19
1 Vinoga kwa mkiwa yogenda mnzila igoloke,
kubanza mbozi yolonga mbuli hazifaya.
2 Havifaya bule munhu kuleka kutanga vinhu,
na munhu yotembela himahima koikwala.
3 Munhu koibananga mwenyego kwa ubozi wake,
na moyo wake omgevuza Mndewa Imulungu.
4 Ugoli omtenda munhu yawe na mbwiga wengi,
lakini mkiwa kolekigwa na mbwiga zake.
5 Msindila wa uvizi honda yalekigwe kutagusigwa,
yolonga uvizi honda yahonyigwe.
6 Wanhu wengi oifeka feka kwa iwakulu,
kila munhu kolonda umbwiga na munhu yolava nhunza.
7 Mkiwa kokwihiligwa na ndugu zake,
mbwiga zake omuleka, hata yahawahembekeza vilihi honda yawapate.
8 Yeli na ubala koinogela loho yake,
munhu mwene nzewele kopata ganogile.
9 Msindila wa uvizi honda yalekigwe kutagusigwa,
na yolonga uvizi kobanangigwa.
10 Haifaya kwa mbozi kukala kwa kuja uhondo,
vokwiha ng'hani kwa mtumwa kuwatawala wakulu zake.
11 Yeli na nzewele hagevuzika himahima,
kuzigela kumgongo mbuli za wanhu awo ukulu wake.
12 Ng'hasiliki ya mndewa kamba simba yong'ula,
lakini unogelwa wake kamba tungwe uchanha ya minoga.
13 Mwana mbozi zumozumo kwa tatake,
na ugomvi wa mtwanzi kamba mawaga ga mvula hagamala.
14 Ng'anda na ugoli awo uhazi munhu kopata kwa tatake,
lakini mtwanzi yeli na nzewele munhu kogweleligwa na Mndewa Imulungu.
15 Unyeke omgela munhu muutulo mkulu,
munhu mnyeke kodununzika na nzala.
16 Yogagoga malagizo kowika goya ugima wake,
yogabezeli malagizo kofa.
17 Yomtaza mkiwa komkopesha Mndewa Imulungu,
Imulungu komuliha kwa unogelwa wake unogile.
18 Mzume mwanago tamanilo ding'hali baho,
lakini sambi umzume mbaka umbanange.
19 Munhu yeli na ng'hasiliki ng'hulu kopata nhaguso,
kwavija wahamulekela mwanza umoja kolondigwa umulekele kabili.
20 Tegeleza magesa na ubokele kuzumwa,
ili kuuhelelo upate ubala.
21 Munhu kopanga mipango yake muumoyo,
lakini choyogesa Mndewa Imulungu acho chonda kiwe.
22 Kinhu kisulukiligwa kwa munhu kutamaniligwa,
vinoga kwa munhu kuwa mkiwa kubanza kuwa mvizi.
23 Kumdumba Mndewa Imulungu kogala ugima,
yomdumba kotendigwa yabwihile,
na honda yapate gehile gogose.
24 Munhu mnyeke kogela mkono mwiisahani,
lakini hagala mbaka mmulomo.
25 Mkoboze munhu yeli na bezi ili zozolo yapate ubala,
mzume munhu mwene nzewele, na heyo kopata kutanga vinhu.
26 Yomdununza tatake na kumuwinga mamake,
mwana hafaya na kogela kinyala.
27 Mwanangu, wahaleka kugoga kuzumwa kwangu,
kosinhukila kwagiza mbuli za kutanga vinhu.
28 Msindila hafaya koibezeli haki,
na mulomo wa munhu yehile omeza gehile.
29 Nhaguso ikigwa mwaka kwa waja weli na bezi,
mbalati zikigwa kuzabula migongo ya wabozi.