6
Sâcmutâc dâŋ qizecne sâko
1 “Wofuŋ Anutu‐ŋeŋiczi sâcmutâc dâŋ â dâŋsanaŋ erâ mumutâc dâŋ naza mutâc ewec i qazu‐ŋarepe ŋoŋe mâreŋ ro rauc eniŋte raŋgopieŋ ira juhuc mana rereŋ enʒepieŋ.
2 Ehuc ŋoŋe â naru motec ŋosafâc‐ŋeŋic ŋoŋe Wofuŋ Anutu‐ŋeŋic araŋ bacnehuc sâcmutâc dâŋ â dâŋsanaŋ‐ticne ŋaza mutâc ekopac i juniŋmu sâc mana maŋ enʒepieŋ, iŋuc ehuc dameŋ ʒora jufeniŋmu hâcne.
3 Irec Israe kikefuŋ ŋoŋe dâŋ i manarâ aimuŋ soŋaŋkehuc mana rereŋ enʒepieŋ. Ŋoŋe iŋuc ehuc Wofuŋ Anutu‐ŋeŋiczi mupaŋke‐ŋarewec irec sâc susu â baŋac fusucmarâ qâmbâriŋkehuc foekac mâreŋ ira juhâc qâhâmohuc sawe mâririackeniŋmu.
4 “O Israe kikefuŋ, ŋoŋe mananiŋ: Wofuŋ e mocjahazi Anutu‐nâŋec jukac.
5 Irec ŋoŋe maŋŋeŋic â qâqâtâc‐ŋeŋic â ʒoɋac‐ŋeŋic Wofuŋ Anutu‐ŋeŋic furu jaha qikiŋnecnepie fozejec.
6 Ehame miŋecgac ŋaza mutâc ekopac dâŋ i hâcne maŋkenʒepieŋ.
7 Erâ naru motecfâc‐ŋeŋic aijakic jaha qazu‐jarehuc ficko ŋec foc eniŋmu me hata juniŋmu me fo faharec eniŋmu sâc irec dâŋ muc manac enʒepieŋ.
8 Erâ irec manasuhuc juniŋte qâreŋkerâ meŋeŋicko â mai‐ŋeŋicko bândeŋnepie fozejec.
9 Ehuc ficwâtuŋ â sacmotâc‐ŋeŋicko mâmâc qâreŋkepie fozejec wâc.
Sâcmutâc dâŋ qataranʒipiŋte uŋdâŋ jazakicne
10 “Eme Wofuŋ Anutu‐ŋeŋic e mamacfâc‐ŋeŋic Abraham, Isaka â Jakobo mâreŋ ŋareocte mupaŋke‐jarewec ira jowac‐ŋopa rarâ, hae kâcɋene ŋoŋe tâmiricko basarickekicne ŋerakac i ŋare tahac eocmu.
11 Ehuc wiac biaŋnezi ŋoŋe tâmiricko fic hefusucmakicne erâ opâ nombâŋ ŋoŋe tâmiricko rokicne, â waiŋ gie â oliwa jâc ŋoŋe tâmiricko jaha sarakicne i wâc ŋare tahac eocmu. Irec ŋoŋe nâ gapec ehuc
12 Wofuŋ Aigita mâreŋ, kâpâcwâru fic hâcne, irecnec batarac‐ŋoparâ jowac‐ŋopa wahawec ere moc nikec‐ŋopazacte rucgereŋ‐ŋeŋic banʒepieŋ.
13 Ŋoŋe Wofuŋ Anutu‐ŋeŋic araŋ bacnehuc kiŋaŋ qacnenʒepieŋ, ehuc ere ʒâŋeo ɋetickehuc mumupaŋ dâŋŋeŋic munʒepieŋ.
14 Ŋoŋe ŋic gurune gurune rârec‐ŋopahuc juraŋgopieŋ jaŋere nemufâc jaŋerao mi qohotanʒepieŋ.
15 Wofuŋ Anutu ŋondeŋ‐ŋeŋicko juekac e ʒoɋac‐ticnehec, irec e maŋbâiŋ ecnepie mâreŋkonec bâsirowec‐ŋopazacte iŋuc moc mi enʒepieŋ.
16 “Ŋoŋe Wofuŋ Anutu‐ŋeŋic Masa opâo (Meriba opâ hâcne) ira eatuckembiŋ iŋuc jaha mocwâc mi eatuckenʒepieŋ.
17 Ŋoŋe Wofuŋ Anutu‐ŋeŋic sâcmutâc â mumutaniŋ dâŋ â dâŋsanaŋ‐ticne ŋaza mutâc ewec i aijakic jaha mana rereŋ enʒepieŋ.
18 Ehuc Wofuŋzi maname sâckeekac wiac i hâcne ehuc junʒepieŋ. Ŋoŋe iŋuc ehuc juhâc qâhâmoniŋmu erâ Wofuŋzi mamacfâc‐ŋeŋic mâreŋ biaŋ jare tahac eocte mupaŋke‐jarewec i sâcne ro rauc eniŋmu.
19 Ehuc Wofuŋzi mupaŋke‐ŋarewec irec sâc râsifâc‐ŋeŋic wâc jopa jâpec ejareniŋmu.
20 “Juku ŋokâfâc‐ŋeŋic jaŋe ʒiŋuc mecne wio‐ŋareniŋmu: ‘Wofuŋ Anutu‐nâŋeczi mumutaniŋ â mumutâc dâŋ erâ dâŋsanaŋ ŋaza mutâc ewec irec fuŋne weniŋuc fokac?’
21 Iŋuc wio‐ŋarepie dâŋ ʒiŋuc jazanʒepieŋ: ‘Nâŋe Aigita mâreŋko Faraore kiŋaŋ qaqa jumbeŋ; Wofuŋ eki ine mesanaŋ‐ticnezi Aigita mâreŋkonec batarac‐nâpowec.
22 Ehuc mume ʒâŋe fai‐nâŋecko wiac ʒâŋe furu â mâsi hâhâwicne â bipic tataranehec Aigita mâreŋko erâ Farao â kikefuŋfâcne jaŋerao fuawec.
23 Erâ mamacfâc‐nâŋec mâreŋ jareocte mupaŋke‐jarewec ira hâcne râec‐nâpohuc mâreŋ i nâre tahac eocte Aigita mâreŋkonec jowac‐nâpo wahawec.
24 Ehuc Wofuŋ Anutu‐nâŋec araŋ bacnepene, miŋecgac juhâmoŋgopeneŋ irec sâc hone maiŋ enâreha dâŋsanaŋ i sasawa mana rereŋ efârehuc juhâc qâhâmonaŋte nâzâ mutâc ewec.
25 Eme Wofuŋ Anutu‐nâŋec e sâcmutâc keci nâzâ mutâc ewec i ere maio aijakic jaha mana rereŋ efârepene irec erâ mana‐nâreme kiŋnâŋec taraocmu.’