32
Mosere gae
1 “Sambâŋne sambâŋne ŋoŋe hazec râepie dâŋ ŋazape,
â mâreŋ go micdâŋ‐nane manazemec.
2 Mu qaqazuc dâŋnane i hoe pisiŋ pisiŋ iŋucne eha
micdâŋ‐nanezi maniŋ titikuc wahaekac irec sâc ezejec,
hoe sisiczi kecɋaŋ bagunuckeekac
â hoe micsâko hehuc nânâ monʒaŋ gume hesiwiŋ ecneekac irec sâc hâcne.
3 No Wofuŋ ʒâŋe biŋe‐ticne mutaniŋkepe
ŋoŋe Anutu‐nâŋec muteŋ bâteŋ ecnenʒepieŋ.
4 “E haroŋaŋ sanaŋ iŋucne, erâ gie‐ticne i fâretiŋ,
eebapa‐ticne i tiŋne sasawa.
E Anutu mume sasanaŋ â bâbâsifuc tâmiric,
e tiŋne â jâmbomac rune hâcne.
5 Ŋoŋe ŋicguru repicne â hehesicnezi
Anutu maŋbâiŋ ecnembiŋte
naru motecfâc‐ticne mocwâc mi juŋgopieŋ.
6 Ŋic mutucne â mamana tâmiric
ŋoŋe wemocte iŋuc ehuc Wofuŋ bunao baŋgopieŋ?
Eki hâcne mamac bâbâfua‐ŋeŋic,
erâ ekizia bâfuac‐ŋoparâ hume keteŋ eŋarewec.
7 Ŋoŋe mârâc jaha dameŋ fowec irec manasuniŋ me!
Erâ ŋic gaŋne gaŋne juwefumbiŋ
jaŋere jara dameŋte wâc manasunʒepieŋ.
Ŋoŋe mamacfâc‐ŋeŋic wio‐jarepie ŋazaniŋmu,
â micnefâc‐ŋeŋic jaŋe wâc irec binaŋ baŋareniŋmu.
8 Femicne sâkozi ŋic gurune gurune mâreŋ biŋe qajarewec,
â ŋicne ŋicne bârâwiŋ‐jopawec
dameŋ ira Israe ŋic ʒare‐nâŋecte manasuhuc
guru‐nâŋec sâc mâreŋ bâtâc banârewec.
9 Israe ŋic nâŋe Wofuŋte biŋe,
â Jakobore ŋicfâc jaŋe ere biŋe jaha.
10 “E mâreŋ burocnao bâfuac‐nâpowec,
mâreŋ kereŋnao â qowi mimicne jaŋere jujuo hâcne.
E orâŋ‐nâpohuc hone maiŋ enârewec,
ehuc ʒâŋe hândâŋfâc‐nane muhuc soŋaŋ‐nâpowec.
11 E tucwipezi motecfâcne sareŋko ŋehapie
hehetâcnehuc hone soŋaŋ ejareekac,
me fakec‐ticne hedâmârehuc rocjoparâ
fakec fai‐ticnao râec‐jopaekac irec sâc enârewec.
12 Ŋondeŋ‐nâŋecko nemu furune moczi moc mi juhame
Wofuŋ e mocjahazi jowa qataŋ enârehuc juwec.
13 Eki hâcne enâreme hae mâreŋ fotâcnerâ rambeŋ,
ehuc giegaŋkonec nânâ monʒaŋ wiac ro nâc embeŋ;
erâ ekizia haroŋaŋ haweckonec baŋac gumeqiŋ‐nâpowec,
â qânâ sanaŋkonec wokemaŋ wahame nâmbeŋ.
14 Ehuc wiac kecʒiŋuc wâc nâjumbeneŋ:
Bulimakao susure wokemaŋ, lama jaŋere susu,
lama motecnere râpe hândâŋ irec wokemaŋ.
Basaŋ mâreŋkonec bulimakao â noniŋ ŋicne,
waizeŋ uucne aŋac baŋacne
erâ waiŋ opâ momori.
15 “Jakobore ŋicfâc jaŋe iŋuc ehuc nâ gapec embiŋ,
â Jesuruŋ ŋic ŋoŋe wokemaŋ sâkohec erâ ʒaubac embiŋ.
Ŋoŋe biuc wokemaŋhec erâ soka puŋpuŋ embiŋ,
ehuc Anutu Mamac bâbâfua‐ŋeŋic behembiŋ
â bâbâpiaŋ‐ŋeŋicte qânâuŋ hone suŋgiŋ ecnembiŋ.
16 Ŋoŋe nemu furune jaŋerao qohotahuc
Anutu‐ŋeŋic maŋbâiŋ ecnembiŋ,
ehuc nemuɋâŋ bajuhuc bunao bambiŋ.
17 Ŋoŋe nemu jabane mârâc mi manac‐jopambiŋ
jaŋe bâzi rike‐jarembiŋ;
nemu furune, diguracfâc‐ŋeŋic jaŋeraonec rombiŋ;
â mamacfâc‐ŋeŋic jaŋe mi sâsec‐jopambiŋ
jaŋe hâcne iŋuc ejarembiŋ.
18 Ŋoŋe Mamac bâbâfua‐ŋeŋic ere mi manasumbiŋ,
ehuc Anutu bâfuac‐ŋopawec ere wâc nikec‐ŋopawec.
19 “Wofuŋ e jahacne naru motecfâc jaŋe iŋuc ehuc bunao bapie
honec‐joparâ behec‐jopawec.
20 Ehuc kecʒiŋuc muwec: ‘No ʒâŋe mai‐nane bâsoŋke‐jarepe
wiac weniŋuc fua‐jareocmu i honezepac.
Jaŋe ŋicguru qaqaharicnezi
naru motecfâc‐nane biaŋne mi juŋgopieŋ.
21 Jaŋe nemu burecne jaŋerao qohotahuc
maŋbâiŋ enarembiŋ,
â nemuɋâŋ bajuhuc bunaneo bambiŋ.
Irec no ŋicguru omane ejarepe maŋbâiŋ ejarenʒepieŋ,
â ŋicguru mutucne jaŋe ejarepe bujeŋicko banʒepieŋ.
22 Kimbeŋ aaric‐nanezi bâruŋkerâ
ʒahuku hârâc fâhâŋnao fisikac,
ehuc mâreŋ â wiac sasawa ʒâseŋke‐fârehuc
tiki fuŋnao sâcke‐fâreekac.
23 “ ‘No mupe fai‐jeŋicko sisipiriczi sisipiric feocmu,
ehame tepe motec‐nanezi jaŋere faio qâtâcne‐fârepemu.
24 Jaŋe nânâre hâmo sipiric enʒepieŋ,
ehame huc ʒocnehec â huc mimicnezi
sipiric‐jopazejec.
Erâ mupe qowi mimicne â homa momori
bujeŋiczi foforâ jueŋgopieŋ
jaŋe fuarâ ki sipiric ejarenʒepieŋ wâc.
25 Hae ʒoŋao ʒikazi ima gie sâko baocmu,
â ficmaŋko ine ɋâri hâmoczi rocjopaocmu.
Ehame naru motec ʒeŋoŋne jaŋe mecne,
erâ naru motec susuonec â ŋic ŋokac qizecne
jaŋe mecne mâmâc omae‐fâreniŋmu.
26 No ʒiŋuc mupaŋkezo murâ mupaŋkezapo:
“No bâtâtiec‐jopape
ŋic jaŋe mocwâc mi manasuc‐jopanʒepieŋ.”
27 Erâ ine râsifâc‐jeŋic jaŋe mana sifuckerâ
ʒiŋuc munʒipiŋte iŋuc mi epo: “Wofuŋzi mâcne,
nâŋe nâŋâcne mesanaŋzi bâsirowec‐jopa‐fârewec.” ’
28 “Jaŋe ŋicguru mutucne
â maŋ mamanasu tâmiric.
29 Jaŋe mamanahec jurâ muzac
wiac ʒi hone mana tarac enʒapiŋ,
erâ juku weniŋuc fuaocmu
i wâc mana taranʒapiŋ.
30 Rorowec‐jeŋiczi râsifâc‐jeŋic
jaŋere meo mi râec‐jopame muzac
ŋic mocjahazi wemocko
ŋic wâŋ tauseŋ jâpec‐jopazac;
me Wofuŋzi mi râpec‐jopame muzac
ŋic jajaheczi wemocko
ŋic teŋ tauseŋ bâtâtiec‐jopazapic.
31 Jaŋere rorowec e nâŋâcne rorowec iŋucne aricne,
i râsifâc‐nâŋec jaŋe jaŋac manaeŋgopieŋ wâc.
32 Waiŋ qaŋeŋ‐jeŋic i Sodom â Gomora mâreŋkonec,
waiŋ hândâŋ‐jeŋic i sâqocne â mi nânâne,
â waiŋ hândâŋ makenehec i hâtâ qiŋqiŋne.
33 Waiŋ opâ‐jeŋic i homa momori jaŋere micopâ iŋucne,
erâ wâc qotâre micopâ repicne irec sâc.
34 “Wiac sasawa i norao râekicne fokac,
nore rowaŋficko qofackekicne fokac hâcne.
35 Ira foha okac babazu â okacne roro dameŋ maickeocmu,
jaŋe dameŋ ira hâcne âte sowarierâ waha jopaocmu.
Sisipiric dameŋ‐jeŋic i bembeŋkekac,
â sisirowe dameŋ‐jeŋic i wâc qândâŋkekac hâcne.
36 Wofuŋ e ŋicfâc‐ticne jaŋere dâŋ mutaraocmu,
ehuc kiŋaŋŋicfâc‐ticne jaŋe ine busâqoc mana‐jareocmu.
Tâpiri‐jeŋic omaeme kiŋaŋŋic me ŋic rambaŋko jujune
mocwâc mi jupie honerâ iŋuc hâcne ejareocmu.
37 Ehuc ŋoŋe ʒiŋuc mu wioc eŋareocmu: ‘Nemufâc‐ŋeŋic jaŋe weni?
 qânâuŋko soŋkezo mumbiŋ i wena?
38 Tiri bâzi‐ŋeŋicte wokemaŋ
me tahare waiŋ opâ‐ŋeŋic nâjumbieŋ nemu i jaŋe weni?
Ejarepie fahare bafic‐ŋopahuc ŋezic‐ŋopaniŋ me!
39 “ ‘Ŋoŋe ʒi mana taraniŋ: No mocjahazi Wofuŋ jukopac,
nore râpeo Anutu moc mi jukac.
Noni hâcne ŋic qâhâmoc‐jopaekopac
erâ mocwâc bâɋârec‐jopaekopac;
no ʒâpâ joparâ mocwâc bâpiaŋ‐jopaekopac,
ehame ŋic moczi moc nore meonec sâcne mi batarac‐jopaocmu.
40 No menane sambâŋkopec sicnehuc
dâŋ kecʒiŋuc mujomirekopac:
41 Jukopaczi jukopac no sâqe‐nane ʒâmu taeŋkerâ
mumutara gie bahuc râsifâc‐nane okacne bazu‐jarepemu,
â qaisocnueŋgopieŋ jaŋe katucne jarepemu.
42 Qâhâmoc‐jopakicne â kâpâcwâru bacjopakicne jaŋere soc mecne,
erâ râsi micne bapafâc‐jeŋic jaŋere soc mâmâc,
izi tepe motec‐nane ruacnezejec,
â sâqe‐nanezi sahac‐jeŋic nâtâcnezejec.’
43 “Ŋicne ŋicne ŋoŋe Anutu nore ŋicfâc muteŋ bâteŋ ejareniŋ,
noni hâcne kiŋaŋŋicfâc‐nane jaŋere socte kiŋ batarapemu,
ehuc râsifâc‐nane okacne bazu‐jarehuc
no nahacne ŋicfâc jaŋere mâreŋ furu mupe foocmu.”
Mosezi Israe ŋic uŋ sawaŋ ejarekac
44 Eme Mose e ra gae irec dâŋ sasawa ŋic ŋokac jazame mana‐fârembiŋ; e jahacne â Nuŋte ŋokâ Josua jahe iŋuc hâcne epic.
45 Erâ Mose e dâŋ i sasawa Israe ŋic jaza tararâ
46 moc kecʒiŋuc ʒuhuckerâ jazawec: “No miŋecgac dâŋ sasawa ŋazakopac i maŋkerâ bajuhuc naru motecfâc‐ŋeŋic mutâcne‐jarepie jaŋe sâcmutâc kecʒirec dâŋ sasawa aijakic jaha mana rereŋ enʒepieŋ.
47 Ŋoŋe dâŋ irec manapie racne mâcne, juju‐ŋeŋicte dâŋ eha bajuhuc Jordaŋ opâ fotâcnerâ mâreŋ rauckeniŋmu ira dameŋ ʒora jufenʒepieŋ.”
Mose hâmoc biŋe‐ticne âzâcnekicne
48 Eme Wofuŋzi ʒoaŋ ijaha jâmbâŋ Mose dâŋ kecʒiŋuc âzâcnewec:
49 “Go Moabi mâreŋko Jeriko hae ʒoaŋ wewefunaopec Abarim tiki ŋerakac irec tiki moc ʒâŋene Nebo ira fezemec. Ferâ Kanaaŋ mâreŋ Israe ŋic jarepe ro rauc eniŋmu i honezemec.
50 Erâ go tiki ira ferâ qomâfâcge qâtec‐jopahuc hâmozemec; ine hahacge Aroŋ Hora tikio hâmohuc qomâfâc‐ticne qâtec‐jopawec irec sâc.
51 Ŋohe Ziŋ mâreŋ burocnao Meriba‐Kadesi opâo nore dâŋ qatarahuc Israe ŋic jaŋere ŋondeŋko araŋ mi banarepicte iŋuc hâcne fua‐ŋactekac.
52 No Israe ŋic mâreŋ jarepemu i ʒoricko domahuc honezemec, raraʒi ine mi raʒizemec.”