29
Wofuŋzi Moabi mâreŋko Israe ŋic jaŋere ʒâʒâfic moc ewec
1 Israe ŋic jaŋehec Horebe tikio ʒâʒâfic raŋɋane ekicne i foha faicnao Mose e Wofuŋzi âzâcne mutâc eme jaŋehec ʒâʒâfic ɋâricne mocwâc ewec irec dâŋ ʒine hâcne.
2 Eme Mose e Israe ŋic ʒeŋgoma hetumaŋ‐joparâ dâŋ kecʒiŋuc jazawec: “Ŋoŋe Wofuŋzi Aigita mâreŋko ʒâŋe fai‐ŋeŋicko Farao â kiŋaŋŋicfâc‐ticne sasawa â hae mâreŋ‐ticne sasawa wiac ejarewec i hone‐fârembiŋ.
3 Wiac kecʒiŋuc: Tâpiri‐ticnere fuŋne bataniŋkeme honembiŋ, erâ fuŋne qaqa mâsi â wiac ʒâŋe furu gâcne bâfuame hone manac embiŋ.
4 Erâ i sifu maŋsanaŋ‐ŋeŋicte erâ Wofuŋzi maŋŋeŋic mi baafeckeekacte wiac mi mana taraeŋgopieŋ, â ʒâŋe‐ŋeŋic mi bâtâcneekacte wiac mi hone taraeŋgopieŋ, â hazec‐ŋeŋic mi bâuŋtoekacte iŋuc jaha wiac mi mana taraeŋgopieŋ.
5 No mâreŋ sawao jara 40 jowa qataŋ eŋarehuc juhape ŋaqi qoruc‐ŋeŋic tâcne ʒaŋ mi ewec â kikehuhu wiac‐ŋeŋic mi suckewec.
6 Ŋoŋe Wofuŋ e Anutu‐ŋeŋic jukac, iŋuc mana taraniŋte nânâ poroŋ me waiŋ opâ me opâ sanaŋ gâcne mi nânâ Wofuŋzi nânâ bâfua‐ŋarewec i sawa nâjumbieŋ.
7 Juku hae mâreŋ ʒirâ ware fisipene Hesiboŋ ŋicwofuŋ ʒâŋene Sihoŋ erâ Basaŋ ŋicwofuŋ ʒâŋene Ogo jahe râsi ronârerâ fisipire qaqac ehuc bawahac‐jofambeŋ.
8 Ehuc mâreŋ‐jekic jofac rorâ Rubeŋ â Gade erâ Manase ŋicguru dâkâne jaŋe ro rauc erâ ira juniŋte jarembeŋ.
9 Irec ŋoŋe wiac sasawa ebac epie fârinehec eocte ʒâʒâfic kecʒirec dâŋ i aijakik jaha mana rereŋ enʒepieŋ.
10 “Ŋoŋe miŋecgac ʒeŋgoma Wofuŋ Anutu‐nâŋecte maio doma‐fâreŋgopieŋ; guru‐ŋeŋic sâc irec micne â soŋaŋfâc‐ŋeŋic erâ momorifâc‐ŋeŋic jaŋere micnefâc, Israe ŋic sasawa hâcne.
11 Erâ ŋokac naru motecfâc‐ŋeŋic â teuŋ‐ŋeŋicko ŋic jabane jueŋgopieŋ erâ ʒoc opâ roŋareeŋgopieŋ jaŋe mâmâc.
12 Ŋoŋe Wofuŋ Anutu‐ŋeŋiczi miŋecgac ŋoŋehec ʒâʒâfic ekac irec maŋnao juniŋte iŋuc hâcne eŋgopieŋ.
13 Ehuc Wofuŋ Anutu‐ŋeŋiczi miŋecgac ŋicfâc‐ticne bacŋopahuc ŋoŋe â mamacfâc‐ŋeŋic mupaŋke‐ŋarewec irec sâcko Anutu‐ŋeŋic erâ juocte ere maio domaŋgopieŋ hâcne.
14-15 Ehame no miŋecgac Anuture maio domaŋgopieŋ ʒi ŋoŋehec sawa mâcne, ɋâricfâc‐ŋeŋic ʒâhec fua rahuc juniŋmu jaŋehec ʒâʒâfic ʒi mâmâc ekopac.
16 “Nâŋâc Aigita mâreŋko weniŋuc ehuc jumbeŋ i ŋoŋe mana‐fâreŋgopieŋ. Erâ ŋic gurune gurune jaŋere mâreŋ fotâcne warehuc
17 nemuɋâŋ jâc me qânâ me siliwa me golzi bapie ŋerawec i hone‐fârembiŋ.
18 Irec miŋecgac ŋoŋeraonec ŋic me ŋokac me garikiŋ moc me ŋicguru i me i moczi Wofuŋ Anutu‐ŋeŋic râpeckerâ ŋicguru i jaŋere nemuɋâŋ wiac kiŋaŋ qajarenʒipiŋte me ŋondeŋ‐ŋeŋicko wiac sâqocnere gâtâ qafeŋzi fua soka erâ fârine ŋiŋiŋne â hâtâne fuazacte rucgereŋ‐ŋeŋic bahuc junʒepieŋ.
19 Irec ŋoŋeraonec ŋic moczi ʒâʒâfic kecʒirec mumupaŋ manarâ maŋzi ʒeri ehuc dâŋ ʒiŋuc mi muzejec: ‘No maŋsanaŋ‐nanere hata bâjâpehuc sifu juhâc qâhâmopemu.’ Ŋoŋe iŋuc ehuc sisipiricte biŋe efâreniŋmu hâcne.
20 Wofuŋ e ŋic iŋucnere sâqocne mi bâtâmirehuc kimbeŋ â ʒoɋac‐ticnezi qa imac ecneha papia kecʒirec maŋnao sâwecdâŋ qâreŋkekicne fokac izi ere biŋe efâreocmu, ehame Wofuŋzi ŋic ere ʒâŋe bâtâmireme mâreŋko omaeocmu.
21 Eme Wofuŋzi ŋic e Israe gurune gurune ŋoŋere ŋondeŋkonec rorâ ʒâʒâfic kecʒirec mumutâc papiao sâwecdâŋ fokac irec sâcko tuŋkeme hurâ sisipiricte biŋe eocmu.
22 Eme Wofuŋzi mume mâreŋ ʒi â ŋecjucfâc‐ticne jaŋerao ʒârâ hâriŋ me huc mimicne fuaocmu i ɋâricfâc‐ŋeŋic jaŋe mecne â ŋic jabane mâreŋ ʒorickonec wareniŋmu jaŋe mâmâc honeniŋmu.
23 Erâ mâreŋ i kereŋke‐fâreme ŋiczi he sarac sâcne mi eniŋmu â sopâc kecɋaŋzi wâc sâcne mi wefuocmu; iŋuc honehuc juhapie Wofuŋ e aarickeme Sodom â Gomora erâ Adama â Zeboim hae mâreŋ bâsirowec‐jopawec irec sâc fuame honeniŋmu wâc.
24 Iŋuc honerâ jaŋacne mecne â ŋic gurune gurune jaŋe mecne mâmâc ʒiŋuc mu wioc eniŋmu: ‘Wofuŋ e wemocte mâreŋ ʒira sisipiric iŋucne bâfuawec, â wemocte boc aarickekac?’
25 Iŋuc mu wioc epie ŋic jaŋe dâŋ okacne ʒiŋuc bâtikie‐jareniŋmu: ‘Wofuŋ Anutu‐jeŋiczi mamacfâc‐jeŋic Aigita mâreŋkonec jowac‐jopa wahahuc jaŋehec ʒâʒâfic ewec, ʒâʒâfic i râpeckembiŋte iŋuc hâcne fua‐jarekac.
26 Jaŋe nemu burecne mi manac‐jopambiŋ â Wofuŋzi wâc mi bâfua‐jarewec jaŋe hâcne araŋ bajarehuc dape‐jarembiŋ.
27 Irec erâ Wofuŋte aariczi bâruŋkeme papia kecʒirec maŋnao sâwecdâŋ qâreŋkekicne fokac irec sâcko mâreŋ ʒi sipirickekicne.
28 Ehame Wofuŋzi mana gâpâre‐jarehuc aarickeme mâreŋ‐jeŋickonec unuc‐joparâ mâreŋ mocko bacjopa rarâ behec‐jopame jumbiŋzi juŋgopieŋ jaha.’
29 “Wiac soŋsoŋko fokac i Wofuŋte biŋe, â wiac bararuŋkekicne i nâŋâc â ɋâricfâc‐nâŋec nâŋâcne biŋe, irec sâcmutâc kecʒirec dâŋ fokac i sasawa mana rereŋ ehuc junʒepieŋ.