33
Mosezi Israe ŋic jambuŋ‐jopa‐fârewec
1 Anuture kiŋaŋŋic Mose e hâmoc dameŋ‐ticne maickeme dâŋ kecʒiŋuc muhuc Israe ŋic jambuŋ‐jopawec:
2 “Wofuŋ e Sinai tikionec waharâ warewec,
e Seiri mâreŋkonec huriri qâreŋ‐ticnehec warerâ
ŋicfâc‐ticne nâŋâc fua‐nârewec.
Tatamac‐ticne i Paraŋ tiki mâreŋko fua tâcnewec
ehame tiriŋic gurune gurune jaŋe mefâre‐ticnaopec rambiŋ.
3 E jâmbomac ŋicfâc‐ticne maŋjauŋ fârine ejarewec,
â biŋefâc‐ticne embiŋ jaŋe ere meo jufârembiŋ.
Jaŋe maŋfuŋ‐ticnao juhuc
eraonec sâcmutâc dâŋ manambiŋ.
4 Sâcmutâc dâŋ i Jakobore kikefuŋ
nâŋâcne biŋe foocte Mosezi mutâcne‐nârewec.
5 Ehame Israe ŋic gurune gurune jaŋe mecne
â micne bapafâc‐jeŋic jaŋe mâmâc tumaŋne‐fârehapie
Wofuŋ Sâkozi ŋondeŋ‐jeŋicko fua tâcnerâ juwec.
6 “Rubeŋ e mi hâhâmo ʒuhuckerâ jufeha
ŋicfâc‐ticne jaŋe sawe mâririackenʒepieŋ.”
7 Judare dâŋ kecʒiŋuc muwec:
“O Wofuŋ, go Judare nunumu manahuc
ŋicfâc‐ticne jaŋerao bârisiezemec.
Ehuc ere âkehoc râsifâc‐ticne jaŋerao
ʒika qahuc bafickezemec.”
8 Lewire dâŋ kecʒiŋuc muwec:
“Go Lewi mumutiŋ irec ma râcnezemec,
â kiŋaŋŋicge biaŋne e fuŋne babataniŋ irec ma.
Go e hâcne Masa hae mâreŋko esâickemeŋ,
erâ Meriba opâ ira ine ehec mu qaqatarac epic.
9 E neŋgoc mamac jahec‐ticnere kecʒiŋuc muwec:
‘No jahe mi manac‐jofakopac.’
Erâ e (Wofuŋ gore erâ) hahac ɋafâc‐ticne ʒâŋe ruruŋ‐jopahuc
naru motecfâc‐ticne hone qâoma ejarewec.
Lewiŋic jaŋe sâcmutâc dâŋge mana rereŋ ehuc
ʒâʒâficge soŋaŋkembiŋte wiacfâc‐jeŋic iŋuc ejarembiŋ.
10 Jaŋe mumutâc dâŋge Jakobore ŋicfâc qazu‐jarehuc
Israe ŋic sâcmutâc dâŋge jaza jowatuc enʒepieŋ.
Erâ gore maio hosâc âsu rikehuc
gore alata faio qowi hâcbuc rikenʒepieŋ.
11 O Wofuŋ, go tâpiri‐ticne jambuŋkehuc
eebapa‐ticnere manatec biaŋkezejec;
â râsifâc‐ticne jaŋere hosiec qanʒaŋnetec
mocwâc mi faharenʒepieŋ.”
12 Benjamiŋte dâŋ kecʒiŋuc muwec:
“E Wofuŋte joroc biaŋzi
dameŋ sâc juhâc qâhâmozejec,
erâ Anutu Fekicnezi ʒoaŋ sâc ŋezickehame
tiki mâreŋ‐ticnao biaŋne ŋeŋe juju ezejec.”
13 Josefere dâŋ kecʒiŋuc muwec:
“Wofuŋzi mâreŋ‐ticne jambuŋkeme
sambâŋkonec maniŋ titikuc wahazejec,
â mâreŋmaŋkonec opâ ʒâŋe wefuzejec.
14 Ʒoaŋ dameŋko jâchândâŋ wiac biaŋne
fuarâ woze qeuc ezejec,
erâ mosa dameŋ biaŋnao nânâ monʒaŋ‐ticne
fua biaŋ ezejec.
15 Tiki mâreŋko wiac fua biaŋ eekac i jambuŋkecnezemec
ere tiki ŋeŋe sanaŋ ira wiac fofârekac i mâmâc.
16 Mâreŋte wiac biaŋne â furi sâko
izi wâc mâririhec fuacnezejec,
ehame jâc dutu maŋko juekaczi manacneme biaŋkezejec.
Wiac i sasawa Josefere faio fefârerâ fozejec,
qomâfâc‐ticne jaŋere ŋondeŋko fekicne jukac
ere faio hâcne fezejec.
17 E bulimakao ŋicne mârâc fufua
tâpirihec juekac irec sâc eha
ʒuŋene bulimakao momori ere ʒuŋe iŋucne ezejec;
e ʒuŋe izi ŋic gurune gurune hesuac‐jopame
mâreŋ qaŋeŋnao wiserâ ranʒepieŋ.
Eferaimte ŋicfâc teŋ tauseŋ gurune gurune jaŋe irec sâc eniŋmu,
â Manasere ŋicfâc tauseŋ gurune gurune jaŋe irec sâc jaha eniŋmu.”
18 Sebuloŋte dâŋ kecʒiŋuc muwec:
“Sebuloŋ, go wokeo rac warec eegere ʒeri ezemec,
â Isasa go ine qoruc bozeo ŋeŋe jujure bubiaŋ manazemec.
19 Jaŋe ŋic gurune gurune tikifuŋko hetumaŋ‐joparâ
bâzi fârine rikeniŋmu.
Jaŋe hâwecmaŋko wiac fokac i rofâreniŋmu,
â moŋgeŋmaŋko wiac furi sâko fokac
i wâc ro rauc eniŋmu.”
20 Gadere dâŋ kecʒiŋuc muwec:
“Gade mâreŋ sâko râcne tahac ekac e mumbiaŋkezo
Gade e laioŋ iŋucne ruc bahuc fokac,
erâ meombâŋ â qizec‐jeŋic kisuc qâsuckeekac.
21 E mâreŋ dâkâne biaŋne jâmbâŋ e jahacne biŋe bâwosâewec,
e micne bapa mâreŋ jarekicne irec sâc rowec hâcne.
Eme ŋic ŋokac micnefâc‐jeŋic jaŋe tumaŋnehapie
Israe ŋic jaŋerao Wofuŋte sâcmutâc dâŋ
â dâŋsanaŋ jaza mutâc ewec.”
22 Daŋte dâŋ kecʒiŋuc muwec:
“Daŋ e laioŋ motecne iŋucne,
e Basaŋ mâreŋkonec tararâ warekac.”
23 Naftalire dâŋ kecʒiŋuc muwec:
“O Naftali, go Wofuŋte eehâmo â jambuŋ
gorao fufusuc fokacte
riqic â mâreŋ juwicpec ro rauc ezemec.”
24 Asere dâŋ kecʒiŋuc muwec:
“Ase e motec ɋafâc‐ticne gâcne jowaruhuc
jambuŋ fekicne rozejec,
ehame hahac ɋafâc‐ticne jaŋe manacnepie fefene eha
kike‐ticne wokemaŋ ruacnezejec.
25 Motâc babasanaŋge i aeŋ â aeŋ bâbâroŋzi bapie fozejec,
erâ tâpirige fokac i jufecmu sâc fogarehuc juzejec.
26 “Jesuruŋte Anutu e iŋucne moc mi jukac,
e sambâŋne sambâŋne fotâcne rac warec ehuc juekac,
ehame tâpiri‐ticnezi karoracko fuaekac.
27 Anutu juju sanaŋ rune
eki huec sanaŋ‐ŋeŋic erâ jukac,
erâ ekizia meticnezi sabec‐ŋopaekac.
E bânie‐ŋarehuc râsifâc‐ŋeŋic jâpec‐jopahuc
kecʒiŋuc muwec: Bâsirowec‐jopaniŋ!
28 Iŋuc fuame Israe ŋic ŋoŋe wama faio juhapie
Jakobore ŋicfâc jaŋe wâc bucjeŋic jumbiŋ.
Ine mâreŋ padi jacgoŋ â waiŋ mâririhec ira juhapie
sambâŋkonec maniŋ titikuc wahahuc fowec.
29 O Israe ŋic, ŋoŋe ʒeri eniŋ!
Ŋoŋe iŋucne ŋicguru moczi moc mi juŋgopieŋ.
Wofuŋzi râsifâc‐ŋeŋic jaŋere meonec batarac‐ŋopawec.
Eki hâcne maro‐ŋeŋic erâ ŋezic‐ŋopaekac,
erâ ekizia tâpiri‐ŋeŋic eha ʒika qahuc sanaŋkeeŋgopieŋ.
Râsifâc‐ŋeŋic jaŋe micbipiczi sawa bâbâmiriŋ dâŋ ŋazahapie
ŋoŋe hae mâreŋ‐jeŋicko fotâcnehuc ro rauc enʒepieŋ.”