8
Bilidadi
1-2 Mwa, yoku m bigatona makawala utuyagila.
Ammakawala kala kaduwonaku bukulilivali vavagi makwaisina?
3 Ka, Yaubada gala avai tuta bikididogi karaiwaga duwosisia;
matauna gala avai tuta bilapi paila bivagi avaka duwosisia.
4 Litumwa kaina leimitugagasi baisa Yaubada,
mapaila matauna leimipuki matausina avaka bibudoki si mitugaga.
5 Mitaga baisa tuta ibodi bukuninavila e bukukwayubabai baisa Yaubada Topeuligaga.
6 Kidamwa yoku saina tokamokwita deli tomigileu,
Yaubada bima bipilasaim
deli bisakaivauwaim m kwaisisu
paila waisala mitilagim.
7 Avaka Yaubada bisakaim tuta oluvi saina bidugaga,
bikalisau komwaidona m veiguwa avaka lokukitumoubogwi.
8 Igau sitana kuninamsi avaka tommoyabogwa si kabitam;
deli kukwatupoi avaka kala kamokwita tubudoiasi si nikoli.
9 Yakidasi da momovasi kukupi wala e gala wala avaka itapuloki ninadaisi;
da tutasi biukuwokuva makawala kaikobu bititamwau avai tuta kalasia bikuboli.
10 Mitaga ibodi tommoyabogwa matausina toninitalapula bivitulokaimsi;
e ibodi bukunakaigali avaka eilivalaisi.
11 Kawasi, “Lei gala ibodi bisusinasi ambaisa saina lubulabu;
gala avai tuta bitabani oyabala.
12 Miyasina gala ibodi bitavigaki katuva kidamwa igau yakikekita,
kidamwa avai tuta dumia bipakala, miyasina wala bimatabogwasi.
13 Availa availa matausina gala inikolaisi Yaubada makawala miyasina lei;
tuta makwaina bilumwelavaisi Yaubada e si pikwaku bogwa wala leiwokuva.
14 Matausina si dubumi makawala kapali bobosu la bwala.
15 Kidamwa bikanuvatetasi okapali, ki, ibodi kapali makwaina bipeula kaina?
Kidamwa bikikolasi yatala miyasina kapali, ki ibodi bipeula e bitomalaulasi?”
16 Tomitugaga bitasusilasi makawala mnumonu bitasusilasi okalasia,
makawala mnumonu bikaligiaki wa bagula.
17 Kailawalisi miyasina bilola odakuna,
e saina peula bikikola odukutotu kwaitala kwaitala.
18 Mitaga oluvi bikamnumonaisi wala biwokuva -
e gala wala availa binikoli makaisina metitokaisila baisa.
19 E tomitugaga si mwasawa bogwa bikalituli;
e tomota ituwoli goli bitasusilasi bikaimapwaisi matausina.
20 Mitaga Yaubada gala wala avai tuta bisilavi tomitukwaibwaila,
e gala avai tuta bipilasi tomitugaga.
21 Matauna bivigakaim bukugova deli m mwasawa,
22 mitaga biyomsili matausina leivigakaimsi tokukolosi yoku,
e tomitugaga si kaisisu bitamwau wala.