4
Esitezi ŋicfâc‐ticne jaŋere dâŋ ŋicwofuŋ âzâcneocte mupaŋkewec
1 Eme Morodekai e wiac sasawa fuawec irec biŋe manarâ ŋaqi‐ticne bâsuckerâ mateŋ qonaŋkerâ ʒafe ruawec. Erâ hae ʒâʒâŋiŋko rarâ owackehuc kio ŋâŋâtâc ewec.
2 Ehuc ŋicwofuŋ ficte sacmotâc fuŋko ferâ domawec. Sacmotâc ira ine ŋic jaŋe mateŋ qonaŋkerâ moc mi fejumbieŋ.
3 Ehame ŋicwofuŋte sâcmutâc dâŋ i mâreŋ dâkâne dâkâne ra fisiwec sâc ira Judaŋic jaŋere ŋondeŋko ki busâqoc â uwâuŋa fuarâ foha nânâ sowa jumbiŋ, ehuc ŋic bocjaha jaŋe mateŋ qonaŋkerâ ʒafe rua‐fârembiŋ.
4 Eme ŋokac wofuŋ Esite e kiŋaŋ naru â soŋaŋfâc‐ticne jaŋe fisirâ dâŋ binaŋ ecnepie maŋ kukumbuc boc ecnewec. Irec e Morodekaizi ŋaqi moc heme huocte râeme rame qikiŋnewec.
5 Iŋuc eme Esitezi ŋicwofuŋte kiŋaŋŋic moc, ʒâŋene Hataka e hefârerâ wiac weniŋuc fuawec irec fuŋne manaocte Morodekairao soreme rawec. Ŋic eki hâcne Esitere kiŋaŋ qaocte mucnekicne.
6 Eme Hataka e Morodekaizi ŋicwofuŋ fic sacmotâc‐ticnere hae ʒoŋao domawec ira rawec.
7 Ra fisime Morodekai e wiac sasawa fuacnewec irec dâŋ âzâcne‐fârewec, ehuc Judaŋic bâsirowec‐jopaniŋmu irec erâ Hamaŋzi ŋicwofuŋte moneŋ katapao moneŋ wezimuc râeme huocte mupaŋkewec i mâmâc âzâcnewec.
8 Ehuc Judaŋic bâsirowec‐jopazore Susa haeo sâcmutâc qâreŋkekicne irec rehacne moc râcnewec wâc, i Esite jâuturâ fuŋne âzâcne mutâc eme eki ŋicfâc‐ticne jaŋere erâ ŋicwofuŋtao nunumu gie baocte iŋuc ewec.
9 Eme Hataka e Morodekaizi dâŋ muwec i rarâ Esite âzâcne‐fârewec.
10 Iŋuc eme Esitezi Hataka dâŋ kecʒiŋuc muhuc Morodekairao soreme risiewec:
11 “Ŋicwofuŋte kiŋaŋŋic â ŋicwofuŋte mâreŋ dâkâne dâkâne ŋic juraŋgopieŋ jaŋe ʒiŋuc mana‐fâreŋgopieŋ: Ŋic me ŋokac moc e mi hefârehapie sifu ŋicwofuŋte hae ʒoŋao raʒiocmu e hâmo‐jâmbâŋkeocmu. Mocjaha, ŋicwofuŋzi gunu‐ticne golzi bakicne i ŋic moctao sicneocmu e sawa akickeniŋmu. No ine hefârecnupie ŋicwofuŋtao mi fefe mâc juhape ʒoaŋ gie bapa 30 tarakac.”
12 Eme Hataka â ŋicfâc‐ticne jaŋe Esitezi dâŋ jazawec i Morodekai âzâcne‐fârembiŋ.
13 Âzâcnepie Esite dâŋ kecʒiŋuc bâtikiecneniŋte jazawec: “Go ʒiŋuc mi muzemec: Judaŋic sasawa jaŋe sipirickepie no ŋicwofuŋte ficko jukopacte sâcne jupemu.
14 Manakic, go dameŋ ʒira dâŋemâc jucmuo ine Judaŋic gâcne nâŋere babafic â babatara i mâreŋ mockonec fua‐nâreha go â mamacgere wiacfâc ŋoŋe ine sipiricke‐fâreniŋmu. Go dameŋ sâqocnao bafic‐nâpocmurâ ŋokac wofuŋ âkendâŋgukicne mecne.”
15 Eme Esite e dâŋ i manarâ Morodekai ʒiŋuc âzâcneniŋte jazawec:
16 “Ajoc, go rarâ Susa haeo Judaŋic juŋgopieŋ jaŋe hetumaŋ‐jopa‐fâretec nore erâ sowa junʒepieŋ, ehuc ʒoaŋko mecne ŋafeo mecne nânâ opâ moc mi nâhuc juhapie ʒoaŋ gie bapa jahec â moc tarazejec. Ehame no â kiŋaŋ narufâc‐nane nâŋe wâc iŋuc jaha sowa junaŋmu. Iŋuc epene tarame no sâcmutâc fokac i mana‐bipiehuc sifu ŋicwofuŋtao fezepac; eme irec erâ nuzo murâ nupie hâmozepac.”
17 Eme Morodekai e dâŋ i manarâ ra Esitezi mutâcnecnewec irec sâc efarewec.