30
Maŋjeŋic bârisiepie Wofuŋzi ehâmo‐jareocmu
1 “Wofuŋ Anutu‐ŋeŋiczi bâtâtiec‐ŋopame ŋicne ŋicne jaŋere ŋondeŋko juhapie miŋecgac jambuŋ â sâwecdâŋ ŋaza mutâc ekopac izi fai‐ŋeŋicko feme irec manasunʒepieŋ.
2 Ehuc ŋaŋacne â ɋâricfâc‐ŋeŋic ŋoŋe Wofuŋ Anutu‐ŋeŋictao risierâ miŋecgac dâŋ ŋaza mutâc ekopac i maŋ mamanasu‐ŋeŋiczi manatâc qâtâc ehuc reŋke‐fârenʒepieŋ.
3 Iŋuc eniŋmuo ine Wofuŋ Anutu‐ŋeŋiczi kâpâcwâruonec batarac‐ŋoparâ busâqoc mana‐ŋarehuc ŋic gurune gurune jaŋere ŋondeŋko bâtâtiec‐ŋopawec irecnec mocwâc qâzuc‐ŋopaocmu.
4 E mâreŋ qaŋeŋnao bâtâtiec‐ŋopaocmuo ine sifu irecnec mocwâc rocŋoparâ mâreŋ‐ŋeŋicko bârisiec‐ŋopaocmu.
5 Ehuc mamacfâc‐ŋeŋic jaŋe mâreŋ ro rauc embiŋ ira râec‐ŋopame ro rauc erâ mamacfâc‐ŋeŋic jaŋere sâc sirickehuc basawec‐ŋopame juhâc qâhâmonʒepieŋ.
6 Ehame Wofuŋ Anutu‐ŋeŋic e ŋaŋacne â ɋâricfâc‐ŋeŋic ŋoŋe baafec‐ŋopame maŋŋeŋic erao furu jaha râepie foha juhâmonʒepieŋ.
7 Iŋuc epie Anutu‐ŋeŋiczi sâwecdâŋ sasawa i râsifâc‐ŋeŋic kisâ eŋarehuc ŋopa jâpec eŋarembiŋ jaŋere faio râeme feocmu.
8 Ehame ŋoŋe ine Wofuŋ noni miŋecgac sâcmutâc dâŋ ŋaza mutâc ekopac i mocwâc mana rereŋ enʒepieŋ.
9 Eme Wofuŋ Anutu‐ŋeŋiczi jambuŋ‐ŋopame meqâreŋ wiac‐ŋeŋic mecne, ɋâricfâc‐ŋeŋic jaŋe mecne, bulimakaofâc‐ŋeŋic jaŋe mecne erâ giegaŋ wiac‐ŋeŋic sasawa i fua babaraŋ fua raocmu. Wofuŋzi mamacfâc‐ŋeŋic buafec jaha ehâmo‐jarewec irec sâc jaha ŋoŋe ehâmo‐ŋareocmu.
10 Ŋoŋe Wofuŋ Anutu‐ŋeŋicte dâŋ mana rereŋ ehuc sâcmutâc dâŋ â dâŋsanaŋ‐ticne mumutâc papia kecʒirec maŋnao qâreŋkekicne fokac i bajuniŋmu, ehuc maŋ â mamanasu‐ŋeŋic Wofuŋ Anutu‐ŋeŋictao furu jaha râepie foocmuo ine iŋuc hâcne eŋareocmu.
11 “Sâcmutâc dâŋ miŋecgac ŋaza mutâc ekopac i dâŋ ŋemâcne aricne, erâ ʒoricko wâc mi fokac.
12 Sambâŋko mi fokacte ʒiŋuc mi muzo: ‘Mozi ferâ bawaha‐nâreme mana rereŋ enaŋmu?’
13 Me hâwec ocniŋucnao wâc mi fokacte ʒiŋuc mi muzo: ‘Mozi hâwec fotâcnerâ baware‐nâreme mana rereŋ enaŋmu?’
14 Aricne, sâcmutâc dâŋ i maŋfuŋ‐ŋeŋicko jâmbâŋ fokac, ŋoŋe mana rereŋ eniŋte maŋŋeŋicko â micbipic‐ŋeŋicko râekicne fokac hâcne.
15 “Manaŋgopieŋ, no miŋecgac wiac aŋac baŋacne â juju fârine ŋowatukopac, erâ ŋifec ine eebapa sâqocne â hâmoc irec hata wâc mâmâc ŋaza mutâc ekopac.
16 Ŋoŋe Wofuŋ Anutu‐ŋeŋic maŋzi ʒâfickehuc hata‐ticne bâjâperâ sâcmutâc â dâŋsanaŋ erâ mumutâc dâŋticne bajuhuc sâcmutâc dâŋticne ŋaza mutâc ekopac i mana rereŋ eniŋmuo ine juhâmohuc sawe mâririackeniŋmu. Ehuc mâreŋ ro rauc eniŋte raʒirâ juhapie Wofuŋ Anutu‐ŋeŋiczi jambuŋ‐ŋopaocmu.
17 Me ŋoŋe Wofuŋ râpeckerâ dâŋticne qatarahuc nemu burecne jaŋerao qohotarâ araŋ bajarehuc kiŋaŋ qajareniŋmuo
18 ine sipiricke‐jâmbâŋkeniŋmu, no miŋecgac dâŋ iŋuc hâcne ŋazakopac. Ŋoŋe Jordaŋ opâ fotâcnerâ mâreŋ ro rauc eniŋmu ira dameŋ ʒora mi juniŋmu.
19 No miŋecgac sambâŋ â mâreŋ jahere maio juju â hâmoc erâ jambuŋ â sâwecdâŋ irec hata hone taraniŋte fuŋne ŋaza ŋowatuc ekopac. Irec ŋoŋe ŋaŋacne â ɋâricfâc‐ŋeŋic mâmâc juhâc qâhâmoniŋte jujure hata âtenʒepieŋ.
20 Ehuc Wofuŋ Anutu‐ŋeŋic maŋzi ʒâfickerâ dâŋticne mana rereŋ ehuc erao qohotanʒepieŋ. Ŋoŋe iŋuc epie Wofuŋzi apafâc‐ŋeŋic Abraham, Isaka â Jakobo jaŋe mâreŋ jareocte mupaŋke‐jarewec ira dameŋ ʒora juhâc qâhâmoniŋmu.”