20
1 Divai yomtenda munhu yawe na bezi, na ugimbi ogala ugomvi,
munhu yoyose yonogeligwa na vinhu avo kabule ubala.
2 Ng'hasiliki ya mndewa yokuwa kamba simba yong'ula,
munhu yomgevuza haulonda ugima wake.
3 Munhu kuinega na ugomvi yogala kutegelezigwa kumwake,
kwavija wabozi awo ogomba.
4 Mnyeke halima kipindi cha kulima,
kipindi cha kusenga kozahila lakini honda yapate kinhu.
5 Magesa ga munhu gaifisa kamba kidibo cha mazi,
lakini munhu mwene nzewele kodaha kugadeha.
6 Wanhu wengi oigoda kamba wana unogelo hawishaga,
lakini munhu yotamaniligwa kopatikana kwahi?
7 Munhu mwene haki kogenda mnzila igoloke,
wanage kumwande otendeligwa ganogile.
8 Mndewa yokala mkigoda cha nhaguso,
kogabeta gehile gose kwa meso gake.
9 Nani yodaha kulonga, “Nisunha zoyo jangu,
ning'ala na nzambi zangu?”
10 Vinhu mbasakanyo mbasakanyo va uvizi va kupimila,
ngevuzo kwa Mndewa Imulungu.
11 Mwana kotangigwa kwa sang'hano zake,
kamba sang'hano yake inoga na ya kweli.
12 Gwiti dihulika na siso dilola,
vose vibili kavisang'hana Mndewa Imulungu.
13 Sambi uunogele utulo, sambi uwe mkiwa,
uwe meso na gweye kokuwa na ndiya nyingi.
14 Munhu yogula koiyalala, “Hakifaya, hakifaya”
Lakini yahasegela koitapa kahunguzilwa bei.
15 Hana zahabu na mabwe mengi ga bei ng'hulu,
lakini kinhu kifaya ng'hani mbuli za kutanga vinhu.
16 Munhu yahaiduwila kumwikila lahani mgeni sola kiwalo chake,
kigoge kiwalo acho mbaka yalihe lahani iyamwikile mgeni.
17 Ndiya ilondigwa kwa uvizi yamulile,
lakini kumwande mulomo okuwa umema misanga.
18 Mipango yopangigwa kwa kuiuza tanhu,
wahalonda kusonga ng'hondo kolondigwa tanhu upate magesa kulawa kwa wanhu wayagwe.
19 Kidelenya hafisa mbuli,
avo ukale kutali na munhu mulopo.
20 Yomduwila tatake hebu mamake,
taa yake yozimika mdiziza kulu.
21 Uhazi upatikane himahima haichanduso,
honda uwe kinhu kinogile kuuhelelo.
22 Sambi ulonge, “Noliha gehile ganhendeligwe.”
Mbete Mndewa Imulungu na heyo kokutaza.
23 Vipimo va uvizi, ngevuzo kwa Mndewa Imulungu,
vinhu va kupimila va uvizi havinogile bule.
24 Munhu kolongozwa na Mndewa Imulungu,
vino munhu kodahaze kutanga goya nzila yake?
25 Okuwa mtego kwa munhu kulonga himahima kolava kinhu kwa Mndewa Imulungu,
abaho ako kumwande kidogo kogelegeza kabili kuiduwila kwake.
26 Mndewa yeli na ubala kowabeta wehile na kowakoboza bila kuwonela bazi.
27 Choogesa munhu ayo taa ya Mndewa Imulungu,
komulolela munhu geli mgati.
28 Unogelo na kutamaniligwa vomwika goya mndewa,
kwa unogelo wake kigoda chake chokala goya.
29 Ukulu wa wabwanga azo nguvu zao,
ukulu wa wavele uhenga uli mmapala.
30 Nhaguso ilumiza kamba dawa ya kusegesa gehile,
mbalati yosunha moyo mbaka mgati.