65
Yakaula deli nokagutoki
1 Mwa Yaubada! Ibodaimasi bakayakawolaimsi mapilana Saiyoni,
deli bakavigakaimsi makawala ma katotilasi,
2 paila yoku kumapu ma nigadasi.
Bidubadu mina watanawa biwokaiamsi,
3 paila uula si mitugaga matausina.
Kama pakulasi wala eiyomamaimasi.
Mitaga yoku kuligaiwa ma mitugagasi.
4 Matausina availa availa bogwa lokunagi imwasawasi,
paila kusividuli matausina om Bwala Kwebumaboma.
Yakamaisi kakamsi kakomatasi kalagila m bwala,
makwaisina vavagi bwaina metoya om Bwala Kwebumaboma.
5 Yoku lokuvigaki katomgwagasi, e makawala wala kumapu ma nigadasi,
e kuvagi vavagi saina kabokatubau paila mwada bukukwatumovaimasi.
Mina watanawa avai migila avai migila idubumaimsi.
6 Lokuvitau koya okabasi metoya om peula,
e makawala kuyomitali m peuligaga.
7 Bolita kala kaipolu sainela kuvigaki biniwavila
e butula kaisai bimanum.
Tomota si mowai kuyominum.
8 Valu valu komwaidona itutu ninasi sainela
paila vavagi makwaisina kwevakaveka avaka lokuvagi.
Igisaisi avaka lokuvagi e igovasi deli mwasawa
metoya pilatala valu bila piliyuwela.
9 Kuvakawoli valu watanawa e mapaila kuwitali kuna
e kuvigaki bikabinai sainela.
Kusaiki sopi bidubadu e waya komwaidona ikasewasi
e kusaiki valu watanawa yagogu paila bagula.
E kuuvagi baisa makawala -
10 kuwitali kuna kunoveka ambaisa bogwa eisapwaisi
e sopi isuvi iyopututu.
Pwaipwaia bimanum metoya kunosigosigula
e bivigaki yagogu bitaginapulasi.
11 Ka, ina kwaitala luvabwaila kabanaisi metoya om bobwailila.
Ambaisa ambaisa bukula kuvakawoli, matausina iluvabwailasi.
12 Rigaba ikasewoki avaka avaka
e kawailuwa kasi luvabwaila goli.
13 Sipi saina bidugaga osaivau.
Oitayatila ikasewa bigulela witi.
Vavagi komwaidona deli si mwasawa igougovasi iusiwosisi.