13
Mârâc fufua sasawa i Wofuŋte biŋe qazo
1 Wofuŋzi Mose ʒiŋuc âzâcnewec:
2 “Mârâc fufua ʒeŋgoma nore biŋe qahuc bâwosâec‐jopapie junʒepieŋ. Israe ŋondeŋko ŋic me qowi neŋgoc bumaŋkonec bâbâni fuaocmu izi hâcne nore biŋe ezejec.”
Goreŋ sowa juhuc hombaŋ ŋeŋe irec sâcmutâc
3 Eme Mosezi kecʒiŋuc jazawec: “Ŋoŋe ʒoaŋ ʒi Aigita kâpâcwâru fickonec wahambiŋ irec manasuhuc junʒepieŋ, Wofuŋ e mesanaŋ‐ticnezi irecnec jowac‐ŋopame wahambiŋ hâcne. Irec ŋoŋe poroŋ goreŋhec moc mi nânʒepieŋ.
4 Ŋoŋe miŋecgac, fufuŋke mosa April hâcne ira waha raŋgopieŋ.
5 Eme Wofuŋ e mâreŋ moc, susu â baŋac fusucmarâ qâmbâriŋkeekac, erâ ŋoŋe ŋareocte mimiŋnefâc‐ŋeŋic mupaŋke‐jarewec, Kanaaŋ ŋic, Hitiŋic, Amori ŋic, Hiwiŋic â Jebusi ŋic jaŋere mâreŋ hâcne, ira râec‐ŋopame mosa ʒi hâcne mâsi ʒiŋuc basanaŋkepie hata sanaŋ foŋarezejec.
6 Ŋoŋe goreŋ sowa juhapie gie bapa 7 tarazejec, eme ʒoaŋ namba 7 ira Wofuŋte hombaŋ fuazejec.
7 Poroŋ goreŋ tâmiric i nâhuc juhapie gie bapa 7 tarazejec. Wiac goreŋhec ŋoŋerao moc mi bâfuazo, â hae mâreŋ‐ŋeŋicko, goreŋ wiac moc mi bajunʒepieŋ.
8 Ehame gie bapa ira ŋokâfâc‐ŋeŋic ʒiŋuc jazanʒepieŋ: ‘I Wofuŋzi Aigita mâreŋkonec wahahapene ehâmo‐nârewecte iŋuc fuakac.’
9 Eme eebapa irec nikec‐ŋopazacte meŋeŋicko â ʒâŋe mai‐ŋeŋicko ma bapie muzac sâckezac, erâ iŋuc mâcne, Wofuŋte sâcmutâc dâŋzi micŋeŋicko fozejec. Wofuŋ e mesanaŋ‐ticnezi Aigita mâreŋkonec jowac‐ŋopame wahambiŋ irec.
10 Hata sanaŋ i hâcne jara sâc dameŋ‐ticnao âte rahuc junʒepieŋ.
Mârâc fufua jaŋere dâŋ
11 “Eme Wofuŋ e ŋoŋe â apa ŋosafâc‐ŋeŋic mupaŋke‐ŋarewec irec sâcko Kanaaŋ ŋic jaŋere mâreŋko râec‐ŋopahuc mâreŋ ŋareme
12 ŋoŋe neŋgoc bumaŋkonec mârâc fufua sasawa Wofuŋte biŋe qanʒepieŋ; bulimakaofâc‐ŋeŋic jaŋere mârâc fufua ŋicne sasawa i Wofuŋte biŋe jaha.
13 Doŋgi jaŋere mârâc fufua sasawa irec okacne ine lama motecne râezo murâ ine upene qâpirickenʒepieŋ. Ŋic jaŋere mârâc fufua sasawa irec okacne lama motecne râenʒepieŋ.
14 Eme juku ʒâhec ŋokâfâc‐ŋeŋic ʒiŋuc wio‐ŋareŋimu: ‘Wiac i fuŋne weniŋucte eeŋgopieŋ?’ Eme ʒiŋuc jazanʒepieŋ: ‘Wofuŋ e mesanaŋ‐ticnezi Aigita kâpâcwâru fickonec batarac‐nâporâ jowac‐nâpome wahambeŋ.
15 Farao e râec‐nâpoocte maŋsanaŋ erâ qikiŋnewecte Wofuŋzi Aigita mâreŋko mârâc fufua sasawa, ŋicte mecne qowire mecne qâhâmoc‐jopa‐fârewec. Eme irec hâcne neŋgoc bumaŋkonec mârâc fufua sasawa i Wofuŋte bâzi rikeeŋgopeneŋ. Mârâc ŋokâfâc‐nâŋec jaŋere kiwiric ine roeŋgopeneŋ.’
16 Wofuŋ e mesanaŋ‐ticnezi Aigita mâreŋkonec jowac‐nâpome wahambeŋte mâsi izi ma iŋucne erâ megao â ʒâŋe maigao fozejec.”
Karorac â ʒocbâruŋ jahe bânie‐jarepic
17 Eme Farao e ŋic ŋokac râec‐jopame Anutuzi ʒiŋuc muhuctecne hata bembeŋne Filisa mâreŋkopec fowec, ira mi jowac‐jopawec: “Hatao ʒika wiac moc fua‐jareme maŋjeŋic risieme Aigita mâreŋko risienʒipiŋkohec.”
18 Anutu e iŋuc murâ ine ŋic ŋokac bârisiec‐jopame mâreŋ tuhuo Hâwec Bâbâroŋkopec rambiŋ. Israe ŋicguru jaŋe momori ŋiczi birio raeŋgopieŋ irec sâcko Aigita mâreŋkonec waha rambiŋ hâcne.
19 Eme Mose e Josefere siec mâmâc barâ rawec, i Josefezi Israe ŋicguru jaŋe ʒiŋuc mupaŋkecneniŋte ejarewec irec: “Anutuzi iqic‐ŋopazokac dameŋ ira siec‐nane barâ ranʒepieŋ.”
20 Eme jaŋe Sukoti haeonec fahare raku Etamko tuhu mâreŋ qaŋeŋnao hâcne ira toma âterâ fombiŋ.
21 Eme Wofuŋ e jowac‐jopaocte ʒoaŋko karorac ɋâfoŋne maŋnao bâjuŋ‐jopahuc juwec â ŋafeo ine ʒocbâruŋ maŋnao juhuc tamae‐jarewec. Jaŋe ʒoaŋko â ŋafeo hata honehuc raniŋte iŋuc ejarewec.
22 Eme ʒoaŋko karorac â ŋafeo ʒoc izi mi bebehec‐jopa ŋic bânie‐jarehuc jaha juwec.