11
Wofuŋzi fekicne juju‐ticnere fuŋne bataniŋkeme honembiŋ
1 “Ŋoŋe irec hâcne Wofuŋ Anutu‐ŋeŋic erao maŋŋeŋic râepie foha micdâŋ â dâŋsanaŋ erâ mumutâc â sâcmutâc dâŋticne dameŋ sâc mana rereŋ enʒepieŋ.
2 Ehuc Wofuŋ Anutu‐ŋeŋic e ŋoŋerao bâbâtiŋ gie bahuc fekicne juju â tâpiri â mesanaŋ‐ticnere fuŋne bataniŋkewec i hone mana tarac efârenʒepieŋ. (No naru motecfâc‐ŋeŋic jaŋe wiac i fuame hone manac mi embiŋte jaŋere mi mukopac.)
3 Wofuŋzi hâcne Aigita mâreŋko Farao â ŋicfâc‐ticne sasawa jaŋerao wiac ʒâŋe furu â mâsi fuŋne fuŋne ebac ewec.
4 Ehuc Aigita momori ŋic â becâsic keretac wiac‐jeŋichec sipiric‐jopa‐fârewec, erâ jâpec‐ŋopahuc Hâwec Bâbâroŋ fotâcnehapie hâweczi qâuruc‐jopaha Wofuŋzi bâsirowec‐jopawec. Wiac iŋuc fuawec fokac.
5 Wofuŋ e mâreŋ burocnao ehâmo‐ŋare warehuc juha mâreŋ ʒira fisimbiŋ.
6 Erâ ekizia mume mâreŋ fâuckerâ aŋkehuc Rubeŋte ŋokâ Eliaba ere ŋokâ jahec Dataŋ â Abiram â wiacfâc‐jekic erâ qoruc boze â wiac jujunefâc‐jekic sasawa ɋâcjopa‐fârewec.
7 Wofuŋzi wiac sâko ebac ewec i ŋoŋe hâcne ʒâŋe fâri‐ŋeŋiczi honembiŋ.
Mâreŋ biŋe qajarekicne i mazuc mâriri‐ticnehec
8 “Ŋoŋe irec hâcne miŋecgac sâcmutâc dâŋ ŋaza mutâc ekopac i reŋkenʒepieŋ, iŋuc ehuc sanaŋkerâ mâreŋ razo eŋgopieŋ ira raʒirâ ro rauc eniŋmu.
9 Erâ Wofuŋzi mimiŋnefâc‐ŋeŋic â mamac ŋosafâc‐ŋeŋic mâreŋ jareocte mupaŋke‐jarewec ira hâcne dameŋ ʒora juniŋmu. Mâreŋ i susu â baŋac fusucmarâ qâmbâriŋkeekac.
10 Mâreŋ raʒirâ ro rauc eniŋmu i Aigita mâreŋ beherâ warembiŋ iŋucne aricne; ŋoŋe ira hâcne gie‐ŋeŋic he sarac ehuc monʒaŋ gie iŋucne opâ râe jumbieŋ.
11 Mâreŋ ro rauc eniŋmu i ine tiki â wâneŋ‐ticnehec, ehame hoezi hehuc bâgunuckeekac.
12 Mâreŋ i Wofuŋ Anutu‐ŋeŋic e jahac soŋaŋkeekac, ehuc jara moc irec fufuŋkenao fuŋkerâ mâreŋ i hone ʒiziwehuc juhame jara taraekac.
13 “Ŋoŋe miŋecgac sâcmutâc dâŋ ŋaza mutâc ekopac i mana rereŋ ehuc maŋŋeŋic Wofuŋ Anutu‐ŋeŋic erao râepie domaha maŋ qâqâtâc‐ŋeŋiczi kiŋaŋ qacneniŋmuo
14 ine eki mume hoe ʒoaŋ jahe mâreŋ‐ŋeŋic sâckoa bacnehapire padi jacgoŋ erâ waiŋ â oliwa wokemaŋ wiac fua biaŋ eme ro nusec eniŋmu.
15 Erâ Wofuŋzia mume bulimakaofâc‐ŋeŋic jaŋere kecɋaŋ wiac fua biaŋ eocmu. Wiac i sasawa fua‐ŋareme ŋoŋe wâc nâ gapec eniŋmu.
16 Ŋoŋe maŋŋeŋic eatuckehuc Anutu râpeckerâ nemu gâcne kiŋaŋ qajarehuc araŋ bajarenʒipiŋte rucgereŋ‐ŋeŋic bahuc junʒepieŋ. Iŋuc mi eniŋmuo
17 ine Wofuŋzi aaric mana‐ŋarehuc hoe motâc hecneme mâreŋko nânâ mi fuame Wofuŋzi mâreŋ biaŋ ŋare tahac ewec ira biac hâmo miziec efâreniŋmu.
18 “Ŋoŋe irec hâcne sâcmutâc dâŋnane ʒi maŋkehuc mana sakac enʒepieŋ, ehuc qâreŋkerâ meŋeŋicko â mai‐ŋeŋicko bândeŋnepie fozejec.
19 Erâ naru motecfâc‐ŋeŋic qazu‐jarehuc ficko ŋec juc eniŋmu me hata raniŋmu me fo faharec eniŋmu sâc irec dâŋ muc manac enʒepieŋ.
20 Ehuc ficwâtuŋko â sacmotâc‐ŋeŋicko mâmâc qâreŋkepie fozejec wâc.
21 Iŋuc ehuc Wofuŋzi mamacfâc‐ŋeŋic mâreŋ jareocte mupaŋke‐jarewec ira ŋaŋacne â naru motecfâc‐ŋeŋic ŋoŋe sambâŋ â mâreŋ fonicmu sâc dameŋ ʒora jufehuc junʒepieŋ.
22 Ŋoŋe sâcmutâc dâŋ reŋkeniŋte ŋaza mutâc ekopac i aijakic jaha mana rereŋ ehuc Wofuŋ Anutu‐ŋeŋic maŋzi ʒâfickerâ kike hata‐ticne bâjâpehuc erao qohotaniŋmuo
23 ine Wofuŋ e ŋic gurune gurune keci jaŋe jâpec‐jopame ŋoŋere sâc sirickehuc ŋic tâpiri sâkohec juŋgopieŋ jaŋere mâreŋ ro rauc eniŋmu.
24 Eme kike‐ŋeŋiczi mâreŋ âteniŋmu sâc i ŋoŋere biŋe ezejec; mâreŋ burocnaonec fuŋkerâ raku Lebanoŋ tikio tarakac erâ ŋifec Eufrata opâonec fuŋkerâ ware raku Mâreŋ Ŋoŋondeŋ Hâwecko tarakac mâreŋ izi hâcne ŋoŋere biŋe.
25 Ŋic moczi sanaŋkerâ ŋopa jâpec sâcne mi eŋareocmu. Ehame Wofuŋ Anutu‐ŋeŋiczi mupaŋke‐ŋarewec irec sâc ehuc mâreŋ âtehapie ŋic hâhâwic bâfua‐jareocmu.
26 “Manaŋgopieŋ, no miŋecgac jambuŋ â sâwec biŋe qaŋarekopac.
27 Eme ŋoŋe Wofuŋ Anutu‐ŋeŋicte sâcmutâc dâŋ miŋecgac ŋaza mutâc ekopac i mana rereŋ epie jambuŋzi ŋoŋere faio feocmu.
28 Me Wofuŋ Anutu‐ŋeŋicte sâcmutâc dâŋ mana rereŋ mi ehuc miŋecgac hata ŋaza ŋowatuc ekopac i râpeckerâ nemu wiac mi mamana‐ŋeŋic jaŋerao qohotaniŋmuo ine sâwec hotâckeniŋmu.
29 Ŋoŋe Wofuŋ Anutu‐ŋeŋiczi jowac‐ŋopame mâreŋ ro rauc eniŋmu ira fisirâ Geriʒim tikio jambuŋdâŋ munʒepieŋ â Ebali tikio ine sâwecdâŋ munʒepieŋ.
30 Tiki i jahe Jordaŋ opâ ocniŋucnao Giligali hae mendâŋko â More haeo boriŋjâc domaŋgopieŋko erâ Kanaaŋ ŋic Araba wâneŋko juŋgopieŋ jaŋere mâreŋko hata ʒoaŋ huhunaopec fokac irec heririŋnao ŋekopirec.
31 Ŋoŋe Wofuŋ Anutu‐ŋeŋic mâreŋ ŋare tahac eocmu i ro rauc eniŋte Jordaŋ opâ fotâcnezo eŋgopieŋ hâcne.
32 Irec ŋoŋe ira juhuc dâŋsanaŋ â mumutâc dâŋ miŋecgac ŋaza mutâc ekopac i aijakic jaha mana rereŋ efârenʒepieŋ.