5
Sâcmutâc Sanaŋ Teŋ
(Wah 20:1–17)
1 Eme Mose e Israe kikefuŋ ʒeŋgoma hetumaŋ‐joparâ kecʒiŋuc jazawec: “O Israe ŋicbureŋ, no miŋecgac dâŋsanaŋ â mumutâc dâŋ mai‐ŋeŋicko ŋazakopac i aimuŋ mana maŋ ehuc reŋkenʒepieŋ.
2 Wofuŋ Anutu‐nâŋec e Horebe tikio nâŋâcnehec ʒâʒâfic ewec.
3 Ʒâʒâfic i mamacfâc‐nâŋec jaŋehec mâcne, ʒiŋuczia juŋgopeneŋ nâŋâcnehec ewec hâcne.
4 Wofuŋ e ʒocmaŋko juhuc ŋoŋe manahapie dâŋ ŋazawec.
5 Ehame ŋoŋe dameŋ ira ʒocte hâwic‐ŋopame tikio mi fembiŋ, irec noni ŋic â Wofuŋ ŋondeŋ‐ŋeŋicko domahuc dâŋticne mutâcne‐ŋarepo. E dâŋ kecʒiŋuc muwec:
6 “ ‘Noni Wofuŋ gore Anutu, noni hâcne Aigita mâreŋ, kâpâcwaru fic hâcne, irecnec bataracgupo.
7 “ ‘Go nore maio nemu burec wiac moc mi bajuzemec.
8 “ ‘Go ɋâŋ qâqâtâc moc barâ mi bajuzemec, sambâŋko mecne, mâreŋko mecne, opâo mecne, mâreŋmaŋko mecne, wiac forakac irec qâqâtâc moc mi bazemec.
9 Go wiac i araŋ bacnehuc kiŋaŋ moc mi qacnezemec; no Wofuŋ gore Anutu hâcne, no ʒoɋac‐nanehec. No qaisocnueŋgopieŋ jaŋe kiŋjeŋicte okacne naru motec ŋosafâc‐jeŋic bazu‐jare raekopac.
10 Â ŋic tauseŋ gurune gurune maŋzi ʒâficnuhuc dâŋnane reŋkeeŋgopieŋ jaŋe ine ehâmo‐jarehuc juekopac.
11 “ ‘Wofuŋge Anutu ere ʒâŋe mi sipirickezemec, ʒâŋe‐ticne sipirickeocmu ŋic e Wofuŋzi mi akickeocmu.
12 “ ‘Go sabata hombaŋ i Wofuŋ Anutugezi mutâcne‐garewec irec sâc tiri foocte manasuzemec.
13 Go ʒoaŋ gie bapa 6 giege baku bafârezemec.
14 Ʒoaŋ 7 i ine Wofuŋge Anutu ere hombaŋ ekac, irec ʒoaŋ ira gie moc mi bazemec; go mecne, ŋokâge mecne, otâge mecne, kiŋaŋ qaqafâcge ŋic me ŋokac jaŋe mecne, bulimakao â doŋgifâcge jaŋe mecne erâ ŋic furunezi ficgao juekac e mecne, ŋoŋe hâcne ʒoaŋ ira gie moc mi banʒepieŋ. Iŋuc ehuc kiŋaŋ qaqafâcge jaŋe gohec mâmâc ŋemananʒepieŋ.
15 Ŋoŋe Aigita mâreŋko kiŋaŋ qaqa juhapie Wofuŋ Anutu‐ŋeŋic e tâpiri â mesanaŋ‐ticnezi irecnec jowac‐ŋopa wahawec irec manasuhuc junʒepieŋ. Wofuŋ Anutu‐ŋeŋic e irec hâcne sabata hombaŋ ŋeniŋte ŋaza mutâc ewec.
16 “ ‘Go Wofuŋ Anutugezi mutâcne‐garewec irec sâc neŋgoc mamac jahecge sâsec‐jofazemec; iŋuc ehuc Anutu no mâreŋ râecgupemu ira dameŋ ʒora juhâc qâhâmocmu.
17 “ ‘Go ʒika mi qazemec.
18 “ ‘Ŋowe ŋonâŋ ŋohe bebehec mi ezepirec.
19 “ ‘Go fiuc mi rozemec.
20 “ ‘Go ŋic âgoge micko âkec mi ecnezemec.
21 “ ‘Go ŋic âgofâcge jaŋere ŋokac, me fic hae‐jeŋic, me giegaŋ wiac‐jeŋic, me kiŋaŋ qaqafâc‐jeŋic ŋic me ŋokac, me bulimakao â doŋgifâc‐jeŋic, me wiac‐jeŋic i me i irec andac mi ezemec.’
Israe ŋic jaŋe Anuture hâwic‐jopawec
(Wah 20:18–21)
22 “Wofuŋ e tikio ʒocmaŋko â karorac maŋko erâ duŋdapâc maŋko juhuc dâŋ hahaŋne bahuc sâcmutâc dâŋ i hâcne kikefuŋ ŋoŋe ŋaza‐fârewec. Ŋaza‐fârerâ dâŋ ʒuhuckerâ moc mi muwec. Ehuc dâŋ i qorac tapa jajahecko qâreŋkerâ narewec.
23 Ŋoŋe ine ʒocbâruŋzi tiki sâockeha duŋdapâc maŋkonec dâŋ fuame manahapie gurune gurune irec soŋaŋ micnefâc‐ŋeŋic jaŋe nore maŋfuŋko fisimbiŋ.
24 Fisirâ kecʒiŋuc nazambiŋ: ‘Manakic, Wofuŋ Anutu‐nâŋec e tâpiri â huriri qâreŋ‐ticnere fuŋne nâzâ nâwotuc eha dâŋticne ʒocmaŋkonec fuame manambeneŋ. Ŋic jaŋe Anutuhec muc manac ehuc sifu mi hâmoeŋgopieŋ, nâŋâc miŋecgac iŋuc hâcne honembeneŋ.
25 Eme ʒi wemocte hâmozo eŋgopeneŋ? Ʒocbâruŋ sâko kecizi ʒâseŋ‐nâpozo ekac hâcne, irec Wofuŋ Anutu‐nâŋec ere dâŋfâŋâŋ mocwâc mananaŋmuo ine hâmonaŋmu.
26 Mo mâreŋŋiczi Anutu jujunere dâŋfâŋâŋ ʒocmaŋkonec fuame manambeneŋ irec sâc manarâ mi hâmoocmu?
27 Irec go bembeŋko rarâ Wofuŋ Anutu‐nâŋecte dâŋ manazemec, erâ dâŋ gazaocmu sâc i risie nâzâtec mana rereŋ enʒepeneŋ.’
28 “Eme Wofuŋ e dâŋ nazambiŋ i manarâ kecʒiŋuc nazawec: ‘Ŋic ŋokac jaŋe dâŋ gazapie manapac, erâ dâŋ mumbieŋ sasawa i manape sâcke‐fârekac.
29 Jaŋe maŋjeŋic norao domaha araŋ banarehuc sâcmutâc dâŋnane sasawa mana rereŋ ehuc jaŋacne â ɋâricfâc‐jeŋic jaŋe dameŋ ʒora juhâc qâhâmoniŋte enarekac hâcne.
30 Irec go ra ʒiŋuc jazac: “Ŋoŋe qoruc boze‐ŋeŋicko risieniŋ.”
31 Go gahac ine ʒira nore maŋfuŋko domazemec, eme no sâcmutâc dâŋ â dâŋsanaŋ erâ mumutâc dâŋ sasawa qazu‐jarecmu i gazapemu. Eme jaŋe mâreŋ jarepe ro rauc eniŋmu ira juhuc mana rereŋ enʒepieŋ.’
32 Irec ŋoŋe Wofuŋ Anutu‐ŋeŋiczi ŋaza mutâc ewec irec sâc ebac eniŋte aimuŋ junʒepieŋ, ehuc hata qâsorierâ fâreopec me qanaopec moc mi ranʒepieŋ.
33 Ŋoŋe Wofuŋ Anutu‐ŋeŋiczi hata mutâcne‐ŋarewec ira rahuc juku mâreŋ ro rauc eniŋmu ira dameŋ ʒora juhâc qâhâmoniŋmu.