64
Nigada paila kabokwala
Mwa Yaubada! Yeigu laboda mwau - kulagi ulo nigada!
Yeigu lakukoli agu tilaula - kukoli ulo momova!
Kukolaigu metoya tomitugaga osi keiwala,
e metoya mabudona tomitugaga.
Matausina isimataisi mayesi makawala kema kala kakata,i
e iiyamwasisi si biga vakatutuki makawala kaiyala.
E matausina saina nanakwa bikayayaisi si sopa gala isim kasi mmosila,
ibigikiumsi wala ikatuveilauwaisi tobubwaila.
Matausina ikikeiwalasi e ikikamwanaisi sesia wala.
Ininamsaisi ambaisa bileiyasi kasi sikula,
e ikaibigasi kawasi, “Gala availa gagabila bigisi sikula makaisina.”
Matausina ininamsaisi uvagila mitugaga, e ikaibigasi kawasi,
“Bogwa tavigibauwaisi nanamsela makwaina sula.”
E tomota ninasi olumoulesi saina nigonigwa.
 
Mitaga Yaubada bilavi la kaiyala baisa matausina,
e saina nanakwa wala bibasi matausina.
Matauna bikatumtuwoli matausina uula wala si biga mabigasina,
e komwaidosi availa availa bigisaisi matausina bikatugougeunasi wala.
Komwaidosi wala bikokolasi.
Bininamsaisi avaka Yaubada bogwa eivagi,
e bilivalaisi vavagi makwaisina.
10 Ka, komwaidona tomitukwaibwaila bimwasawasi
paila avaka Guyau bogwa eivagi.
E bikwalasi baisa matauna.
Komwaidosi tobubwaila biyakawolaisi matauna.
i 64:3 Kaina ililivala paila biga silapulu deli sasopa, kainaga bigala migameguva ivigaki kabosilagi kaina kaliga.