11
Mârâc fufua jaŋere hâmoc biŋe mukicne
1 Eme Wofuŋzi Mose dâŋ ʒiŋuc âzâcnewec: “Wiac hâhâwicne sâko mocjaha fokac i mupe Faraorao â Aigita mâreŋko fuazejec. Fuame râec‐ŋopame ʒirecnec sâcne raniŋmu, erâ mâteŋne mi sorec‐ŋopaocmu, fâro bahuc hae nânâ jâpec‐ŋopame raniŋmu hâcne.
2 Irec go ʒiŋuczia ŋic ŋokac jazatec jaŋe ru sâc diguracfâc‐jeŋic eri wiac siliwa â golzi bakicne irec numu‐jarepie jarenʒepieŋ.”
3 Eme Wofuŋ e Aigita ŋic bufahac qajareme mana‐jarembiŋ. Eme Israe ŋic jaŋere ʒâŋe biŋe i Wofuŋte erâ Aigita ŋic jaŋerao boc haŋ bawec. Erâ i sawa mâcne, Mosere ʒâŋe biŋe i iŋuc jaha Aigita mâreŋko boc fewec, Farao ŋicfâcne jaŋere maio mecne erâ ŋic ŋokac sâko jaŋere maio mâmâc.
4 Eme Mosezi muwec: “Wofuŋ e ʒiŋuc mukac: ‘No ŋafe ʒâŋiŋko waharâ Aigita mâreŋ fotâcne rahape
5 Aigita mâreŋko mârâc motecfâc‐jeŋic jaŋe ʒeŋgoma hâmo‐fârenʒepieŋ. Farao mârâc ŋokâ‐ticne, juku tucticne qaocte mukicne, erao fuŋkerâ raku kiŋaŋ naru padi masiŋko banʒaŋnehuc ŋekac ere mârâc ŋokâ erao taraocmu. Erâ i sawa mâcne, lama bulimakao ŋicne mârâc fufua jaŋe iŋuc jaha hâmo‐fâreniŋmu.
6 Ehame kio owa sâkozi Aigita mâreŋ sâko sâcke‐fâreocmu. Kio owa sâko iŋucne juwicnao moc mi fuarâ fowec erâ wâc juku mocwâc mi fuaocmu.
7 Ehame Israe ŋic jaŋerao qâto moczi, ŋic me qowi moc mi qâŋke‐jarezejec. I kecʒiŋuc mana taraniŋte: Wofuŋ e Aigita ŋic â Israe ŋic bâtâc bacjopakac.
8 Iŋuc fuame kiŋaŋ qaqafâcge ʒi jaŋe sasawa norao fuarâ fodape‐narehuc ʒiŋuc muniŋmu, “Go â ŋicfâcge bâjâpecguŋgopieŋ ŋoŋe sasawa rafârenʒepieŋ.” Iŋuc nazapie rapemu.’ ” Mose e iŋuc murâ bune ʒâʒâficne qame Farao beherâ rawec.
9 Eme Wofuŋzi Mose ʒiŋuc âzâcnewec: “No Aigita mâreŋko mâsi bocjaha barâ ba ezo mupe Faraozi mi mana‐ŋareocmu.”
10 Mose â Aroŋ jahe Faraore maio mâsi i sasawa bafârepic, eme Wofuŋ e sifu Farao ecneme maŋsanaŋ erâ Israe ŋic jaŋe mâreŋ‐ticne beherâ raniŋte mi mana‐jarewec.