34
Mose hâmowec
1 Eme Mose e Moabi wâneŋkonec rarâ Jeriko hae ŋifecnao Nebo tiki ŋewec irec botâŋne Pisiga hâcne ira fewec. Feme Wofuŋzi mâreŋ sasawa, Gileade mâreŋkonec fuŋkerâ raku Daŋ mâreŋko tarakac i jâutu‐fârewec.
2 Ehuc Naftali mâreŋ â Eferaim â Manase jahere mâreŋ erâ Juda mâreŋ sasawa hâwec sâkoo mickekac i mâmâc jâutu‐fârewec.
3 Erâ Negebe mâreŋ â Jordaŋ wâneŋ erâ hâmu hae Jeriko irec wâneŋ raku Zoari haeo tarakac i mâmâc hone‐fârewec.
4 Ehame Wofuŋzi kecʒiŋuc âzâcnewec: “No mâreŋ kecʒirec dâŋ i Abraham, Isaka â Jakobo ʒiŋuc muhuc mupaŋke‐jarepo: ‘No ɋâricfâc‐ŋeŋic jarepemu.’ No iŋuc mupore mana‐garehape ʒâŋezi sawa honekomec, mâc ira raraʒi ine mi raʒicmu.”
5 Iŋuc âzâcneme Wofuŋte kiŋaŋŋic Mose e Wofuŋte micdâŋ irec sâcko Moabi mâreŋko hâmowec.
6 Hâmome Wofuŋzi Moabi mâreŋko Bete‐Peoro ŋifecnao wâneŋ fokac ira duckewec. Ʒâŋeruŋ‐ticne ine ŋic moczi mi honembiŋ erâ dameŋ ʒiŋuczia wâc mi manaeŋgopieŋ.
7 Mose e jara dameŋ‐ticne 120 bazurâ hâmowec; e ʒâŋe‐ticne mi mâteŋkewec â sahac‐ticne wâc mi bâmuzuckewec.
8 Ehame Israe ŋic jaŋe Moabi wâneŋko Mosere busâqoc ehuc juhapie ʒoaŋ gie bapa 30 tarawec. Tarame Mosere ki busâqoc ee i tarawec.
9 Eme Mose e Nuŋte ŋokâ Josua ere faio meticne râehuc jambuŋkewecte Josuazi maŋɋârâŋhec ewec. Irec Israe ŋic jaŋe dâŋticne mana rereŋ ehuc, Wofuŋzi Mose dâŋ mutâcnecnewec irec sâcko wiac efârembiŋ.
10 Eme dameŋ irecnec fuŋkerâ juwefuhapie Israe ŋic jaŋere ŋondeŋko porofete moc Mose iŋucne moc mi fuarâ juwec. Wofuŋ â Mose jahe hohone mamanac epic.
11 Wofuŋzi Mose hâcne soreme Aigita mâreŋko rarâ Farao â kiŋaŋ qaqafâc‐ticne erâ hae mâreŋ‐ticnao fuŋne qaqa mâsi â wiac ʒâŋe furu fuŋne fuŋne bawec.
12 Erâ ekizia Israe ŋic jaŋere maio tâpiri â wiac bipic tataranehec bataniŋkeme honembiŋ.