66
Wosila yakaula deli nokagutoki
1 Komwaidomi tomota, kuyakawolaisi Yaubada omi gova deli mwasawa!
2 Kuwosisi kala yakaula matauna Toguyugwayu,
e kukwaigalaisi deli mi yakaula baisa matauna.
3 Kulivalasi baisa Yaubada, kawami, “Isa bwainigaga komwaidona vavagi lokuuvagi!
M peula saina vakaigaga,
mapaila kam tilaula ikukolaimsi e ikululusi ikavaginasi baisa yoku.
4 Komwaidosi mina watanawa ititapwarorusi baisa yoku.
Iusiwosisi kam yakaula
e ikavisaimsi goli.”
5 Kumaisi kugisaisi avaka Yaubada bogwa leivagi.
Matauna iuvagi vavagi kabokatubau oluwalaisi tomota.
6 Matauna bogwa ivigaki bolita imili yabala,
e tubudoiasi iluvapelasi wa waya okaikesi wala.
Mapaila metoya mapilana tamwasawasi uula avaka bogwa leivagi.
7 Matauna la karaiwaga kwepeuligaga gala biwokuva,
e imitakavati boda ituwoli ituwoli.
Taga availa bikosomapu matauna.
8 Yokomi komwaidomi boda ituwoli ituwoli, kuyakawolaisi ma Yaubadasi,
e kukwaigivakavekasi komwaidosi bilegasi.
9 Matauna eiyomovaidasi mauula tasisuaisi bwaina,
e gala bitugwalaidasi kidamwa bitakapusisi.
10 Mwa Yaubada! Yoku bogwa lokuwakolaimasi.
Makawala siliba bikatumigileuwaisi metoya wa kova,
e makawala goli lokuwakolaimasi.
11 Yoku lokutagwala bakawaisi wa sikula,
deli lokusaili koni mwau otupwamaisi.
12 Yoku lokukwasali kama tilaulasi bivakikilaimasi,
e yakamaisi kasuwalaiyaisi kova deli dadoya.
Mitaga tuta baisa bogwa lokumaiyaimasi oviluwela kabokwala.
13 Bamai ulo lula kwegubugabu om bwala.
E balula baisa yoku avaka bogwa lakatotila.
14 Baisa avaka lalivala mwada basakaim tutala laboda mwau,
e bogwa goli basakaim.
15 Sipi bavigaki lula bigabwaisi okabolula,
e balulaga bulumakau nammwala deli gota,
e mseula bila ikalivi gawata.
16 Komwaidomi availa availa kutemmalaisi Yaubada, kumaisi kunakaigalaigusi,
e balukwaimi avaka bogwa eivagi paila yeigu.
17 Ladou baisa matauna paila pilasi,
e layakawoli matauna metoya wa wosi.
18 Kidamwa bakiwoli ulo mitugaga,
Guyau gala wala binakaigalaigu.
19 Mitaga Yaubada mokwitatoula wala bogwa eilagaigu.
Matauna bogwa einakaigali ulo nigada.
20 Mapaila ayakawoli Yaubada,
paila uula gala ikoulovi ulo nigada.
kaina iyusi la mitakwai metoya baisa yeigu.