10
Hâpic fuambiŋ
1 Iŋuc fuame Wofuŋzi Mose dâŋ ʒiŋuc âzâcnewec: “Go Faraorao fezemec. No nahac hâcne fuŋne qaqa mâsi‐nane ŋondeŋ‐jeŋicko bapemurâ e â ŋicfâcne jaŋe ejarepe maŋjeŋic sanaŋkewec.
2 Eme no Aigita ŋic maŋ bâsifuc ejarehuc fuŋne qaqa mâsi bakopac irec binaŋ naru motecfâcge â ŋosafâcge bajaretec, no Wofuŋ jukopac, irec fuŋne ʒâŋitanʒepieŋ.”
3 Eme Mose â Aroŋ jahe Faraorao ferâ ʒiŋuc âzâcnepic: “Wofuŋ, Hebiraio ŋic nâŋere Anutu, e ʒiŋuc mukac: ‘Go nore maio rumehuc juju i wemocte boc qikiŋnekomec? Go ŋicfâc‐nane nore kiŋaŋ qaniŋte râec‐jopatec raniŋ.
4 Manakic, go ŋicfâc‐nane raniŋte mi mana‐jarecmuo ine tomâcko mupe hâpiczi fuarâ hae mâreŋge sâcke‐fâreniŋmu.
5 Erâ mâreŋ sâockerâ, hoe sanaŋzi wiac gâcne akickewec i hâcne nâ miziehuc gie‐jeŋicko jâc wiac doma rakac i mâmâc nâ imac epie garaŋ garaŋne domazejec.
6 Erâ go gahacne fic mecne, kiŋaŋ qaqafâcge jaŋere fic mecne â Aigita ŋic sasawa jaŋere fic mecne i mâmâc fusucma‐fârenʒepieŋ. Wiac iŋucne i mamac ŋosafâcge jaŋe mâreŋko fua wefumbiŋkonecteaŋ moc mi honehuc jumbiŋ.’ ” Iŋuc muhuc fotikierâ Farao beherâ rawec.
7 Eme Faraore kiŋaŋ qaqa jaŋe e ʒiŋuc âzâcnembiŋ: “Ŋic sipiric‐nâpoocte doc sipuac enâreku mo dameŋko moc behec‐nâpoocmu? Go ŋic jaŋe râec‐jopatec ra Wofuŋ Anutu‐jeŋic kiŋaŋ qacnenʒepieŋ. Aigita mâreŋ biac ima bakicne i go mi manakic me?”
8 Iŋuc mupie mume Mose â Aroŋ jahe Faraorao risiepire ʒiŋuc jasawec: “Ŋoŋe raniŋ, erâ Wofuŋ Anutu‐ŋeŋic kiŋaŋ qacneniŋ. Mâc mozia raniŋmu?”
9 Mosezi muwec: “Nâŋe kâcɋene piticne, ŋokac naru motecfâc‐nâŋec, bulimakao â qowifâc‐nâŋec i mâmâc jowac‐jopa ranaŋmu. Nâŋe Wofuŋ‐nâŋecte hombaŋ ŋenaŋte munârekicne hâcne.”
10 Eki ine jasawec: “No ŋoŋe â ŋokac motecfâc‐ŋeŋic râec‐ŋopape ra wiac moc eniŋmuo ine Wofuŋzi ŋoŋehec juzo murâ juzejec. Ŋoŋe wiac hehesicne eniŋte maŋkerâ juŋgopieŋ i tâtâc fokac i!
11 Mâcne, ŋiczi sawa ra Wofuŋte kiŋaŋ qanʒepieŋ, ŋoŋe iŋuc hâcne eniŋte muŋgopieŋ.” Iŋuc murâ mume Faraore maionec jâpec‐jofapie rapic.
12 Eme Wofuŋzi Mose dâŋ ʒiŋuc âzâcnewec: “Go mege Aigita mâreŋkopec sicnetec hâpic jaŋe ware Aigita mâreŋ ŋefacke‐fârerâ wiac rehacnehec, hoe sanaŋzi akickewec fokac i nâpie omae‐fârezejec.”
13 Eme Mose e gunu‐ticne Aigita mâreŋkopec bâfeŋnewec. Eme Wofuŋzi mume ʒoaŋ wewefunaonec mâŋâŋ sâkozi ware ŋafe ʒoaŋ qahuc fowec. Eme hae fureme mâŋâŋ izi hâcne hâpic ficne suec‐jopame warembiŋ.
14 Erâ hâpic guru hâhâwicne jâmbâŋzi Aigita mâreŋ sâko sâckerâ ŋefacke‐fârembiŋ. Hâpic guru iŋucne sâko dameŋ juwicnao moc mi fisi jumbieŋ erâ wâc juku mocwâc mi fisinʒoŋgopieŋ.
15 Eme mâreŋ sasawa ŋefacke‐fârepie dapâc ewec. Ehame hoe sanaŋzi mâreŋko wiac rehacnehec â jâchândâŋ akickewec i nâmiziembiŋ. Irec Aigita mâreŋ sâkoo jâc mecne, wiac gâcne gieo doma rawec i mecne rehacnehec mocwâc mi domawec.
16 Iŋuc fuame Farao e Mose â Aroŋ bâruŋ jaha hefârec‐jofarâ jasawec: “No Wofuŋ Anutu‐ŋeŋic sindaŋ ecnehuc ŋoŋe mâmâc eŋarepo.
17 Irec ʒi sâqocne‐nane mocwâc bâtâmire‐narenicmurâ numu‐ŋactepe ŋohe Wofuŋ Anutu‐ŋekic wira wâwâsic ecnepire sisipiric keci mume arictac ezejec.”
18 Eme Mose e Farao beherâ Wofuŋ wira wâwâsic ecnewec.
19 Eme Wofuŋzi ʒoaŋ wewefunaonec mâŋâŋ i herisieme ʒoaŋ huhunaonec mâŋâŋ sanaŋ warewec. Mâŋâŋ izi ine hâpic ficne suec‐jopame Hâwec Bâbâroŋko hufârepie Aigita mâreŋko hâpiczi omaewec.
20 Wofuŋzi ine Farao ecneme maŋsanaŋ erâ Israe ŋic mi râec‐jopawec.
Dapâc qisiric fuawec
21 Iŋuc fuame Wofuŋzi Mose dâŋ ʒiŋuc âzâcnewec: “Go mege sambâŋkopec sicnetec Aigita mâreŋ sâkoo dapâc qisiric jâmbâŋ fuazejec.”
22 Eme Mose e meticne sambâŋkopec sicneme Aigita mâreŋ sâkoo dapâc qisiric fuarâ ʒoaŋ jahec â moc foha
23 ŋiczi hohonec eniŋte eipiembiŋ, ehuc fic hae‐jeŋic moc mi bebehe mâc fohapie ʒoaŋ jahec â moc tarawec. Israe ŋic jaŋere fic hae ine tatamac jaha foha jumbiŋ.
24 Iŋuc fuame Faraozi Mose hefârerâ muwec: “Ŋoŋe Anutu ra kiŋaŋ qacneniŋ, mâc qowi â bulimakaofâc‐ŋeŋic ine hae mâreŋ ʒira behec‐jopapie junʒepieŋ. Ŋokac naru motecfâc‐ŋeŋic jaŋe ine ŋoŋehec sâcne raniŋmu.”
25 Mosezi ine muwec: “Aricne, go bâzi ririkere â qowi bâzire wâcwiac nâretecne Wofuŋ Anutu‐nâŋec bâzi rikecnenʒepeneŋ.
26 Qowi â bulimakao wiac‐nâŋec i mâmâc ame susuc‐jopahuc huŋgaŋne mac moc mi behepene juzejec. Nâŋe irecnec hâcne gâcne bâwosâerâ Wofuŋ Anutu‐nâŋec bâzi rikecnehuc kiŋaŋ qacnenaŋmu. Nâŋe bâzi weniŋucne Wofuŋ rikecnenaŋmu i biac mi manaŋgopeneŋ, raku ocna fisirâ ine mananaŋmu.”
27 Wofuŋzi ine Faraore maŋ bârâŋgeŋkeme râec‐jopaocte mi ecnewec.
28 Eme Faraozi Mose âzâcnewec: “Go behecnurâ rac, erâ mocwâc maicnuzicte tukige rozemec. Go mocwâc maicnutec izia qâhâmocgupemu.”
29 Mosizi muwec: “Mukomec iŋuc, no ʒâŋe maige mocwâc mi honepemu.”