5
Esite e ŋicwofuŋ â Hamaŋ tiwâ bâzire hefârec‐jofawec
1 Eme ʒoaŋ gie bapa namba 3 ira Esitezi ŋokac wofuŋ ŋaqi wiac‐ticne heme hume ŋicwofuŋte fic ŋifecnao hae ʒoŋa fowec ira ra domawec. Â ŋicwofuŋ e ine ficmaŋko motâc ocniŋucnao eri ŋeŋe‐ticnao ŋewec.
2 Ehuc ŋokac wofuŋ Esite e hae ʒoŋao domaha honerâ bubiaŋ manahuc gunu‐ticne golzi bakicne baŋewec i erao sicnewec. Iŋuc eme Esitezi maŋfuŋnao rarâ gunu tofanao bâuawec.
3 Eme ŋicwofuŋzi ʒiŋuc mu wioc ecnewec: “Ŋokac wofuŋ Esite, go wemo wiacte warerâ mukomec? Go wiac irec me irec egareme mutec garepemu. Me uucmaŋ‐nane ŋifecnere mutec wâc garepemu.”
4 Iŋuc mume Esitezi muwec: “Ŋicwofuŋ, go manatec sâckeha go gahacne â Hamaŋ ŋohe gore tiwâ bâzi rike bâmoc epac i fârâ nânic.”
5 Eme ŋicwofuŋzi kiŋaŋŋicfâcne ʒiŋuc jazawec: “Ŋoŋe biac jaha Hamaŋ jowa warepie Esitezi mukac irec sâc ezeperec.” Eme ŋicwofuŋ â Hamaŋ jahe Esitezi tiwâ bâzi rike bâmoc ewec i rarâ nâpic.
6 Ehuc waiŋ opâ nârâ ŋehuc ŋicwofuŋzi Esite ʒiŋuc mu wioc ecnewec: “Go wemo wiacte numu‐narekomec? Go wiac irec me irec egareme mutec garepemu. Me wemo wiacte mukomec? Go uucmaŋ‐nane ŋifecnere mutec wâc garepemu.”
7 Eme Esitezi kecʒiŋuc muhuc âzâcnewec: “No ʒiŋuc muhuc numu‐garekopac:
8 Ŋicwofuŋ, go nore manatec biaŋkeme nunumu dâŋnanere manatec sâckekacko go gahacne â Hamaŋ ŋohe tomâcko tiwâ bâzi rike bâmoc epemu i ware nâzepirec. Ehame no dameŋ ijaha dâŋ nazacmu irec sâc epemu.”
Morodekaire bibitua wâtuŋ bambiŋ
9 Eme Hamaŋ e ʒoaŋ gie bapa ira ʒeri bari ehuc bubiaŋ faio hahata rawec. Raku ŋicwofuŋte sacmotâcko fisime Morodekaizi hone takirerâ ɋarac ɋarac qahuc ŋeweckonec mi faharewec. Iŋuc eme Hamaŋzi honerâ ere aaricke sâqorewec.
10 Erâ sifu aaric mana‐bipiehuc ficticnao risiewec. Risierâ âgofâc‐ticne â ŋonâŋ‐ticne Ʒeresi jaŋe hefârec‐jopame fisimbiŋ.
11 Fisipie Hamaŋzi moneŋ mafa sâko‐ticne irec binaŋ mecne, ŋokâfâcne jaŋere binaŋ mecne erâ ŋicwofuŋzi sâsehuc ʒâŋe biŋe sâko tahackeme ŋic fekicne â ŋicwofuŋte kiŋaŋŋic gâcne jaŋere sâc sirickewec irec binaŋ i mâmâc bajarewec.
12 Ehuc ʒuhuckerâ ʒiŋuc jazawec: “Ŋokac wofuŋ Esitezi ŋic e me e mâcne, no hâcne ŋicwofuŋhec tiwâ bâzi nanacte hefârec‐nâfojec. Erâ tomâcko wâc iŋuc jaha ŋicwofuŋhec erao ranacte nâsâjec.
13 Ehame Judaŋic Morodekaizi ŋicwofuŋte sacmotâcko ʒuhuckerâ ŋeocmuo ine no sifu wiac irec manape fârine mi eocmu.”
14 Iŋuc jazame ŋonâŋ‐ticne Ʒeresi â âgofâcne sasawa jaŋe ʒiŋuc âzâcnembiŋ: “Go mutec bibitua wâtuŋ moc kubi 50 irec sâc banʒepieŋ. Erâ tomâcko furicte ŋicwofuŋ âzâcnetec mume Morodekai bituanʒepieŋ. Iŋuc epie honerâ ŋicwofuŋhec tiwâ bâzi nâzore bubiaŋ faio razepirec.” Eme Hamaŋ e dâŋ i maname biaŋkeha bibitua wâtuŋ baniŋte ŋic jazawec.