16
Hombaŋ jahec â moc ŋeniŋte mupaŋkekicne
(Wah 23:14–17; 34:18–24)
1 “Wofuŋ Anutu‐ŋeŋic e mosa April ira ŋafeo Aigita mâreŋkonec jowac‐ŋopa wahawecte mosa irec manapie feha Wofuŋ Anutu‐ŋeŋicte manasuhuc aakic hombaŋ ŋenʒepieŋ.
2 Ehuc lama bulimakao gâcne rocjoparâ, Wofuŋzi ʒâŋe‐ticnere ŋeŋe hae bâwosâeocmu ira Wofuŋ Anutu‐ŋeŋicte manasuhuc bâzi rikec‐jopanʒepieŋ.
3 Ŋoŋe bâzi irec poroŋ, ʒârâ ʒâpâ bâzi hâcne, i goreŋ tâmiric nâhuc juhapie ʒoaŋ gie bapa 7 tarazejec. Ŋoŋe Aigita mâreŋkonec fâro faio wahahuc poroŋ i hâcne nâmbiŋ. Irec Aigita mâreŋkonec wahambiŋ dameŋ irec manasuhuc junʒepieŋ.
4 Ŋoŋe mâreŋ‐ŋeŋicko goreŋ moc mi bapa mâc juhapie ʒoaŋ gie bapa 7 tarazejec; erâ hombaŋ fuŋkerâ ŋehuc qowi bâzi rikec‐jopaniŋmu irec tiwâne râepie foha hae mi furezejec.
5 Ŋoŋe aakic hombaŋte bâzi i Wofuŋ Anutu‐ŋeŋiczi hae ŋare tahac eme ro rauc eniŋmu ira moc mi rikenʒepieŋ.
6 Aricne, Wofuŋ Anutu‐ŋeŋiczi ʒâŋe‐ticne foocte hae mâreŋ bâwosâeocmu ira hae owâeme, Aigita mâreŋkonec wahambiŋ dameŋ iŋucnao hâcne aakic hombaŋte bâzi rikenʒepieŋ.
7 Ehuc Wofuŋ Anutu‐ŋeŋiczi hae mâreŋ bâwosâeocmu ira hâcne rike nâc enʒepieŋ. Erâ hae fureme qoruc boze‐ŋeŋic sâc risie rafârenʒepieŋ.
8 Ŋoŋe poroŋ goreŋ tâmiric nâhuc juhapie ʒoaŋ gie bapa 6 tarazejec, ʒoaŋ 7 ira ine Wofuŋ Anutu‐ŋeŋicte manasuhuc tutumaŋ sâko ehuc gie moc mi banʒepieŋ.
9 “Ŋoŋe padi qa roro dameŋ maickeme fârine fuŋkerâ rohuc Sonda wosefekupie 7 ezejec.
10 Sonda 7 tarame woka moc ira ine Wofuŋ Anutu‐ŋeŋicte manasuhuc hombaŋ sâko ŋenʒepieŋ, ehuc Wofuŋ Anutu‐ŋeŋiczi jambuŋ‐ŋopawec irec manasuhuc buafec taha râenʒepieŋ.
11 Erâ otâ ŋokâfâc‐ŋeŋic me kiŋaŋ ŋic ŋokacfâc‐ŋeŋic me Lewiŋic hae‐ŋeŋicko juniŋmu me ŋic jabane â hozec bekâ ŋoŋerao juniŋmu jaŋehec Wofuŋ Anutu‐ŋeŋiczi ʒâŋe‐ticne foocte mâreŋ bâwosâeocmu ira juhuc mu ʒeri enʒepieŋ.
12 Ŋoŋe Aigita mâreŋko kiŋaŋ qaqa jumbiŋ irec manasuhuc dâŋsanaŋ ʒi aijakic jaha mana rereŋ efârenʒepieŋ.
13 “Ŋoŋe padi jacgoŋ â waiŋ wiac‐ŋeŋic ropie fisi‐fâreme rehac boze hombaŋ ŋehuc juhapie ʒoaŋ gie bapa 7 tarazejec.
14 Erâ ŋoŋe otâ ŋokâfâc‐ŋeŋic me kiŋaŋ ŋic ŋokacfâc‐ŋeŋic me Lewiŋic me ŋic jabane â hozec bekâ hae‐ŋeŋicko juniŋmu jaŋehec hombaŋ ŋehuc mu ʒeri enʒepieŋ.
15 Ŋoŋe Wofuŋ Anutu‐ŋeŋiczi hae mâreŋ bâwosâeocmu ira hâcne hombaŋ i ŋehuc juhapie ʒoaŋ 7 tarazejec. Wofuŋ Anutu‐ŋeŋiczi gie bapie jambuŋke‐ŋareha fâri rarau fuame qa roro epie tarame hombaŋ ŋehuc ʒeri bubiaŋ sâko enʒepieŋ.
16 “Ŋicfâc‐ŋeŋic sasawa jaŋe Wofuŋ Anutu‐ŋeŋiczi hae mâreŋ bâwosâeocmu ira jara mocte maŋnao Wofuŋte maio fuapie arec jahec â moc ezejec. Ine aakic hombaŋko, woka hombaŋ ira erâ rehac boze hombaŋko iŋuc enʒepieŋ. Erâ ine Wofuŋte maio metariŋ mi fuanʒepieŋ.
17 Irec Wofuŋ Anutu‐ŋeŋiczi mâriri bâfua‐ŋarewec irec sâc manahuc ru sâc taha râenʒepieŋ.
Mumutara gie bapa irec dâŋ
18 “Ŋoŋe Wofuŋ Anutu‐ŋeŋiczi hae wiac ŋare tahac eocmu ira guru‐ŋeŋic sâc mumutara ŋic â micne fekicne râec‐jopapie jaŋe ŋic ŋokac jaŋerao mumutiŋ gie fâretiŋ jaha banʒepieŋ.
19 Ŋoŋe dâŋ mutiŋnehuc mi muhasickenʒepieŋ, ehuc ŋic dâŋjeŋic sâckoa mutaranʒepieŋ, erâ bâbâmiriŋ moneŋ wâc mi ronʒepieŋ. Bâbâmiriŋ moneŋ ropie maŋŋeŋic sifuckeme ŋic tiŋne jaŋere dâŋ muhasickeniŋmu hâcne.
20 Ŋoŋe tiŋne jujure sawa henʒiriŋnenʒepieŋ, iŋuc erâ Wofuŋ Anutu‐ŋeŋiczi mâreŋ ŋare tahac eocmu i ro rauc erâ juhâc qâhâmoniŋmu.
21 “Ŋoŋe Wofuŋ Anutu‐ŋeŋicte alata baniŋmu irec ŋifecnao Asera nemu ere ma wiac moc mi râepie domazejec.
22 Erâ Wofuŋ Anutu‐ŋeŋiczi ɋâŋwâtuŋ sureekacte moc mi âkendâŋnenʒepieŋ.