungu, sikuyaukwesele mtufi wa munhu yafile,
7 hata kamba yahawa tatake, mamake, mkulu wake hebu mdodo wake hebu lumbu jake, sikuyaifitize kwavija mvili zake zolagusa heyo kailava kwa Mndewa Imulungu.
8 Kipindi acho chose kokuwa kang'ala kwa Mndewa Imulungu.
9 “ ‘Kamba munhu yahafa kwa kusinhukiza behi yake na kuzifitiza mvili zake, avo yabete mbaka siku da saba na kokuwa kang'ala na mdisiku da saba yabee mvili zake.
10 Mna isiku ya nane yamgalile imulava nhosa hana ulwivi lwa dihema da mting'hano huwa wabili hebu makinda mabili ga njiwa.
11 Mulava nhosa yamulave imoja kwa nhosa ya kusegesa nzambi na iyagwe kwa nhosa ya kusoma moto, na heyo komtendela loholo, kwavija katenda nzambi mbuli ya maiti. Siku didijo yaditende pala jake ding'ale,
12 na yailave kwa Mndewa Imulungu kwa siku zake za kuilava. Avo siku za ichanduso hazipetigwa bule kwavija mvili zake zikalile zilavigwe kwa Mndewa Imulungu zifitizigwa. Avo, yagale mwana ng'hondolo wa kimbigalo wa mwaka umoja kamba nhosa ya kulihila gehile.
13 “ ‘Gano gago malagizo ga munhu Mnazili vonda yamambukize siku za kuilava kwa Mndewa Imulungu. Yagaligwe hana ulwivi lwa dihema da mting'hano,
14 na yamulavile Mndewa Imulungu nhosa zake. Mwana ng'hondolo wa kimbigalo wa mwaka umoja yelibule kilema chochose mbuli ya nhosa ya kusoma moto, na mwana ng'hondolo wa kitwanzi wa mwaka umoja yelibule kilema chochose mbuli ya nhosa ya kusegesa nzambi, na ng'hondolo wa kimbigalo yelibule kilema chochose mbuli ya nhosa ya kugala kuilumba.
15 Vivija yagale kigelo kimemile magate hagageligwe hamila, na maandazi ga usage ulibule midundulu na utibwilizigwe na mavuta na vigate visisili vigeligwe mavuta na nhosa ya ndiya na king'waji.
16 “ ‘Mulava nhosa yamulavile Mndewa Imulungu vinhu avo vose na vivija yalave inhosa ya kusegesa nzambi na nhosa ya kusoma moto.
17 Yamulavile Mndewa Imulungu ayo ing'hondolo wa kimbigalo kamba nhosa ya kugala kuilumba vivija yalave na ikigelo cha magate hagageligwe hamila na inhosa ya indiya na iking'waji.
18 “ ‘Aho hana ulwivi lwa dihema da mting'hano, munhu ayo yaiduwile yabee mvili zake na yazigele muumoto ukwaka hasi ya inhosa ya kugala kuilumba.
19 “ ‘Abaho mulava nhosa yasole mkono wa ija ing'hondolo wa kimbigalo kuno ukimusigwe, yamgwee mmakono munhu ayo yaiduwile yahamambukiza kubea mvili zake ziyakalile nazo viyailavile kwa Mndewa Imulungu na vivija yamgwee andazi dimoja hadigeligwe hamila kulawa mkigelo na kigate kimoja kisisili hakigeligwe hamila.
20 Abaho mulava nhosa yavinule uchanha vinhu avo kulagusa kamba vilavigwa kwa Mndewa Imulungu. Vinhu avo vose ving'ala kwa imulava nhosa hamoja na ikidali kinuligwe uchanha na ikihili kilavigwe kamba nhosa. Vinhu avo vose vahatendigwa, munhu ayo yaiduwile kodaha kung'wa divai.
21 “ ‘Gano gago malagizo kwa munhu Mnazili. Nhosa yake kwa Mndewa Imulungu iwe kamba viyaiduwile, hamoja kodaha kwengeza kulava kinhu chochose, heyo kolondigwa kutenda kamba viyaiduwile kamba malagizo gakuilava kwa Mndewa Imulungu vigalonda.’ ”
Kuwatambikila wanhu
22 Mndewa Imulungu kamulongela Musa,
23 “Mulongele Haluni na wanage, ‘Kamba vino vivo vimulondigwa kuwatambikila Waizilaeli. Muwalongele vino,
24 Mndewa Imulungu yawatendele ganogile na yawakalize.
25 Mndewa Imulungu yawamwemwesele mulenge wa kihanga chake na yawonele bazi.
26 Mndewa Imulungu yawenulile kihanga chake na yawagwee tindiwalo.’ ”
27 Mndewa Imulungu kalonga, “Kamba oditambula twaga jangu mbuli ya Waizilaeli, niye nowatendela ganogile.”