9
Yobi
1-2 Mwa, bogwa wala laligilabi vavagi makwaisina.
Mitaga availa ibodi bitomgaga yakala baisa Yaubada?
3 Availa ibodi bisevitai Yaubada?
Matauna ibodi wala bikatupoiyaidasi lakatuluwotala katupoi,
e gala availa ibodi bimapu makwaisina.
4 Yaubada saina tokabitam deli topeuligaga;
e gala availa ibodi bisevitai matauna.
5 Matauna gala biyolibiga bikatupaili wala koya
e deli kala leiya ikosikili makwaisina.
6 Yaubada imotitani valu watanawa metoya likuliku;
e kokolela valu watanawa iiyagi e iyegasi.
7 Matauna ibodi bikaraiwogi kalasia e gala biyuwoula,
deli utuyam gala bipisisi wa bogi.
8 Gala availa ipilasi Yaubada avai tuta eisaili bubuli wa labuma okabasi,
kaina ipilasi matauna wa tuta matutona ivapupoi tapwala minana dokanikani obolita.
9 Yaubada ibubuli utuyam wa labuma -
madalasina yagasi Silubomatu, Tonabwaga, deli Uluwa,
deli madalasina opilibolimila utuyamla.
10 Gala ibodi bitanikolaisi vavagi kabokatubau matauna iuvagi,
deli la kabotuvatusi komwaidona gala kala kalitutila.
11 Yaubada bililoula wala omatagu, mitaga gala wala agigisi matauna.
12 E avaka magila bikau gala wala availa ibodi bisilibodi matauna;
gala availa ituvaluwa bikatupoi matauna kawala,
“Avakaga kuuvagi?”
13 Yaubada kala leiya gala isim kala kalitutila.
Matauna eikatumati kala tilaula komwaidona
availa availa ipilasaisi minana dokanikanila bolita yagala Reyabi,
minana goli eikoulovi matauna.
14 Mapaila ammakawala bavigaki bavitakauloki Yaubada?
15 Ilagoli yeigu tobwaila mitaga ibodaigu wala bakayubabai baisa Yaubada matauna agu toyakala mwada binokapisaigu.
16 E mitaga tuta baisa kidamwa bitugwalaigu babigatona,
e adoki matauna gala wala binakaigali ulo biga.
17 Matauna ilogomsisaigu metoya utuyagila, e tuvaila wala ikatupwaili wowogu,
ilagoli gala wala avaka uula.
18 E olumoulegu bogwa wala eivakasau mmayuyu;
mapaila gala wala ibodi bayagisa.
19 Ki ibodi bayokoli matauna? Ibodi bayokoli Yaubada metoya ogu peula?
Ki ibodi bayakali matauna mwada deli bakala okaboyakala?
Availa ibodi biwitali matauna bila?
20 Yeigu tobwaila wala deli tokimadagi, mitaga ulo biga kala lega sulawokuva wala,
e babani agu kwamwaga metoya avaka avaka lalilivali.
21-22 Yeigu tobwaila wala, mitaga adoki gala wala isim dimlela.
Yeigu bogwa eisomitaki wowogu kala sisu watanawa. Desi wala!
Kaina tobwaila kaina tomitugaga yakidasi,
gala wala avaka.
Yaubada bogwa wala bikatudoumwaidasi.
23 Kidamwa taitala tobwaila biyokopita wala kala kaliga,
Yaubada bivigaki wala kala gigila.
24 Yaubada isaiki tomitugaga valu watanawa si valu.
Matauna ivadudubali mitasi toyakala.
E kidamwa gala Yaubada ivagi makawala,
ki, availaga leivagi baisa?
25 Ulo yam saina wala nanakwa biukuwokuva,
e gala kwaitala makwaisina sitana alumkoli bwaina.
26 Ulo tuta biukuwokuva kala nanakwa makawala waga saina kaisisakaula,
kaina kala nanakwa makawala mluveka eitalakapusi bilupi kala mauna.
27-28 E avai tuta mwada bagigila e bavigikoni balumwelavi agu gidageda,
komwaidona agu mmayuyu ikikeiita wala ikikatululuwaigu bidubadu vavagi mwau.
Bogwa lanikoli Yaubada eidokaigu tomitugaga.
29 E kidamwa bogwa leidokaigu tomitugaga, avaka uula bikaiki wowogu mitugaga makwaisina?
30 Gala wala avai vavagi ibodi biwinisau ulo mitugaga.
31 Yaubada ivisililaigu omlopu makwaina eikasuwoki bulopwasa,
e agu kwarekwa okala gigisa iyomsilaigu wala titoulegu.
32 Kidamwa Yaubada taitala guma watanawa, ibodi wala bamapu la biga;
e kamataiyu wala bakala okaboyakala bakakiduwosisia ma kominimani.
33 Mitaga gala wala availa isisu bitotu oluwalaima okaboyakala,
gala availa ibodi bivagi ma yakala sogu Yaubada.
34 O ulo Yaubada, mwa! desi taga kumipukwaigu!
Desi taga kuvitukukolaigu.
35 Yeigu gala wala bakokola. Ibodi wala balivala
paila bogwa lanikoli avaka balivali onanogu.