7
Israe ŋic jaŋe Wofuŋte biŋe rowosâec‐jopakicne
(Wah 34:11–16)
1 “Ŋoŋe Wofuŋ Anutu‐ŋeŋiczi hae mâreŋ biŋe qaŋarewec i ro rauc eniŋte jowac‐ŋopa fisihuc ŋicguru bocjaha, Hitiŋic, Girigasi ŋic, Amori ŋic, Kanaaŋ ŋic, Periʒi ŋic, Hiwiŋic â Jebusi ŋic, ŋicguru 7 ŋoŋere sâc sirickehuc tâpiri sâkohec juŋgopieŋ jaŋe hâcne ŋoŋere erâ jopa jâpec ejareocmu.
2 Eme Wofuŋ Anutu‐ŋeŋiczi meŋeŋicko râec‐jopame bawahac‐jopahuc jopa qâmiziec ejarenʒepieŋ. Ŋoŋe jaŋehec ʒâʒâfic ehuc moc mi akic‐jopanʒepieŋ.
3 Erâ jaŋehec roroc babac mi enʒepieŋ, ehuc narufâc‐ŋeŋic jaŋere motecfâc mi jarenʒepieŋ â jaŋere narufâc jaŋe motecfâc‐ŋeŋic mi rocjopanʒepieŋ.
4 Jaŋe motecfâc‐ŋeŋic ejarepie no behecnurâ nemu gâcne kiŋaŋ qajareniŋmu. Iŋuc epie Wofuŋ no kimbeŋ qaŋarehuc acmâc jaha sipiric‐ŋopa‐jâmbâŋkepemu.
5 Ŋoŋe ine kecʒiŋuc ejarenʒepieŋ: Alata wiac‐jeŋic hetâc qâtâtienʒepieŋ, ɋâŋwâtuŋ wiac‐jeŋic henʒaŋ qanʒaŋnenʒepieŋ. Aserim nemu wâtuŋ‐ticne hetâc qâtâcnenʒepieŋ, erâ ɋâŋ qâqâtâc wiac‐jeŋic i ʒocko behepie ʒazejec.
6 “Ŋoŋe Wofuŋ Anutu‐ŋeŋicte biŋe erâ juniŋte rowosâec‐ŋopakicne. Wofuŋ Anutu‐ŋeŋic e mâreŋte faio ŋic gurune gurune juraŋgopieŋ jaŋeraonec ŋoŋe hâcne ere biŋe juniŋte rowosâec‐ŋopawec.
7 Ŋoŋe ŋic gâcne siric‐jopahuc bocjaha jumbiŋte mi rowosâec‐ŋopakicne, aricne, ŋoŋe ŋic afecne sawa jumbiŋ.
8 Wofuŋ e maŋjauŋ eŋareekac â mamacfâc‐ŋeŋic dâŋ mupaŋke‐jarewec, irec erâ mesanaŋ‐ticnezi kâpâcwâru, Aigita ŋicwofuŋ Faraore meonec hâcne batarac‐ŋoparâ jowac‐ŋopa wahawec.
9 Irec ŋoŋe ʒiŋuc mananʒepieŋ: Wofuŋ Anutu‐nâŋec eki mocjaha Anutu fârine. Eki hâcne maŋjeŋic erao râehuc sâcmutâc dâŋticne mana rereŋ eeŋgopieŋ jaŋehec ʒâʒâfic ehuc aki anonoc ejare rahuc juocmu sanaŋ.
10 Â e qaisockehuc jueŋgopieŋ jaŋe ine sipiric‐jopahuc okacne bazu‐jareocmu. Ine hâcne, e qaisockeeŋgopieŋ jaŋe okacne bazu‐jareocte ŋeŋe ʒeʒepec mi eocmu.
11 Irec ŋoŋe sâcmutâc dâŋ â dâŋsanaŋ â mumutâc dâŋ miŋecgac ŋaza mutâc ekopac i aijakic jaha mana rereŋ enʒepieŋ.
Micrereŋ bâfuapie Wofuŋzi jambuŋ‐jopaocmu
(Tah 26:3–13; Sâc 28:1–14)
12 “Ŋoŋe mumutâc dâŋ keci mananiŋmuo ine Wofuŋ Anutu‐ŋeŋic eki ʒâʒâfic â aki anonoc irec dâŋ mamacfâc‐ŋeŋic mupaŋke‐jarewec i iŋuc jaha soŋaŋkehuc juocmu.
13 E maŋjauŋ eŋareocmu â jambuŋ‐ŋopaocmu erâ basawec‐ŋopaocmu, ehuc ɋâricfâc‐ŋeŋic â mâreŋ‐ŋeŋicko wiac nânâne fua‐fâreocmu, padi jacgoŋ‐ŋeŋic mecne, waiŋ‐ŋeŋic mecne, oliwa wokemaŋ‐ŋeŋic mecne erâ lama bulimakaofâc‐ŋeŋic motecne juŋareŋgopieŋ i mâmâc mâreŋ ŋareocte mamacfâc‐ŋeŋic mupaŋke‐jarewec ira juhapie jambuŋ‐jopaocmu.
14 Ŋoŋe ŋicguru gâcne jaŋere sâc jâuruhuc jambuŋ‐ŋopame ŋondeŋ‐ŋeŋicko ŋic aputacne me ŋokac â bulimakao hufiŋne moc mi junʒepieŋ.
15 Ehame Wofuŋ e huc wiac sasawa bârârie‐ŋareme Aigita ŋic jaŋere hucukic repicne hone manac embiŋ i ŋoŋe moc mi fua‐ŋarezejec, aricne, ŋic qaisoc‐ŋopaeŋgopieŋ jaŋere faio ine mume feocmu.
16 Ehame ŋoŋe Wofuŋ Anutu‐ŋeŋiczi ŋic meŋeŋicko râec‐jopaocmu jaŋe honec‐joparâ busâqoc moc mi mana‐jarehuc jopa sipiric ejare‐fârenʒepieŋ. Erâ nemufâc‐jeŋic jaŋe wâc kiŋaŋ mi qajarenʒepieŋ. Ŋoŋe kiŋaŋ qajarehuc sahac‐ŋeŋic seroŋ baniŋmu hâcne.
17 “Ŋoŋe maŋŋeŋiczi ʒiŋuc mecne muniŋmu: ‘Ŋicguru keci jaŋe nâŋere sâc sirickehuc tâpiri sâkohec eŋgopieŋ, irec weniŋuc erâ mâreŋ‐jeŋic ro rauc enaŋmu?’
18 Ŋoŋe iŋuc muhuc mi hâwic‐ŋopazejec, aricne, Wofuŋ Anutu‐ŋeŋiczi Farao â Aigita ŋic ʒeŋgoma wiac hâhâwicne ejarewec irec manasunʒepieŋ.
19 Ŋoŋe honehapie tâpiri‐ticnere fuŋne bataniŋkehuc wiac ʒâŋe furu â mâsi fuŋne fuŋne bâfuarâ tâpiri mesanaŋ‐ticnezi Aigita mâreŋkonec rocŋoparâ bacŋopa wahawec, sâc ijaha râsifâc‐ŋeŋic keci jaŋe sipiric‐jopaocmu.
20 Wofuŋ Anutu‐ŋeŋic e iŋuc ehuc wâc bitu gâpâc fuŋmoc ejareme ki bâʒâic ejarekupie ʒanʒaŋne juniŋmu me ŋoŋere hâwic‐jopame soŋkeniŋmu jaŋe omaeniŋmu.
21 Wofuŋ Anutu‐ŋeŋic, Anutu kâcɋene â ʒoɋac‐ticnehec e ŋondeŋ‐ŋeŋicko jukacte jaŋere mi hâwic‐ŋopazejec.
22 Wofuŋ Anutu‐ŋeŋic e ŋic gurune gurune keci jaŋe uneŋ uneŋ jopa qâhâmoc ejareocmu. Eme qowi mimicne jaŋe nâcjopahuc boc fua sawec erâ ŋoŋe mâmâc nâcŋopanʒipiŋte ŋic keci jaŋe acmâc jaha mi bâsirowec‐jopanʒepieŋ.
23 Wofuŋ Anutu‐ŋeŋic eki ine meŋeŋicko râec‐jopahuc maŋ bâsifuc ejarekume sipirickeniŋmu hâcne.
24 E ŋicwofuŋfâc‐jeŋic jaŋe wâc meŋeŋicko râec‐jopame ŋoŋe mâreŋko ʒâŋe biŋe‐jeŋic bawahapie omaezejec. Ŋic moczi moc sanaŋkerâ mi domaha bâsirowec‐jopa‐fâreniŋmu.
25 Ŋoŋe nemu ɋâŋ qâqâtâc wiac‐jeŋic sasawa ʒocko behepie ʒafârezejec. Ɋâŋ qâqâtâc siliwa â golzi ɋorockekicne i rohuc sahac‐ŋeŋic seroŋ banʒipiŋte me ŋaŋacne biŋe eocte irec andac mi enʒepieŋ. Wiac izi hâcne Wofuŋte maio mamakâcne ekac.
26 Erâ ŋoŋe wiac mamakâcne i ficŋeŋicko moc mi bafenʒepieŋ. Iŋuc ehuc sâwec hotâckenʒipiŋte wiac sâwec bâbâfuanehec i qikiŋne behec efârenʒepieŋ.