23
Wofuŋte kikefuŋko mi jujune jaŋere dâŋ
1 “Biŋhândâŋ‐jeŋic bakicne â sahac tofa‐jeŋic hetâcnekicne jaŋe Wofuŋte kikefuŋ guruo mi junʒepieŋ.
2 “Â soc sisifucko fuakicne jaŋe gaŋne gaŋne jufekupie arecne 10 ehame wâc sifu Wofuŋte kikefuŋko mi junʒepieŋ.
3 “Amoŋŋic me Moabi ŋic jaŋe wâc iŋuc jaha Wofuŋte kikefuŋ guruo mi ʒuhuckenʒepieŋ, ehuc ɋâricfâc‐jeŋic jaŋe gaŋne gaŋne jufekupie arecne 10 ehame wâc sifu mi ʒuhuckenʒepieŋ.
4 Jaŋe hâcne ŋoŋe Aigita mâreŋkonec waharâ wefuhapie hatao nânâ opâ wiac moc mi gumec‐ŋopambiŋ, erâ wâc Mesopotamia mâreŋkonec, Petoro haeonec ŋic moc ʒâŋene Beoro ere ŋokâ Bileam e sâwec‐ŋopaocte mu qafeŋ ecnehuc furine râcnezo mumbiŋ.
5 Eme Wofuŋ Anutu‐ŋeŋiczi ine sifu Bileam mi manacnehuc sâwecdâŋ‐ticne i hetikieme jambuŋdâŋ ewec. Wofuŋ Anutu‐ŋeŋiczi ŋoŋere boc ecnewecte iŋuc hâcne ewec.
6 Jaŋe juhâc qâhâmonʒipiŋte jaŋerao eehâmo gie mi bahuc junʒepieŋ.
7 “Edomŋic jaŋe qomâfâc‐ŋeŋic juŋgopieŋte mi qaisoc‐jopanʒepieŋ â Aigita ŋic jaŋere mâreŋko jaba jumbiŋte wâc mi qaisoc‐jopanʒepieŋ.
8 Jaŋere ɋâricfâc jaŋe jufekupie arecne 3 ehame Wofuŋte kikefuŋko ʒuhuckezo murâ sâcne ʒuhuckeniŋmu.
Teuŋ‐jeŋiczi petâc foocte mukicne
9 “Ŋoŋe râsifâc‐ŋeŋic jopaniŋte ʒikao rarâ teuŋko juhuc wiac sâqocne sasawa dic bacnenʒepieŋ.
10 “Me ŋoŋeraonec ŋic moc e ŋafeo sahac tofa‐ticnere opâ wahame wâwânâŋhec eocmuo ine teuŋ râpenao hurâ juzejec.
11 Juku hae owâehame opâ ruarâ ʒoaŋ hume teuŋko risiezo murâ risiezejec.
12 “Ŋoŋe teuŋ râpenao mâreŋ ŋondeŋne moc ho fâzire biŋe mupie fozejec.
13 Ehame ʒikare wiac â sua i mâmâc bajunʒepieŋ. Ehuc ho fâzire eŋareme mâreŋ ŋondeŋ ira hurâ suazi mâreŋ qâfierâ ho fâzi enʒepieŋ. Epie tarame hemackenʒepieŋ.
14 Wofuŋ Anutu‐ŋeŋic e ŋondeŋ‐ŋeŋicko juhuc bafic‐ŋoparâ râsifâc‐ŋeŋic meŋeŋicko râec‐jopazo ekacte teuŋ‐ŋeŋic pectâc fozejec. E ŋoŋerao wiac mamakâcne honerâ râpec‐ŋopazacte iŋuc hâcne enʒepieŋ.
Sâcmutâc dâŋ gâcne gâcne
15 “Kiŋaŋ qaqa moc e bomboŋ‐ticne beherâ ŋoŋerao fisime bomboŋ‐ticnerao mi bârisienʒepieŋ.
16 E hae‐ŋeŋic ira me ira juocte ecneme ŋoŋehec juzejec; ehame qa bâʒâic mi ecnenʒepieŋ.
17 “Israe ŋic ŋoŋere otâ â ŋokâfâc jaŋeraonec moczi moc taha ufuŋko sasec gie moc mi bazejec.
18 Me moc e mumupaŋ‐ticnere fârine bâfuaocte ŋicte me ŋokacte sasec furi i Wofuŋ Anutu‐ŋeŋicte ufuŋko wâc mi bafezejec; Wofuŋ Anutu‐ŋeŋic e wiac irec â irec mâmâc maname mamakâcne eekac hâcne.
19 “Ŋoŋe moneŋ me nânâ wiac me wiac gâcne i me i ŋic omane jarehuc furine roeŋgopieŋ, wiac iŋucnea i qomâfâc‐ŋeŋic jarepie mâc bajunʒepieŋ. Â ŋic furune jaŋeraonec furine rozo murâ sâcne roniŋmu, qomâfâc‐ŋeŋic jaŋeraonec ine mi ronʒepieŋ.
20 Ŋoŋe iŋuc eniŋmuo ine mâreŋ ro rauc eniŋmu ira juhuc gie i me i bahapie Wofuŋ Anutu‐ŋeŋiczi jambuŋke‐ŋareocmu.
21 “Ŋoŋe Wofuŋ Anutu‐ŋeŋic dâŋ moc mupaŋkecneniŋmuo ine irec fârine bâfuaniŋte qâoma mi enʒepieŋ. Wofuŋ Anutu‐ŋeŋic e iŋuc hâcne eniŋte muekac, fârine mi bâfuaniŋmu ine kiŋhec eniŋmu.
22 Me mumupaŋ dâŋ mi muniŋmuo ine kiŋ tâmiric eniŋmu.
23 Mâc ŋoŋe maŋŋeŋiczi afeckeha Wofuŋ Anutu‐ŋeŋic dâŋ moc mupaŋkecneniŋmuo ine irec manasurâ fârine wâc bâfuanʒepieŋ.
24-25 “Ŋoŋe âgofâc‐ŋeŋic jaŋere waiŋ gieo rarâ waiŋ hândâŋne nâzo murâ nâ gapec enʒepieŋ, mâc heŋeŋicko ine mi ŋienʒepieŋ. Me âgofâc‐ŋeŋic jaŋere jacgoŋ gieo rarâ jacgoŋ fârine wackezo murâ wackenʒepieŋ, mâc jâcnehec ine mi qanʒepieŋ.