24
Ʒuhuc bâtâcte sâcmutâc
1 “Ŋic moc e ŋokac moc ŋonâŋ‐ticne barâ juku, ŋokac e bahac‐ticnehec, iŋuc manarâ ʒuhuc bâtâcte papia moc qâreŋkerâ râcnehuc soreme ficticne beherâ razejec.
2 Ra juhame ŋic moczi mecne roocmu.
3 Eme e juku wâc iŋuc jaha ŋokac ere maname mi sâckeme ʒuhuc bâtâcte papia jaha qâreŋkerâ râcnehuc soreme ficticne beherâ razejec. Me ʒâhec ŋowe‐ticnezi ŋonâŋ‐ticne juocte rowec e hâmome
4 mârâc ŋowe‐ticnezi soreme rawec e mocwâc mi rozejec. Ŋokac e ro behec ecnepie wâwânâŋhec ewecte iŋuc hâcne ezo. Wiac iŋucne i Wofuŋ Anutu‐ŋeŋicte maio mamakâcne eekac hâcne. Irec ŋoŋe Wofuŋ Anutu‐ŋeŋiczi mâreŋ ro rauc eniŋte biŋe qaŋarewec i mi bâsâqorenʒepieŋ.
5 “Ŋic moczi ŋokac ɋâricne rorâ momori jaŋehec ʒikao mi razejec â gie niŋgiŋ ʒiriŋ‐ticnehec wâc mi râcnenʒepieŋ. Ŋic e ŋokac rowec ehec bubiaŋ faio junicte mâc juhame jara wâŋ tarazejec.
Sâcmutâc dâŋ gâcne gâcne
6 “Ŋic moc e ŋic âgo‐ticne wiac moc râcnehuc okacne nânâ opâ‐ticne mi jâoc rozejec; nânâ opâ jâoc rohuc juju‐ticne sipirickeocmu hâcne.
7 “Ŋic moc e Israe ŋic âgofâc‐ticne jaŋeraonec ŋic moc fiuc rorâ e jahacne kiŋaŋ qaqa baocmu me moneŋte erâ ŋic moc râcneocmuo ine fiuc roro ŋic e qâhâmonʒepieŋ. Ŋoŋe iŋuc epie hehesiczi ŋondeŋ‐ŋeŋicko omaeocmu.
8 “Ŋoŋe wicsanaŋ fua‐ŋareme aimuŋ, sosoŋaŋ ehuc junʒepieŋ, ehuc Lewiŋic taha bapa jaŋe dâŋ ŋaza ŋowatuc eniŋmu sâc reŋke‐fârenʒepieŋ. Ehuc dâŋ jaza mutâc epo irec sâc jâmbâŋ wiac efârenʒepieŋ.
9 Erâ Aigita mâreŋkonec waharâ juhapie Wofuŋ Anutu‐ŋeŋic eki Miriam wicsanaŋ bâfuacnewec irec manasuhuc junʒepieŋ.
10 “Ŋoŋe ŋic âgo‐ŋeŋic wiac i me i hotâ bajuocte râcnerâ ŋaŋaczia ficticnao ferâ wiac irec okacne mi ronʒepieŋ.
11 Aricne, ŋoŋe hae ʒoŋao domahapie ŋic e jahac okacne ŋarezejec.
12 Me ŋic e hapetac juhuc wiac irec okacne ŋareocmuo
13 ine ŋoŋe bajuhapie hae mi ŋafeha mocwâc bârisiecnenʒepieŋ, eme e bilaŋke‐ticne rufarâ fohuc ŋoŋere maname biaŋkezejec. Ŋoŋe iŋuc epie Wofuŋ Anutu‐ŋeŋiczi mana‐ŋareme sâckezejec.
14 “Ŋoŋe kiŋaŋ qaqafâc‐ŋeŋic hapetac â qarâ suriŋne, qomâfâc‐ŋeŋic me ŋondeŋ‐ŋeŋicko jaba kiŋaŋ qaŋareeŋgopieŋ, jaŋe bâʒâic‐jopahuc gie furi‐jeŋic mi sakare‐jarenʒepieŋ.
15 Jaŋe gie baŋareniŋmu ʒoaŋ gie bapa ijaha hae mi ŋafeha gie furi jarenʒepieŋ. Jaŋe hapetac juhuc dope boc basarâ Wofuŋtao kio wâwâsic epie ŋoŋe kiŋhec enʒipiŋte iŋuc hâcne enʒepieŋ.
16 “Mamac jaŋe naru motecfâc‐jeŋic jaŋere hehesicte erâ mi qâhâmoc‐jopazo â naru motec jaŋe mamacfâc‐jeŋic jaŋere hehesicte erâ wâc mi qâhâmoc‐jopazo. Aricne, ŋic sasawa ru sâc jaŋe jaŋacne hehesicte erâ qâhâmoc‐jopazo.
17 “Ŋoŋe ŋic jabane me bekâ mâsiŋ jaŋere dâŋgie bahuc dâŋjeŋic mi muhasickenʒepieŋ, â hozec moc hone bafic ecnehuc okacne ŋaqi‐ticne mi jâoc ronʒepieŋ.
18 Wofuŋ Anutu‐ŋeŋiczi Aigita mâreŋko kiŋaŋ qaqa jumbiŋkonec batarac‐ŋopawecte iŋuc eniŋte dâŋ ʒi ŋaza mutâc ekopac hâcne.
19 “Ŋoŋe qa roro dameŋko padi wiac ro bâtiric epie foekac i risierâ mi ronʒepieŋ, i ŋic jabane â hozec bekâ jaŋere biŋe fozejec. Iŋuc epie Wofuŋ Anutu‐ŋeŋiczi giegaŋ‐ŋeŋic jambuŋke‐fâreocmu.
20 Me woraŋ âtepie fârine wahaocmu i sawa ro nusec efârenʒepieŋ. Ʒâhec risierâ ine mocwâc mi âtenʒepieŋ. Gâcne ŋeocmu ine ŋic jabane â hozec bekâ jaŋere biŋe ŋezejec.
21 Ŋoŋe waiŋ hândâŋne qa roro ehuc gâcne bâtiripie foocmu i ʒâhec risierâ mi ronʒepieŋ, i ŋic jabane â hozec bekâ jaŋere biŋe fozejec.
22 Ŋoŋe Aigita mâreŋko kiŋaŋ qaqa jumbiŋ irec manasuhuc junʒepieŋ; iŋuc hâcne eniŋte dâŋ ʒi ŋaza mutâc ekopac.