6
Hamaŋ ʒoɋac ecnepie Morodekai sâsewec
1 Eme ŋicwofuŋ e ŋafe ira maŋhâhâŋ ecneme guŋɋâri juwec, ehuc ʒoaŋne ʒoaŋne wiac fua wefuwec irec binaŋ qâhâc papia i mume bafisirâ wosecnembiŋ.
2 Wosecnehuc ine ŋicwofuŋte kiŋaŋŋic fekicne jajahec, Bigitana â Teresi jahe motâc soŋaŋ juhuc ŋicwofuŋ Ahasiwero qâhâmonicte mupire Morodekaizi manarâ mufuac‐jofawec irec binaŋ wosecnembiŋ hâcne.
3 Eme ŋicwofuŋzi manarâ ʒiŋuc muhuc wio‐jarewec: “Morodekai e mufuac‐jofawec irec erâ sâsehuc furine wemo wiac râcnekicne?” Iŋuc wiome kiŋaŋ qacnehuc jumbiŋ jaŋe ʒiŋuc âzâcnembiŋ: “Aricne, e wiac i me i moc mi râcnekicne.”
4 Mupie ŋicwofuŋzi muwec: “Hae ʒoŋao mozi ware domakac?” Wiowec dameŋ ŋondeŋ ijaha Hamaŋ e kecʒiŋuc manasuhuc ŋicwofuŋte hae ʒoŋao fisi domawec hâcne: No ŋicwofuŋ âzâcnepe mume bibitua wâtuŋ bakicne ira Morodekai bituanʒepieŋ.
5 Irec kiŋaŋŋic jaŋe ŋicwofuŋ ʒiŋuc âzâcnembiŋ: “Hamaŋzi ware hae ʒoŋao domakac.” Iŋuc âzâcnepie ŋicwofuŋzi muwec: “Ecnepie wefuoc.”
6 Eme Hamaŋ e ficko feme ŋicwofuŋzi dâŋ kecʒiŋuc muhuc wiocnewec: “Ŋic moczi ŋicwofuŋ no sâsecnuzore afeckeme weniŋuc ecnepe sâckeocmu?” Mume Hamaŋ e ʒiŋuc manasuwec: “Ŋicwofuŋ e ŋic moc mâcne, no hâcne sâsecnuocte mukac.”
7 Iŋuc manasuhuc ŋicwofuŋ dâŋ kecʒiŋuc bâtikiecnewec: “O ŋicwofuŋ, go ŋic sâsezo mukomec e ʒiŋuc ecnetec sâckeocmu:
8 Go mutec ŋicwofuŋ ŋaqi go gahac rojumeŋ erâ becâsic eri hendiŋ wiac‐ticnehec go gahac bajumeŋ i bawarenʒepieŋ.
9 Erâ ŋicwofuŋ gore kiŋaŋŋic fekicne moc râcnepie eki ine ŋicwofuŋ go ŋic sâsezo mukic e hecneme huzejec. Ehame ŋic e ecneme becâsicko ferâ ŋehame barâ rahuc hahaŋne barâ ʒiŋuc muzejec: ‘Ŋicwofuŋzi ŋic moc sâseocte afeckeme e iŋuc hâcne ecnezo.’ ”
10 Iŋuc mume ŋicwofuŋzi Hamaŋ ʒiŋuc âzâcnewec: “Ajoc, go mukomec irec sâc jâmbâŋ ehuc ŋaqi â becâsic rorâ Judaŋic Morodekai nore sacmotâcko ŋekac e râcnezemec. Go dâŋ mumec i efârezemec.”
11 Eme Hamaŋ e ŋaqi wiac Morodekai hecneme huwec. Erâ ecneme becâsicko ferâ ŋeha bâniecnehuc hahaŋne barâ dâŋ ʒiŋuc muwec: “Ŋicwofuŋzi ŋic moc sâseocte afeckeme e iŋuc hâcne ecnezo.”
12 Iŋuc epie tarame Morodekaizi ŋicwofuŋte sacmotâcko risiewec. Â Hamaŋ eki ine ʒâŋe mai‐ticne bâsoŋkerâ busâqoc manahuc ficticnao gasackerâ rawec.
13 Ra fisirâ wiac fuacnewec irec binaŋ i ŋonâŋ‐ticne Ʒeresi â âgofâcne bajarewec. Bajareme âgofâcne â ŋonâŋ‐ticne Ʒeresi jaŋe ʒiŋuc âzâcnembiŋ: “Go miŋecgac Morodekaire maio fuŋkerâ bawahacgukicne irec manac: E Judaŋic fârine jukacko ine ere maio mocwâc sanaŋkerâ mi domacmu.”
14 Jaŋe Hamaŋhec dâŋ muha muhapie izia ŋicwofuŋte kiŋaŋŋic fekicne jaŋe fisirâ, Esitezi tiwâ bâzi rike bâmoc ewec i nânicte bâruŋ jaha jowa rambiŋ.