17
1 “Ŋoŋe Wofuŋ Anutu‐ŋeŋic lama me bulimakao puriŋ ekicne me huc wichec‐jeŋic taha bâzi moc mi rikecnenʒepieŋ; Wofuŋ Anutu‐ŋeŋic e wiac iŋucne hâcne honeme mamakâcne eekac.
2 “Wofuŋ Anutu‐ŋeŋiczi hae mâreŋ ŋare tahac eocmu ira ŋic me ŋokac moc e Wofuŋ Anuture maio wiac hehesicne ehuc ʒâʒâfic‐ticnere dâŋ bâsueocmu,
3 me nemu wiac gâcne â mosa ʒoaŋ erâ bâpiŋ wiac araŋ bajarehuc kiŋaŋ qajareocmu, wiac qatara‐jarepo i hâcne eocmuo
4 ine manarâ aijakic jaha mu wioc ecnenʒepieŋ. Eme wiac mamakâcne iŋucne Israe ŋondeŋko jâmbomac ekicne, ŋoŋe iŋuc manarâ
5 ŋic me ŋokac wiac hehesicne bâfuawec e haesac râpenao bahurâ qânâzi hehâmonʒepieŋ.
6 Hâmocte biŋe mukicne ŋic ere fuŋne ŋic jajahec me jahec â moc jaŋe mu rituc epie qâhâmonʒepieŋ; ŋic mocjahazi sawa mume ine mi qâhâmonʒepieŋ.
7 Fuŋne‐ticne rituocmu eki fuŋkerâ qazejec, ehame gâcne sâko jaŋe ʒâhec qâhâmonʒepieŋ. Ŋoŋe iŋuc ehuc wiac hehesicne ŋondeŋ‐ŋeŋicko fuame bâsuenʒepieŋ.
8 “Hae‐ŋeŋicko ŋic moczi ŋic âgo‐ticnere soc hoŋkeocmu, me hae mâreŋte hehefaric mu qaqatara sâko fuaocmu, me ŋic moczi ŋic âgo‐ticne qa bâʒâic ecnekume hâmoocmu, me wiac ŋemâcne i me i moc fuarâ siric‐ŋopaocmuo ine dâŋŋeŋic i Wofuŋ Anutu‐ŋeŋiczi hae mâreŋ bâwosâe‐ŋareocmu ira baranʒepieŋ.
9 Ehuc Lewiŋic taha bapa mecne â mumutara ŋic juocmu jaŋe mâmâc mu wioc ejarepie dâŋŋeŋic i hâcne mufâsâenʒepieŋ.
10 Eme jaŋe Wofuŋzi hae mâreŋ bâwosâe‐ŋareocmu ira juhuc dâŋ ŋaza mutâc eniŋmu i mana rereŋ enʒepieŋ.
11 Ehuc hata i me i mutâcne‐ŋarepie bâjâpehuc qanaopec me fâreopec qâsorierâ mi ranʒepieŋ.
12 Eme ŋic moczi maŋfefe ehuc, taha bapa Wofuŋ Anutu‐ŋeŋicte maio domahuc kiŋaŋ gie baekac erâ mumutara ŋic jahere dâŋ qataraocmu ŋic e qâhâmonʒepieŋ. Ŋoŋe iŋuc ehuc wiac hehesicne Israe ŋic ŋondeŋ‐ŋeŋickonec bâsuenʒepieŋ.
13 Ehame ŋic ŋokac sasawa jaŋe manarâ hâwic‐jopame maŋfefe mocwâc mi enʒepieŋ.
Ŋicwofuŋ jujure sâcmutâc dâŋ
14 “Ŋoŋe Wofuŋ Anutu‐ŋeŋiczi hae mâreŋ ŋare tahac eocmu ira fisirâ ro rauc erâ juku ʒiŋuc muniŋmu: ‘Ŋic gurune gurune rârec‐nâporâ juhuc mâsi eeŋgopieŋ iŋuc jaha ehuc ŋicwofuŋ moc âkendâŋnepene junârezejec.’
15 Ŋoŋe Wofuŋ Anutu‐ŋeŋiczi ŋic moc bâwosâe‐ŋareocmu e ŋicwofuŋ âkendâŋnezo murâ âkendâŋnenʒepieŋ. Mâc ŋic furune, qomâ‐ŋeŋic mi juekac e mâcne, qomâfâc‐ŋeŋic jaŋere ŋondeŋkonec ŋic moc ŋicwofuŋ juocte âkendâŋnenʒepieŋ.
16 Mocjaha, e becâsicfâc‐ticne bocjaha mi rocjopazejec, me becâsicfâc‐ticne guru sâko jucneniŋte ŋic ŋokacfâc‐ticne sorec‐jopame Aigita mâreŋko mi risienʒepieŋ; Wofuŋ e ʒiŋuc hâcne ŋazawec: ‘Ŋoŋe mâreŋ ira mocwâc mi risie‐jâmbâŋkenʒepieŋ.’
17 Erâ maŋticnezi Wofuŋ behezacte ŋokac bocjaha wâc mi rocjopazejec, â siliwa â gol hure hemârec boc mi ezejec.
18 “Âkendâŋnepie ŋicwofuŋ erâ juhuc, Lewiŋic taha bapa jaŋe sâcmutâc dâŋte papia bajuŋgopieŋ ira honehuc e jahacne biŋe moc qâreŋkeme fozejec.
19 Focnehame ʒoaŋne ʒoaŋne wose manac ehuc sâcmutâc dâŋ â dâŋsanaŋ i mana rereŋ erâ Wofuŋ Anutu‐ticne araŋ bacnehuc juzejec.
20 Ehuc maŋfefe erâ qomâfâc‐ticne mi mana wahac‐jopazejec, erâ wâc sâcmutâc dâŋ beherâ qâsoriehuc qanaopec me fâreopec mi razejec. E iŋuc ehuc e jahacne â ɋâricfâc‐ticne jaŋe Israe ŋondeŋko ŋicwofuŋ gie dameŋ ʒora bahuc junʒepieŋ.