12
Wofuŋ e hae mocjahao sawa mai ecnezo
1 “Ŋoŋe dâŋsanaŋ â mumutâc dâŋ ʒine hâcne i Wofuŋ mamacfâc‐ŋeŋic jaŋere Anutuzi mâreŋ ŋare tahac eme ro rauc eniŋmu ira jufeniŋmu sâc aijakic jaha mana rereŋ enʒepieŋ.
2 Ŋoŋe ŋic gurune gurune jaŋere mâreŋ ro rauc ehuc, nemufâc‐jeŋic tikio me mâreŋ facnao me jâc dodomanere fuŋnao kiŋaŋ qajare jumbieŋ hae mâreŋ i ima bafârenʒepieŋ.
3 Ehuc alata wiac‐jeŋic heroc qâropienʒepieŋ, â ɋâŋwâtuŋ wiac‐jeŋic henʒaŋ qanʒaŋnenʒepieŋ, â Aserim ɋâŋ qâqâtâc i ʒocko behepie ʒazejec, erâ nemufâc‐jeŋic jaŋere hawari wiac i hetâc qâtâcnepie ʒâŋe biŋe‐jeŋiczi hae mâreŋ ira omaezejec.
4 Ŋoŋe wiac iŋuc bajuhuc Wofuŋ Anutu‐ŋeŋic araŋ mi bacnenʒepieŋ.
5 Ŋoŋe Wofuŋ Anutu‐ŋeŋiczi guru‐ŋeŋic sâc mâreŋ ro rauc eniŋmu irecnec moc bâwosâe‐ŋarehuc ʒâŋe‐ticnere ŋeŋe hae bâfuame ira ranʒepieŋ.
6 Ehuc qowi bâzi me taha bâzi wiac‐ŋeŋic teŋkonec wâŋ me taha wiac gâcne me mumupaŋ taha me buafec taha me lama bulimakao‐ŋeŋic jaŋeraonec mârâc fufua i sasawa ira râe‐fârenʒepieŋ.
7 Ŋoŋe ira hâcne Wofuŋ Anutu‐ŋeŋicte maio taha bâzire wiac nâ bac enʒepieŋ, ehuc Wofuŋ Anutu‐ŋeŋiczi jambuŋ‐ŋopame wiac hure hemârec embiŋte wiacfâc‐ŋeŋic jaŋehec mu ʒeri enʒepieŋ.
8 Nâŋâc miŋecgac buc buc maŋnâŋecte wiac ebac eeŋgopeneŋ irec sâc mi enʒepieŋ.
9 Ŋoŋe Wofuŋ Anutu‐ŋeŋiczi juju mana â merâfâc mâreŋ ŋareocte muwec ira biac mi fisimbiŋ.
10 Erâ ŋoŋe sifu Jordaŋ opâ fotâcnerâ Wofuŋ Anutu‐ŋeŋiczi mâreŋ ŋareme ro rauc eniŋmu, erâ râsifâc‐ŋeŋic rârec rârec juraŋgopieŋ jaŋe bawahac‐jopame wamao juhâmoniŋmu.
11 Ehame Wofuŋ Anutu‐ŋeŋiczi hae mâreŋ moc bâwosâe‐ŋarehuc ʒâŋe‐ticnere ŋeŋe hae bâfuame ŋoŋe wiac ŋaza mutâc ekopac i ira hâcne bara‐fârenʒepieŋ. Wiac kecʒiŋuc: Qowi bâzi, taha bâzi, wiac‐ŋeŋic teŋkonec wâŋ, taha wiac gâcne, â Wofuŋtao mumupaŋ dâŋ mumbiŋ irec taha wiac sasawa.
12 Ehuc ŋaŋacne mecne, naru motecfâc‐ŋeŋic mecne, kiŋaŋ ŋic ŋokacfâc‐ŋeŋic mecne, ŋoŋe mâmâc Wofuŋ Anutu‐ŋeŋicte maio mu ʒeri enʒepieŋ. Erâ Lewiŋic hae mâreŋ tâmiriczi ŋoŋehec juŋgopieŋ jaŋe mâmâc.
13 Ŋoŋe qowi bâzi‐ŋeŋic i hae mâreŋ maŋŋeŋicte kosa honeniŋmu ira mâcne,
14 Wofuŋzi guru‐ŋeŋic sâc mâreŋ ro rauc eniŋmu irec dâkâne moc bâwosâe‐ŋareme ira hâcne rikenʒepieŋ, ehuc wiac mutâcne‐ŋarekopac i ira wâc ebac efârenʒepieŋ.
Qowi nânâ irec sâcmutâc
15 “Ŋifec ine hae‐ŋeŋic sâc ira qowire eŋareme Wofuŋzi ŋare tahac eekac irec sâc qa hezuc ezo murâ enʒepieŋ; ehame kâte noniŋ â kâte bulimakao nâcjopaeŋgopieŋ iŋuc jaha qowi i ŋic wâwânâŋ tâmiric â wâwânâŋheczi kosa nânʒepieŋ.
16 Socjeŋic ine mi nâhuc opâ omane iŋucne mâreŋko hoŋkepie razejec.
17 Ŋoŋe hae mâreŋ‐ŋeŋicko juhuc wiac kecʒiŋuc ine mi nânʒepieŋ: Padi jacgoŋ me waiŋ me oliwa wokemaŋ wiac‐ŋeŋic irec teŋkonec wâŋ, me lama bulimakaofâc‐ŋeŋic mârâc fufua, me mumupaŋ taha wiac‐ŋeŋic, me buafec taha wiac‐ŋeŋic, me taha wiac fenʒoŋkehuc râeeŋgopieŋ.
18 Ŋoŋe wiac i Wofuŋzi hae mâreŋ bâwosâe‐ŋareocmu ira hâcne ere maio nânʒepieŋ; ŋoŋe ŋaŋacne â naru motecfâc‐ŋeŋic mecne, â kiŋaŋ ŋic ŋokacfâc‐ŋeŋic mecne, erâ Lewiŋic ŋoŋehec hae‐ŋeŋicko jueŋgopieŋ jaŋe mâmâc. Ehuc ŋoŋe meŋeŋiczi gie i me i bapie fua biaŋ eŋareme Wofuŋte maio bubiaŋ manahuc ʒeri enʒepieŋ.
19 Ŋoŋe mâreŋ‐ŋeŋicko jufeniŋmu sâc Lewiŋic hone takirec‐jopanʒipiŋte jaŋere mana mezac ehuc junʒepieŋ.
20 “Wofuŋ Anutu‐ŋeŋic e mupaŋke‐ŋarewec irec sâc mâreŋ‐ŋeŋic bâsokame qowire eŋareme ʒiŋuc muniŋmu: ‘Nâŋe qowi nânʒepeneŋ,’ iŋuc murâ qowi aŋac‐ŋopaocmu sâc nânʒepieŋ.
21 Wofuŋ Anutu‐ŋeŋiczi ʒâŋe biŋe‐ticnere hae mâreŋ bâwosâeocmu i ʒoricko fome ine Wofuŋzi lama bulimakao ŋare tahac ewec jaŋeraonec ŋaza mutâc epo irec sâc ehuc moc qazo murâ qanʒepieŋ. Ehuc qowire eŋareme sâc hae‐ŋeŋicko nânʒepieŋ.
22 Kâte noniŋ me kâte bulimakao nâcjopaeŋgopieŋ iŋuc jaha ehuc ŋic wâwânâŋ tâmiric â wâwânâŋheczi kosa nânʒepieŋ.
23 Mocjaha, socjeŋic ine moc mi nâjâmbâŋkenʒepieŋ, soczi juju ekac, irec soc nâhuc juju mâmâc nânʒipiŋte qowi socnehec mi nânʒepieŋ.
24 Ŋoŋe soc mi nânâ mâc opâ omane iŋucne mâreŋko hoŋkepie razejec.
25 Ŋoŋe ŋaŋacne mecne, â ɋâricfâc‐ŋeŋic jaŋe mecne, Wofuŋte maio wiac ebac epene sâckeekac, i erâ soc mi nâhuc juhâc qâhâmonʒepieŋ.
26 Mâc taha wiac bâtirihuc râeniŋte mukicne erâ mumupaŋ taha wiac i ine Wofuŋzi hae mâreŋ bâwosâe‐ŋareocmu ira baranʒepieŋ.
27 Ehuc qowi bâzi wiac‐ŋeŋic soc biucnehec i Wofuŋ Anutu‐ŋeŋicte alatao râenʒepieŋ, ehuc soc i Wofuŋ Anutu‐ŋeŋicte alatao hoŋkerâ qowi biucne nâzo murâ nânʒepieŋ.
28 Dâŋ ŋaza mutâc ekopac i aijakic jaha mana rereŋ enʒepieŋ, erâ Wofuŋ Anutu‐ŋeŋicte maio wiac ebac epene sâckeekac i ehuc ŋoŋe ŋaŋacne mecne â ɋâricfâc‐ŋeŋic jaŋe mâmâc raŋɋa raŋɋa juhâc qâhâmonʒepieŋ.
Nemu araŋ babajare irec uŋsawaŋ dâŋ
29 “Ŋoŋe Wofuŋ Anutu‐ŋeŋiczi ŋic gurune gurune ʒâŋe fai‐ŋeŋicko bâsirowec‐jopame mâreŋ ro rauc erâ ira ŋec juc eniŋmu.
30 Ehuc jaŋe sirowe‐fârehapie ŋoŋe dockerâ jaŋere kike hata bâjâpehuc nemufâc‐jeŋic jaŋere ʒiŋuc mu wioc enʒipiŋte rucŋeŋic banʒepieŋ: ‘Ŋic gurune gurune keci jaŋe weniŋuc erâ nemufâc‐jeŋic araŋ bajarembiŋ. Jaŋe embiŋ sâc ijaha ezo muŋgopeneŋ.’
31 Ŋoŋe Wofuŋ Anutu‐ŋeŋic iŋuc moc mi ecnenʒepieŋ. Jaŋe Wofuŋzi maname mamakâcne eekac wiac i hâcne ehuc nemufâc‐jeŋic araŋ bajare jumbieŋ, ehuc jaŋere erâ naru motecfâc‐jeŋic rikec‐jopa jumbieŋ wâc.
32 “Ŋoŋe wiac sasawa ŋaza mutâc ekopac i aijakic jaha mana rereŋ enʒepieŋ, ehuc dâŋ moc bârârierâ bebehe me moc ʒuhuckerâ mumu i moc mi enʒepieŋ.