22
1 “Go qomâgere lama bulimakao wiac moc qâsoriepie hone qâoma mi ejarehuc qomâgerao bârisiec‐jopazemec.
2 Me qomâge e bembeŋko mi juhame mi manacnekicko ine lama bulimakao i go gahacne ficko râec‐jopatec ira juhapie qomâgezi basac‐jopahuc juhame erao bârisiec‐jopazemec.
3 Erâ go qomâgere doŋgi me ŋaqi me wiac i me i moc sifuckeme bâfuarâ ijaha ezemec. Go qomâge bafickecmurâ mi takicguzejec.
4 Doŋgi me bulimakao‐ticne hatao qarâ fohame honerâ mocwâc fahareocte bafickezemec. Go iŋuc ehuc qomâge bafickecmu hâcne.
5 “Ŋokac moczi ŋic ŋaqi moc mi rojuzejec, â ŋic moczi ŋokac ŋaqi wiac moc mi heme huzejec. Moc e iŋuc eocmuzi Wofuŋ Anutu‐ŋeŋicte maio mamakâcne eocmu.
6 “Go jâc hahaŋko me mâreŋko wipe jawa moc bâfuarâ neŋgocnezi hândâŋne me motecne fomackerâ foha honecmu.
7 Go iŋuc honerâ neŋgocne behetec rame motecne go gahacne biŋe rozo murâ rozemec. Iŋuc erâ dameŋ ʒora juhâc qâhâmocmu.
8 “Go fic ɋâricne bahuc bupune sacticnehec bazemec. Ŋic mozi waha qame socticnere kiŋzi go â wiacfâcge ŋoŋere faio fezacte iŋuc hâcne ezemec.
9 “Go waiŋ giegao ukic hawari jajahec mi râezemec. Waiŋ gieo wiac fuaocmu sasawa waiŋ mecne â ukic tiecmu irec fârine i mâmâc jaha tirificte biŋe ezacte iŋuc mi ezemec.
10 Go mâreŋ bâbâfâuc giere bulimakao â doŋgi mâmâc jaha mi râec‐jopazemec.
11 Go ŋaqi qowi kanʒaŋne â qâruruzi ateŋ bakicne mi rojuzemec.
12 “Bilaŋke rufarâ foekic irec qaŋeŋne 4 ira hândâŋne mize razemec.
13 “Ŋic moczi ŋokac moc rorâ ehec fohuc qaisockeocmu,
14 ehuc mimi qaqa ecnerâ qorickehuc ʒiŋuc muocmu: ‘No ŋokac ʒi rorâ ehec fohuc ʒiŋuc hone tarakopac: E ŋokac ʒeŋoŋ mocwâc mi jukac.’
15 Ŋic e iŋuc mume naru ŋokac ere neŋgoc mamac jahe naru‐jekicte fuŋne bataniŋkenicte fofo qoructicne hae soŋaŋ hae ʒoŋao ŋeeŋgopieŋ jaŋerao barazepirec.
16 Ehuc naru mamac‐ticnezi soŋaŋ ʒiŋuc jazazejec: ‘No naru‐nane ŋic keci ŋonâŋ‐ticne eocte râcnepo, eki ine qaisockerâ
17 mimi qaqa ecnehuc ʒiŋuc mukac: Naruge e ŋokac ʒeŋoŋ mocwâc mi jukac, no fuŋne‐ticne iŋuc honekopac.’ Iŋuc muhuc neŋgoc mamac jahe fofo qoruc i haere soŋaŋ jaŋere maio qaratiezepirec.
18 Iŋuc epire hae irec soŋaŋ jaŋe ŋic e rorâ kâcbiŋzi qanʒepieŋ.
19 Ehuc siliwa moneŋ 100 râeocte mucnenʒepieŋ. Eme ŋic e Israe naru ʒeŋoŋ ere ʒâŋe biŋe bawahawecte moneŋ i kimo‐ticne râcnezejec, ehuc naru e rome ŋonâŋ‐ticne erâ juha mocwâc mi behe‐jâmbâŋkezejec.
20 Me naru e juwicnao ŋic gâcne jaŋehec juwec, iŋuc mana taraniŋmuo
21 ine mamac‐ticnere ficmotâcko râepie domaha hae irec ŋic jaŋe qânâzi hehâmonʒepieŋ. E mamac‐ticnere ficko sasec gie bahuc Israe maŋnao wiac miminehec bâfuawecte iŋuc hâcne ecnenʒepieŋ. Ŋoŋe iŋuc ehuc ŋondeŋ‐ŋeŋicko wiac hehesicne bârârienʒepieŋ.
22 “Ŋic moczi ŋic mocte ŋonâŋhec fohapire bâfuac‐jofarâ ŋic ŋokachec fowec e mecne erâ ŋokac mecne mâmâc jaha qâhâmoc‐jofanʒepieŋ. Ŋoŋe iŋuc ehuc Israe ŋondeŋ‐ŋeŋicko wiac hehesicne bârârienʒepieŋ.
23 “Ŋokac ʒeŋoŋ ŋic mocte biŋe qakicne e haeo juha ŋic moczi bâfuarâ ehec foocmuo
24 ine jahe mâmâc jaha haesac motâc râpenao bacjofa hurâ qânâzi hehâmoc‐jofanʒepieŋ. Naru ŋokac e haeo juipiehuc bafickeniŋte mi owackewec â ŋic e ine âgo‐ticnere ŋokac bâsâqorewec irec. Ŋoŋe iŋuc ehuc ŋondeŋ‐ŋeŋicko wiac hehesicne bârârienʒepieŋ.
25 “Me ŋic moczi ŋokac ʒeŋoŋ ŋic mocte biŋe qakicne i hae hatao bâfuame ehec fohapire bâfuac‐jofaniŋmuo ine ŋic e sawa qâhâmonʒepieŋ.
26 Ŋokac erao bâbâsifuc hâmocte biŋe mi fokacte wiac moc mi ecnenʒepieŋ. Mâsi i ŋic moczi ŋic âgo‐ticne qâhâmoocmu irec sâc.
27 Ŋokac e hae hatao juhame ŋiczi fuacneme gâcne jaŋe bafickeniŋte owacke‐bipiewec hâcne.
28 “Me ŋic moczi ŋokac ʒeŋoŋ ŋic mocte biŋe mi qakicne iŋucne moc bâfuame ehec fohapire bâfuac‐jofaniŋmuo
29 ine ŋic ŋokachec fowec e ŋokac mamac‐ticne siliwa moneŋ 50 râcnezejec, ehuc ŋokac bâsâqorewec e ŋonâŋ‐ticne barâ mocwâc mi behe‐jâmbâŋkezejec.
30 “Ŋic moczi mamac‐ticnere ŋonâŋ mi rozejec, erâ mamac‐ticne mimi qaqac wâc mi ecnezejec.